Ibihugu byoherezwamo amata y’Uruganda rw’Inyange atunganyirizwa mu Rwanda

  • Imvaho Nshya
  • Nyakanga 27, 2023
  • Hashize amezi 10
Image

Ubuyobozi bw’uruganda Inyange Industries Ltd bwagaragaje ko uretse Abanyarwanda bamaze kumenyera kunywa,  ko rufite n’isoko rikomeje kwaguka mu mahanga.

Kuri ubu amata y’Uruganda Inyange Industries Ltd acuruzwa muri Repubulika Iharanira Demokarasi ya Congo (RDC), muri Kenya, mu Burundi, Sudani y’Epfo, Somalia na Santarafurika (Centre Afrique), hakaba hari gahunda yo kongera ibihugu by’Afurika byohererezwa amata atunganyirizwa mu Rwanda. 

Mu kiganiro cyihariye Imvaho Nshya yagiranye n’Umuyobozi w’Uruganda Inyange Industries Ltd Biseruka James, avuga ko kugira ngo bashobore kugera ku isoko mpuzamahanga byaturutse ku bwiyongere bw’umukamo w’amata. 

Biseruka avuga ko bagishaka kwagurira isoko ry’amata y’Inyange cyane cyane mu bihugu by’Afurika. 

Yagize ati “Uko aborozi bagenda babona isoko ni ko bagenda bazamura umusaruro kandi ni ko n’isoko rigenda ryaguka.

Ubundi mu mata dukora ubungubu 90% tuyakoresha ku isoko ry’u Rwanda irindi 10% rikajya ku Isoko mpuzamahanga”.

Uruganda rw’Inyange rufite ubushobozi bwo kwakira Litiro ibihumbi 200 ku munsi. Umukamo w’amata y’aborozi ngo wagiye uzamuka umwaka ku wundi.

Ati “Dutangira na Nyagatare muri 2012, kuhabona amata litiro ibihumbi bitatu byari ikibazo ariko umwaka ku wundi yazamukaga hafi 64% ku buryo kuva mu 2020 amata amaze kugera kuri Litiro ibihumbi 120 ku munsi, avuye ku bihumbi bitatu”. 

Aborozi bamaze kugira isoko, barushijeho kongera umukamo ndetse ugera n’aho uruta ubushobozi bw’uruganda rw’Inyange.

Akomeza agira ati: “Ni yo mpamvu uyu munsi tuvuye kuri ibyo bihumbi Maganabiri hano, haza inganda nka Mukamira, haza Giheke n’ubu turi kurangiza uruganda rw’ifu aho tuzava ku bihumbi 200 hano tukajya kuri litiro miliyoni ku munsi”.

Biseruka James, Umuyobozi Mukuru wa Inyange Industries Ltd (Foto Kayitare J.Paul)

Avuga ko hari imashini bazanye izajya itwara amata hafi ibihumbi 150, kandi hari amata y’Ifu uruganda rugiye kujya rukora, ibihumbi 500 ku munsi.

Ibi ngo bivuze ko n’Abanyarwanda bamaze kumenya kunywa amata yongerewe agaciro. Umunsi ku wundi, umwaka ku wundi litiro hafi 29% yiyongera ku mata anyobwa n’Abanyarwanda.

Icyekerezo cy’Uruganda rw’Inyange ni ukuzamura ku byo rukora byose bikomoka ku mata.  

Biseruka avuga ko uruganda rwatangiye kuko aho tuvuye rugiye gukuba hafi inshuro 10 z’amata rwakoraga, rukabanza guhaza isoko ry’u Rwanda ndetse n’isoko mpuzamahanga.

Avuga ko hari amata y’Ifu bateganya kuzajyana ku Isoko mpuzamahanga ibyo uruganda rukora, rukoherezayo n’ibindi rukora bikomoka ku mata kuko rubona ko hari isoko mpuzamahanga rihari.

Ati: “Icyekerezo cyacu mu myaka Ibiri cyangwa Itatu twumva ko tuzaba twamaze kugera ku isoko mpuzamahanga ku rwego rushimishije ndetse tunahaza isoko ryo mu Rwanda”.

Uruganda rw’Inyange rwatangiye gukora mu 1997, mu gihe mu 1999 ari bwo rwatangiye gutunganya amazi na yo yitwa Inyange.

Yanditswe na KAYITARE JEAN PAUL

  • Imvaho Nshya
  • Nyakanga 27, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE