2023/2024: Ibikorwa by’Urubyiruko rw’Abakorerabushake bizunganira Leta asaga miliyari

  • Imvaho Nshya
  • Ukwakira 1, 2023
  • Hashize amezi 8
Image

Minisiteri y’Ubutegetsi bw’Igihugu iratangaza ko ibikorwa by’Urubyiruko rw’Abakorerabushe (Youth Volonteers) muri uyu mwaka w’ingengo y’imari 2023/2024 bizatanga umusanzu w’arenga miliyari imwe y’amafaraga y’u Rwanda mu kunganira ingengo y’imari ya Leta.

Muri ibyo bikorwa harimo miliyoni 300 z’amafaranga y’u Rwanda azava mu bikorwa bizakorwa mu Kwezi kwahariwe ibikorwa by’urubyiruko rw’abakorerabushake byatangijwe kuri iki Cyumweru tariki ya 1 Ukwakira 2023.  

Ku rwego rw’igihugu ibi bikorwa byatangirijwe mu Mudugudu wa Kigarama, Akagari ka Nkusi mu Murenge wa Jali mu Karere ka Gasabo, aho urubyiruko rw’abakorerabushake hamwe n’inzego z’ubuyobozi bafatanyije gukora umuganda wo gucukura ibyobo bifata amazi kugira ngo atangiriza abaturage.

Ni ibikorwa byakorewe ahatujwe abaturage bahuye n’ibiza hubatswe site y’Umudugu ugizwe n’inzu 230.

Richard Kubana, Umuyobozi Mukuru muri Minisiteri y’Ubutegetsi bw’Igihugu ushinzwe Urubyiruko rw’abakorerabushake n’Ubukangurambaga, yatangaje ko ibi bikorwa by’urubyiruko byitezweho  kugira uruhare rukomeye muri gahunda za Leta.

Yagize ati: “Uku kwezi twatangiye kuri uyu munsi wa none, tariki ya 1 Ukwakira, duteganya ko tuzunganiraho Leta ku ngengo y’imari ya Leta miliyoni zigera kuri 300 z’amafaranga y’u Rwanda, aho  ni mu kwezi kumwe kuko birangira nko mu mwaka turimo gukabakaba muri miliyari hafi irenga y’uruhare rw’abakorerabushake mu rubyiruko.”

Uyu muyobozi kandi avuga mu bikorwa biba byakozwe n’urubyiruko mu gihe cy’umuganda ntibirangire, bakorana n’abayobozi mu Nzego z’ibanze bagakomereza aho byari bigeze bikarangira; yanasabye kandi urubyiruko gukomeza gufatanya n’ubuyobozi muri izi gahunda.

Bimwe mu bikorwa biteganyijwe gukorwa n’urubyiruko rw’abakorerabushake muri uku kwezi  harimo ubukangurambaga muri gahunda za Leta, kurwanya isuri, kubakira abatishoboye (inzu n’ubwiherero) ariko urubyiruko rukitanga cyane mu bikorwa by’amabokoubukangurambaga buvanze n’ibikorwa ku bijyanye n’isuku n’isukura, gutanga amakuru ajyanye no gukumira no kurwanya ibyaha, kwitura no kuremera abatishoboye.

Ibindi nanone uru rubyiruko ruzakora birimo amarushanwa agamije ubukangurambaga, kugira uruhare mu kurwanya igwingira n’imirire mibi bubaka uturima tw’igikoni no gufasha mu mikorere y’amarerero yo mu ngo (Home Based ECDs) n’ibindi bikorwa bitewe n’imiterere n’umwihariko wa buri hantu.

Imibare ya Minisiteri y’Ubutegetsi bw’Igihugu igaragaza ko mu Rwanda hose habarurwa Urubyiruko rw’Abakorerabushake hafi miliyoni imwe n’ibihumbi 500.

ZIGAMA THEONESTE

  • Imvaho Nshya
  • Ukwakira 1, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE