Ibikomoka ku buhinzi u Rwanda rwohereje hanze byinjije tiriyali 1 Frw

  • ZIGAMA THEONESTE
  • Mutarama 8, 2024
  • Hashize amezi 5
Image

Ubuyobozi bw’Ikigo cy’Igihugu Gishinzwe Guteza Imbere Ibyoherezwa mu Mahanga bikomoka ku Buhinzi n’Ubworozi (NAEB), bwatangaje ko ibikomoka ku buhinzi n’ubworozi byoherejwe mu mahanga mu mwaka wa 2022/2023 byinjirije u Rwanda miliyoni 857 z’amadolari y’Amerika, ni ukuvuga tiriyali imwe y’amafaranga y’u Rwanda.

Hari icyizere ko muri uyu mwaka wa 2023/2024 bazagera ku ntego yo kugeza kuri miliyari y’amadolari y’Amerika, ni ukuvuga tiliyari 1.2 z’amafaranga y’u Rwanda, nk’uko byashimangiwe n’Umuyobozi Mukuru wa NAEB Bizimana Claude.

Raporo yatangajwe na NAEB mu kwezi kwa Kamena 2023 yagaragazaga ko amadovize yinjijwe mu mwaka ushize yiyongereye ku kigero cya 33.74% ugereranyije no mu mwaka wa 2021/2022 ubwo u Rwanda rwinjizaga miliyoni 640.9 z’amadolari y’Amerika.

Umusaruro w’ubuhinzi woherezwa mu mahanga wiyongereye mu buryo bwihuse mu myaka ishize, aho amafaranga winjiza wikubye inshuro ebyiri avuye ku madolari y’Amerika miliyoni 225 z’amadolari y’Amerika mu 2013/2014 akagera kuri miliyoni 516 z’amadolari mu 2017/2018.

Intego ni iyo kugera kuri miliyari y’amadolari y’Amerika nk’intego NAEB yihaye muri gahunda y’ibikorwa by’umwaka wa 2019-2024.

Bizimana avuga ko umusaruro wabonetse mu mwaka ushize ushimangira ko kugera kuri iyo ntego bitakiri inzozi.

NEAB kandi igaragaraza ko n’ubwo hari ibibazo byagiye bibangamira iyo ntego u Rwanda rwihaye birimo ihindagurika ry’ibiciro ku masoko.

Bizimana yagize ati: “Turacyari mu mwanya mwiza wo kugera ku ntego ya miriya 1 $ azaturuka ku musururo w’ubuhinzi woherejwe hanze y’u Rwanda mu muri uyu mwaka w’ingengo y’imari”.

2023/2024, NAEB igaragaza ko hakozwe gahunda n’ibikorwa byinshi bigamije guteza imbere ubuhinzi birimo gukomeza gushakira amasoko umusaruro w’ubuhinzi, gusinya amasezerano mu by’ubucuruzi mpuzamahanga n’izindi gahunda zishingiye ku kwagura ubucuruzi.

Mu gukomeza kongera ibyoherezwa mu mahanga bikomoka ku buhinzi kandi byabaye ngombwa ko na sosiyete y’ubwikorezi bwo mu kirere RwandAir yongererwa ibyerekezo, habaho kandi kwagura ibyerekezo by’inzira zo mu Nyanja mu rwego rwo kongera ingano y’umusaruro ukomoka ku ndabo n’ibindi byoherezwa hanze.

Ingamba zafashije u Rwanda kugera ku ntego

Mu ngamba zafashwe kugira ngo igihugu kigere ku ntego cyihaye, Bizimana yavuze ko harimo gukora ingendoshuri ndetse no gukomeza kongera amasoko mashya ku rwego mpuzamahanga kandi bagakomeza no gushyigikira gahunda zisanzwe zo guteza imbere ubucuruzi, yaba amamurikagusha agenda akorwa, kubahiriza amasezerano mpuzamahanga no gushyigikira imikoranire n’ibindi bihugu.

Harimo kandi gushora imari mu rwego rwo guhugura abahinzi hagamijwe kongera umusaruro ndetse no kumenya uburyo bugezweho kandi bushya bukoreshwa mu buhinzi, ibi bikaba ari umwanya mwiza wo kubona impamyabumenyi ku bahinzi bityo bikanongera umusasuro w’ibyoherezwa mu mahanga.

Abandi bagiye bafashwa hari abafatanyabikorwa mu by’ubuhinzi bongererwa ubushobozi bwo kugeza ibyasarurwe mu buhunikiro, no kubungabunga umusaruro hirindwa ko wakwangirika kandi ukagumana ubwiza butuma ugira agaciro ku isoko, ndetse no kugabanya iyangirika ry’umusaruro mu gihe cy’isarura, ibi bikazagira impinduka nziza mu gihe umusaruro wagejejwe ku masoko.

Muri gahunda kandi zashyizweho harimo gukoresha uburyo bw’ubucuruzi bukoresheje ikoranabuhanga   aho abahinzi babonye amasoko menshi kandi akomeye by’umwihariko ayo mu bihugu byo mu burasirazuba bwo hagati, muri Aziya no muri Afurika.

Hanashyizweho kandi ingamba zo kubahiriza ibipimo by’ubuziranenge mpuzamahanga bituma umusaruro w’ibikomoka ku buhinzi byoherezwa hanze y’u Rwanda byemerwa ku isoko hirya no hino ku Isi, harimo no kubyongerera agaciro.

Ibihingwa byinjirije u Rwanda menshi aturutse hanze muri 2023

Ikawa

Mu mwaka w’ingengo y’imari 2022/2023, u Rwanda rwohereje toni zirenga gato 20.000 zinjiza hafi miliyoni 116 z’amadolari y’Amerika, byerekana ubwiyongere bwa 53 % by’ayinjijwe na kawa ugereranyije na miliyoni 75.5 zinjije muri toni zirenga 15.000 zagurishijwe ku masoko mpuzamahanga mu mwaka wari wabanje.

Bizimama yagaragaje ko n’igihugu nka Brezil kizwiho kohereza kawa nyinshi kurusha ibindi ku Isi, na cyo amafaranga ayikomokaho yagabanyutseho ukurikije uko byari byifashe mu gihe cya mbere cy’umwaka wa 2023.

Yagize ati: “Kongera amafaranga ikawa yinjiza bishingira ku biciro biriho ku isoko ku rwego rw’Isi, kuri ubu biri ku kigero cyo hejuru, ibi birafasha u Rwanda gukomeza kuyohereza ndetse n’intego y’ayo rwari kwinjiza ayikomokaho akaziyongera”.

Uwo muyobozi yagaragaje ko uko imyaka igenda ishira ari ko igiciro cya kawa kigenda kizamuka kuko mu 2022/23 byari ni 5.7 z’amadolari y’Amerika ku kilo mu gihe muri 201/22 byari 4,9 ku kilo.

Raporo ya NAEB igaragaza ko ingano ya kawa yoherezwa mu mahanga yiyongereyeho 32% mu mwaka wa 2022/23 bingana na toni ibihumbi 4 na 889 ugeranyije n’indi myaka yabanje.

Imboga n’Imbuto

Mu mwaka wa 2022-2023 umusaruro w’imboga woherejwe mu mahanga wanganaga na toni 51,689 zinjirije u Rwanda arenga miriyoni 34,5 z’amadolari y’Amerika ni ukuvuga ko yazamutseho 61 % ugeranyije n’ayo rwinjije mu mwaka wari wabanje yanganaga za miliyoni 21.3 z’amadolari y’Amerika yaturutse kuri toni 25,221 z’imboga zoherejwe.

Imbuto zohereje mu mahanga mu 2022/23 zose hamwe zingana na toni 21,953 zinjije miliyoni 19$ zingana na 30% yiyongereyeho ugereranyije n’ayinjiye mu mwaka wa 2021/2022 angana na miliyoni 14,6 aturutse kuri toni 16.207 zari zoherejwe.

Muri rusange, Bizimana yavuze ko hari izamuka ry’amafaranga akomoka ku kohereza ibikomoka ku buhinzi mu mahanga cyane cyane ibinyampeke n’ibinyamisogwe, birimo soya n’ibindi, bikongera amafaranga kuva kuri miliyoni 226 z’amadolari y’Amerika muri 2021/22 bigera kuri miliyoni 314 z’amadolari y’Amerika mu 2022/23.

  • ZIGAMA THEONESTE
  • Mutarama 8, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE