Ibikomoka ku buhinzi byinjirije u Rwanda miliyari 663 Frw

  • NTAWITONDA JEAN CLAUDE
  • Nzeri 12, 2022
  • Hashize imyaka 2
Image

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’Ubworozi (NAEB) cyatangaje ko ibikomoka ku buhinzi n’ubworozi byinjirije u Rwanda miliyoni zisaga 640.9 z’amadolari y’Amerika, ni ukuvuga amafaranga y’u Rwanda asaga miliyari 663, mu mwaka w’ingengo y’imari wa 2021/2022.

Iyo mibare yatangajwe na NAEB, igaragaza ko ugereranyije n’inyungu u Rwanda rwabonye mu bicuruzwa bikomoka ku buhinzi mu mwaka wabanje wa 2020/2021, kuri ubu u Rwanda rwabonye inyongera ingana na 45% bitewe n’ingamba Leta y’u Rwanda yashyiriyeho kuzahura ubukungu bwazahajwe n’icyorezo cya COVID-19.

Bivuze ko mu mwaka wabanje, ibikomoka ku buhinzi n’ubworozi byoherejwe mu mahanga byinjirije u Rwanda miliyoni zisaga 444.8 z’amadolari y’Amerika, ni ukuvuga amafaranga y’u Rwanda asaga miliyari 460.6.

Iyo nyongera yagaragajwe muri raporo rusange yahuje ibyoherejwe mu mahanga kuva muri Nyakanga 2021 kugeza muri Kamena 2022, ahagaragaye inyongera idasanzwe mu ngano y’ibyoherezwa mu mahanga ndetse no mu mafaranga byinjiriza Igihugu.

Muri gahunda Guverinoma y’u Rwanda yashyizeho zagize uruhare mu izahuka ry’umusaruro w’ibyoherezwa mu mahanga nyuma y’icyorezo cya COVID-19, harimo iya nkunganire no gushyigikira abahinzi n’abohereza umusaruro wabo mu mahanga binyuze mu Kigega Nzahurabukungu (ERF).

Amafaranga yinjijwe n’ibihingwa ngengabukungu nk’ikawa, icyayi n’ibireti, yiyongereye ku kigero cya 18% agera ku madolari y’Amerika 185,442,833 mu gihe ayinjizwa n’ibindi bicuruzwa bikomoka ku musaruro w’ubuhinzi n’ubworozi byiyongereye ku kigero cya 58% aho byinjije amadolari y’Amerika 455,509,464 mu mwaka wa 2021/2022.

Ibicuruzwa byoherezwa mu mahanga byariyongereye

Ayinjijwe n’ikawa yiyongereye ku kigero cya 23% mu gihe ay’icyayi yiyongereye ku kigero cya 15%, na ho ibireti byo yiyongera ku kigero cya 12%. Ugereranyije n’umwaka wabanje, ayinjijwe n’umusaruro w’indabyo, imboga n’imbuto yiyongereye ku kigero cya 6.7%, aho imboga zongereye agaciro ku kigero cya 63% mu gihe ak’imbuto kiyongereye ku kigero cya 87%.

Ku rundi ruhande, ingano y’indabo zoherezwa mu mahanga yagabanyutseho 5% ugereranyije n’umwaka ushize ndetse n’amafaranga zinjije agabanyuka ku kigero cya 13%, bitewe n’ibibazo bya Politiki byateje intambara y’u Burusiya na Ukraine, nk’ibihugu byubatse izina mu gutumiza indabyo ziva mu mahanga.  

Inyungu yavuye mu binyamisogwe n’ibinyampeke yiyongereye ku kigero cya 44%, ikaba igize 20.8%  by’amafaranga yinjijwe n’ibikomoka ku buhinzi muri rusange.

Ubuyobozi bwa NAEB buvuga ko buha agaciro cyane uruhare rw’abafatanyabikorwa bose bagaragara mu ruhererekane rw’ubuhinzi no gutunganya umusaruro w’ibyoherezwa mu mahanga, muri iki gihe ubukungi bw’Isi bukomeje gufungurwa.

Umuyobozi Mukuru wa NAEB, avuga ku musaruro wabonetse mu mwaka ushize, yagize ati: “Twishimiye ko urwego rw’ibicuruzwa byoherezwa mu mahanga rukomeje kugira uruhare mu gusigasira no guhanga umurimo, mu mahirwe menshi rutanga. Tuzubakira ku mikorere myiza y’uyu mwaka turushaho guhanga uburyo bushya bwo gukomeza guharanira ko ubucuruzi bushingiye ku buhinzi mu Rwanda burushaho kwigaragaza mu ruhando mpuzamahanga ari na ko bukomeza kureshya amasoko mpuzamahanga.”

Ubuhinzi ni urwego rukomeye rufatiye runini Igihugu n’abagituye muri rusange, cyane ko ari rwo ruha akazi abarenga 70% kandi rukagira uruhare rungana na 31% ku Musaruro Mbumbe w’Igihugu (GDP).

Ni rumwe mu nzego rugaragaza amahirwe akomeye mu gufasha Igihugu kubaka iterambere rirambye, rukaba n’urwego ruza imbere mu kuzafasha Afurika yose kwigobotora guhora itegeye amaboko indi migabane.

  • NTAWITONDA JEAN CLAUDE
  • Nzeri 12, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE