Ibihugu by’Afurika birasabwa kwigira ku buryo u Rwanda rwita ku baturage

  • Imvaho Nshya
  • Werurwe 13, 2022
  • Hashize imyaka 2
Image

Abadepite n’Abasenateri  bahagarariye Inteko  Zishinga Amategeko muri Afurika bashimye uburyo Leta y’u Rwanda yita ku mibereho myiza y’abaturage ibafasha gutura heza, bagaragaza ko ibindi bihugu by’Afurika bikwiye gufatira urugero rwiza kuri iki gihugu cyanyuze mu bikomeye ariko kikaba kimaze gutera intambwe ishimishije nyuma y’imyaka 28 kivuye muri Jenoside yakorewe Abatutsi.

Abagize Inteko Zishinga Amategeko muri Afurika bari mu Rwanda mu nama ya  ya 77 ya Komite Nshingwabikorwa yabo, babigaritseho ku wa Gatandatu taliki ya 12 Werurwe 2022, ubwo basuraga Umudugudu w’Icyitegererezo wa Karama uherereye mu Karere ka Nyarugenge.

Izo ntumwa za rubanda zaturutse mu bihugu 41 by’Afurika zanyuzwe no gusanga abaturage batujwe muri iyo midugudu babayeho neza kandi bishimira kuba Leta yarabakuye mu manegeka igashora akayabo mu kububakira amacumbi ajyanye n’igihe kandi yujuje ibya ngombwa byose bakenera mu buzima bwabo bwa buri munsi.

Umudugudu w’Icyitegererezo Karama wubatswe na Leta y’u Rwanda hashowe akayabo k’amafaranga asaga miliyari umunani, ukaba waratujwemo imiryango 240 igizwe n’abantu 1,275 bari batuye ku buhaname bukabije bw’umusozi wa Kigali no mu bindi bice by’amanegeka ahatandukanye mu Mujyi wa Kigali.

Ku ya 4 Nyakanga 2019 ni bwo uyu Mudugudu uherereye mu Murenge wa Kigali watashwe ku mugaragaro na Perezida wa Repubulika Paul Kagame, ubwo hizihizwaga Isabukuru ya 25 yo Kwibohora.

Uyu mudugudu,ugizwe n’innyubako z’amagorofa zo guturamo, ishuri ribanza n’iryisumbuye, urugo mbonezamikurire y’abana bato, ibikorwa by’ubuhinzi n’ubworozi bw’inkoko. 

Agace uyu mudugudu wubatsemo Kazwi nka Norvege kakaba kagenda gatera imbere cyane, hubakwa inzu nyinshi zo guturamo ndetse n’ibindi bikorwaremezo birimo imihanda, kwegerezwa amazi, amashanyarazi n’ibindi.

Abadepite n’Abasenateri bahagarariye Inteko Zishinga Amategeko muri Afurika  batunguwe no gusanga imibereho y’abawutujwe muri uyu Mudugudu ari myiza kandi yarabahinduriye ubuzima, basaba ko n’ibindi bihugu by’Afurika bikwiye kuza kwigira ku Rwanda.

Umwe muri izo ntumwa za rubanda yagize ati: “Ntekereza ko nk’Igihugu kiri mu nzira y’amajyambere, iyi gahunda ni nziza kuri Leta y’u Rwanda. Tukiri iwacu twumvaga ibyiza byinshi u Rwanda rwagezeho, twaje kubyirebera n’amaso yacu. Ibyo twabonye biratangaje, ni ibikorwa bifasha abaturage kugira imibereho myiza. Ibihugu by’Afurika bitarabitangira bikwiye kuza kwigira ku Rwanda.”

Mugenzi we na we yashimye uburyo u Rwanda rwita ku mibereho y’abaturage barwo, agira ati: “Twabonye ko Guverinoma y’u Rwanda izi gufata ishingano. Yabonye ko ubuzima bw’abaturage bwari mu kaga, ifata icyemezo cyo kububakira inzu nziza, ibavana aho bari batuye habi, kuri ubu batuye neza. Ni ibintu byo kwishimira twanezerewe cyane, ni urugero rwiza rwo kwigiraho.”

Umuhuzabikorwa w’Umudugudu wa Karama Mbyariyehe Abel yabwiye RBA ko imibereho y’abatujwe heza yahindutse kandi bakababa bishimira ko batujwe heza, nubwo icyo bakeneye ari ukubona Abajyanama b’Ubuzima babana na bo babafasha mu kurushaho kwita ku buzima bwabo.

Yagize ati: “Turashimira Leta y’u Rwanda yadutuje heza kuri ubu ubuzima bwacu bukaba bwarahindutse. Ariko turasaba ko twabona gahunda y’Abajyanama b’Ubuzima. Icyo byadufasha ni ukumenya ngo ese wa mwana ufite ikibazo cy’uburwayi cyangwa umubyeyi utwite, akaba akeneye ubutabazi bw’ibanze yabubona vuba byihuse, aho kugira ngo asjye kubushakira ahitaruye umudugudu?”

Umunyamabanga Nshingwabikorwa w’Umurenge wa Kigali Ntirushwa Christophe, avuga ko ibijyanye no kurushaho kwita ku buzima bw’abo baturage bigenda bikorwa ari na ko bashishikarizwa gukura amaboko mu mifuka bagashaka imirimo cyangwa bakitoza kuyihanga.

Yagize ati: “Hari abagaragaza yuko akazi kabuze. Hari abataragera ku myumvire yo kumva ko na bo bashobora kwihangira imirimo na bo bakagergeza gukora. Iyo urebye hano muri Kigali hari ibikorwa bitanga imirimo y’amaboko nk’inzu zirimo kubakwa hano muri Kigali. Kimwe mu byo tubakangurira ngo ni ugukora imirimo y’amaboko ibafasha kurushaho kugira imibereho myiza.

Aba badepite n’abasenateri banasobanuriwe ko Umudugudu wa Karama ari umwe mu midufudu y’icyitegererezo ikomeje kubakwa mu bice binyuranye by’Igihugu hagamijwe kurushaho kunoza imiturire no guhindura imibereho myiza y’abaturage.

Abaturage batuzwa muri iyo midugudu ntibahwema kugaragaza ko bakijijwe imihangayiko bagiraga ubwo imvura yagwaga bakabunza imitima bashaka aho bahungira ngo amazi atabatembana cyangwa inzu zabo zikabagwira none ubu bakaba babayeho mu mutuzo, abana babo baaba biga mu mashuri meza n’ibindi.

  • Imvaho Nshya
  • Werurwe 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE