Ibiciro by’ibiribwa byiyongereyeho 29.2% muri Kanama

  • NTAWITONDA JEAN CLAUDE
  • Nzeri 13, 2022
  • Hashize imyaka 2
Image

Imibare mishya yatangajwe n’Ikigo cy’Igihugu cy’Ibarurishamibare mu Rwanda (NISR) igaragaza ko mu kwezi kwa Kanama ibiciro by’ibiribwa byiyongereye ku kigero cya 29.2%, ndetse kugeza magingo aya ibiciro bikaba bikomeje gutumbagira.

Iki cyegeranyo (CPI) gikorwa buri kwezi hashingiwe ku bicuruzwa by’ibiribwa 1,622 mu Mijyi 12 y’u Rwanda.

Icyegerayo cyasohowe mu mpera z’icyumweru gishize, kigaragaza ko ibiciro by’ibinyampeke byiyongereye ku kigero cya 27.9%, iby’inyama byiyongera ku kigero cya 19.4%, mu gihe ibya foromaje n’iby’amagi byiyongereye ku kigero cya 12.6% ugereranyije n’ukwezi kwa Kanama k’umwaka ushize wa 2021..

Ibiciro by’imboga n’imbuto na byo byiyongereye ku kigero cya 35.5%, ibiciro by’ibinyobwa bisembuye n’itabi byiyongera ku kigero cya  10.8%, mu gihe ibinyobwa bidasembuye na byo byongereye ibiciro ku kigero cya 14.5%.

Icyegeranyo cyashyizwe ahagaragara na NISR kigaragaza ko igiciro cy’ibiribwa n’ibinyobwa bidasembuye  cyiyongereyeho 0.3% muri Kanama 2022 ugereranyije na Nyakanga 2022.

Ibiciro mu gihe cy’umwaka wose byiyongereye ku kigero cya 20.4% mu gihe ugereranyije buri kwezi byiyongereye ku kigero cya 1.1%. Ibiciro byo mu mijyi byiyongereye ku kigero cya 15.9% mu gihe cy’umwaka wose hagati ya Kanama 2021 na Kanama 2022, ndetse bizamuka ku kigero cya 0.5% ugereranyije ukwezi kwa Kanama n’ukwa Nyakanga 2022.

Mu bice by’icyaro, ibiciro byiyongereye ku kigero cya 23.6% mu gihe cy’umwaka wose, mu gihe byiyongereyeho 1.6% mu gihe cy’ukwezi. Impuzandengo rusange y’izamuka ry’ibiciro hagati ya Kanama y’umwaka ushize na Kanama y’uyu mwaka ingana na 7.3%.

Mu gihe cy’amezi 12 ashize, ibiciro by’inzu, umuriro, gazi n’ibindi bicanwa byiyongereye ku kigero cya 7.5, ibiciro by’ubwikorezi byiyongera ku kigero cya 12.6%, naho ibya resitora byiyongera ku kigero cya 18.5%.

  • NTAWITONDA JEAN CLAUDE
  • Nzeri 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE