Huye: Hasojwe igikorwa cyo guteza imbere impano z’abakiri bato muri siporo

  • SHEMA IVAN
  • Ukuboza 4, 2023
  • Hashize amezi 3
Image

Minisiteri ya Siporo yasoje igikorwa cyo gushaka no guteza imbere impano z’abakiri bato binyuze mu mushinga wa Isonga Program aho byagaragaye ko mu basiganwa ku magare hakenewe kongerwamo izindi mbaraga.

Kuri iki cyumweru Tariki 3 Ukuboza 2023, ni bwo kuri Stade Mpuzamahanga ya Huye habereye imikino ya nyuma mu mikino itandukanye irimo umupira w’amaguru, Basketball, volleyball, Handball, Amagare n’imikino ngororamubiri.

Aya marushanwa y’abakiri bato yateguwe na Minisiteri ya siporo binyuze mu mushinga Isonga ku bufatanye n’Ikigo Mpuzamahanga cy’Abafaransa gishinzwe iterambere (Agency Francaise de development) “AFD”

Umuyobozi w’Akarere ka Huye, Sebutege Ange, yashimiye Minisiteri ya Siporo yatekereje ko ku nshuro ya mbere “National Talent Day” yahabera kandi agaragaza ko iterambere ry’abana ari iry’igihugu.

Yagize ati: “Twishimiye ko mu Karere kacu ari ho habereye iki gikorwa cyo gushyigikira abana ndetse mukomeza no kuduha ibikorwa remezo bya siporo. Uyu ni umukoro kuri twe wo kwiha intego zo kukagira igicumbi cya siporo. Igikuru gishimishije kandi ni uko abana dushyigikira ari ab’igihugu cyacu”.

Umunyamabanga wa Leta muri Minisiteri ya Siporo Niyonkuru Zephaine yavuze ko bishimiye umusaruro uvuye muri iyi mikino y’abato.

Yagize ati: “Ni irushanwa twabonye riri ku rwego rwiza hari abo twafashe basanzwe bakina n’abandi batakinaga bitewe n’igihagararo, mu bihuruko bishize twabahurije hamwe bakora imyitozo, ni igikorwa twishimiye cyane dufatanyije n’amashyirahamwe y’imikino na Komite Olimpike ku buryo Abana bahize abandi bazakomeza gufashwa kugira ngo bazamure impano zabo mu mikino itandukanye”.

Ibihembo byatanzwe ku begukanye ibikombe

Mu gusiganwa ku maguru abana bo kwa Sina Gerard ni bo bihariye ibihembo. Muri volleyball GS Butare ni yo yegukanye igikombe mu bagabo mu gihe GS St. Aloys yegukanye igikombe mu bagore. Mu mupira w’amaguru, IPM Mukarange yahize ibindi bigo mu bakobwa naho GS Kabare yahize ibindi mu bahungu. Muri basketball college ADEGI  Gituza ni yo yahize indi mu bakobwa mu gihe TTC de la Salle yahize izindi mu bahungu.

Iki gikorwa cyo gusuzuma uko abana bashobora gushyira mu ngiro ubumenyi bahabwa n’abatoza cyahereye mu bigo bya GSO Butare, IPRC Huye, UR, Stade Kamena na Stade Mpuzamahanga ya Huye.

Iyi mikino ya National Talent Day 2023 ibaye ku nshuro ya mbere yitabiriwe n’abana bagera kuri 599 (abahungu 347 n’abakobwa 252) baturutse mu bigo by’amashuri byo hirya no hino mu gihugu.

  • SHEMA IVAN
  • Ukuboza 4, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE