Ibigo 30 by’Ababiligi mu ruzinduko rw’iminsi 5 mu Rwanda

  • Imvaho Nshya
  • Werurwe 27, 2022
  • Hashize imyaka 2
Image

Abahagarariye Ibigo by’abikorera bigera kuri 30 bitezwe mu Rwanda aho bagiye kuza kureba amahirwe y’ubucuruzi n’ishoramari ahari ndetse n’aboneka ku Isoko ry’ibihugu bigize Umuryango w’Afurika y’Iburasirazuba (EAC).

Ibyo bigo bikora mu nzego zitandukanye ariko zikaba ziganje mu bikorwa remezo nm’ubwubatsi, urwego rwo gutunganya amazi meza, urwego rw’ubuzima ndetse n’urw’ikoranabuhanga n’itumanaho mu isakazabumenyi (ICT).

Muri urwo ruzinduko rwitezweho gusoza ku ya 31 Werurwe 2022, abo bashoramari bitezweho gutemberezwa ibice bitandukanye nyaburanga n’iby’amateka, kungurana ibitekerezo mu rwego rw’ubucuruzi n’abashoramari bagenzi babo bo mu Rwanda, kugaragaza ubunararibonye bwabo mu ishoramari n’ibindi bikorwa bitandukanye.  

Uru ruzinduko rwasubitswe inshuro ebyiri kubera ingaruka z’icyorezo cya COVID-19 nk’uko bitangazwa na The New Times, rukaba rwaherukaga gukorwa mu myaka ine ishize.  

Komiseri ushinzwe ubucuruzi mu Bubiligi Eric Santkin, yavuze ko intego y’uru ruzinduko ari ukongerera imbaraga ubucuruzi busanzwe bukorwa hagati y’ibihugu byombi ndetse no kugaragariza abashoramari bo mu Bubiligi amahirwe y’ubucuruzi n’ishoramari aboneka mu Rwanda.

Yagize ati: “Dutegereje kubona amahirwe y’imikoranire hagati y’amasosiyete yo mu Rwanda no mu Bubiligi. Turashaka kubona abantu benshi mu nzego zo gutunganya ibikomoka ku buhinzi n’ubworozi, kubungabunga ibidukikije ndetse no mu nzego zo kubaka ubukungu bwisubira, ibyo bikaba biri mu bigize ubutumwa bwo mu myaka iri imbere.”

Urwego rw’ubucuruzi hagati y’ibihugu byombi rwagumye ruhagaze neza mu bihe byashize, cyane cyane imiti n’ibikoresho by’ubuvuzi u Rwanda rwagiye rubona biturutse mu Bubiligi. Icyakora, hafashwe ingamba zo gushimangira ubufatanye hagati y’ibihugu byombi mu rwego rw’imari.

Muri Gashyantare 2021, Ikigo gishinzwe iterambere n’imenyekanisha ry’Imari Rwanda (Rwanda Finance Limited/RFL) n’Ikigo cy’Imari cy’u Bubiligi (BFC) byasinyanye amasezerano y’ubufatanye bugamije gutanga urubuga rw’ubutwererane, gusangira ubunararibonye n’ubundi bumenyi mu nzego z’ibigo bito n’ibiciriritse mu rwego rw’imari bikorera muri diaspora ndetse n’imiyoborere y’ibigo by’imari.

RFL nk’Ikigo gifite mu nshingano kumenyekanisha no guteza imbere Ihuriro Mpuzamahanga ry’Ubukungu rya Kigali (KIFC) ifite inshingano zo kugeza u Rwanda ku ntego yo kuba igicumbi cy’ubutabera mu rwego rw’imari ku mugabane w’Afurika, ndetse n’amavugurura akorerwa mu rwego rw’imari mu gihugu imbere.

Ibigo bitandukanye bya Leta n’iby’abikorera byitezweho gufasha abashoramari b’Ababiligi gusobanukirwa n’amahirwe y’ubucuruzi n’ishoramari biri mu Rwanda ndetse n’ibindi bikorwa byose u Rwanda rufungurira amarembo abanyamahanga bakeneye kuba babibyaza umusaruro mu buryo bumwe cyangwa ubundi.

  • Imvaho Nshya
  • Werurwe 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE