Huye: Gahunda ya Winsiga Ndumva izagera ku bana ibihumbi 9

  • AKIMANA JEAN DE DIEU
  • Ukuboza 8, 2023
  • Hashize amezi 3
Image

Kuri uyu wa 6 Ukuboza 2023 mu Karere ka Huye, mu Ntara y’Amajyepfo mu bitaro bya Kabutare hatangijwe gahunda yiswe “Winsiga Ndumva” izagera kubana kuva ku mwaka 1kugera ku myaka 18 ikazagera ku bana ibihumbi 9 mu turere 8 bazasuzumwa indwara zo mu matwi ndetse hanatangwe utwuma dufasha kumva 1200 ku bana bazasanganwa indwara zo mu matwi.

Umuyobozi mu Kigo cy’Igihugu cy’Ubuzima RBC ushinzwe kurwanya indwara zitandura wari uhagarariye Minisiteri y’Ubuzima, Dr Francois Uwinkindi avuga ko ubu buvuzi bwari buhari ariko butegereye abaturage kuko bwabonekaga mu bitaro bya Kaminuza akavuga ko kugeza ubu izi serivisi zigomba guhera hasi.

Ati: “Twari dusanzwe dufite Gahunda y’ubuvuzi bw’indwara zo mu matwi ariko bugatangirwa ku bitaro bya Kaminuza gusa ariko iyi gahunda izabugeza mu mavuriro yose ndetse tuzaha amahugurwa Abajyanama b’ubuzima kugira ngo badufashe kujya bamenya umwana warwaye ahite avurwa bidatinze.

Iyo utindanye uburwayi burakura kubuvura bigatinda kuko aho twahereye mu tundi Turere hari abana bari baragiye kwiga mu mashuri y’abafite ubumuga bavuwe basubira mu mashuri asanzwe, hari n’abandi bari bararetse kwiga kubera kutumva ubu bavuwe biga neza”.

Akomeza avuga ko iyi gahunda izakorera mu Turere 8 bakazagera ku bana ibihumbi 9 kandi abana basaga 1200 bazahabwa utwuma kandi hatangiye ibiganiro n’Ikigo cy’Ubwitegenyirize mu Rwanda (RSSB) ku buryo ibi bikoresho byakwishyurwa hakoreshejwe ubu bwishingizi ababyeyi bafite.

Yongeyeho ko utu twuma two gufasha abana babo gufashwa kudukoresha neza kuko duhenze bityo bakabasha gutegereza igihe izi nsimburagningo zizaba zishyurwa n’ubwishingizi.

Umuyobozi w’Ubuzima n’imirire muri Unicef -Rwanda, Julia Battle avuga ko uyu mushinga uzamara imyaka 3 ukazarangira muri 2026 ukazafasha abana basaga ibihumbi 9 bavurwa agashimira Leta y’u Rwanda n’abafatanyabikorwa bayo bakomeza gushakira Abanyarwanda ibyababeshaho ntawusigaye inyuma ngo afite ubumuga ahubwo afashwa gukomeza guharanira iterambere kandi ntabwo warigeraho utabashije kumva no kuvuga.

Anibutsa ko muri iyi Gahunda hazahugurwa abantu batandukanye   bazafasha gusuzuma no kuvura ndetse no gutanga inyunganirangingo ku bana nibizagaragara ko bazikeneye.

Abaturage babayakiriye bate?

Bamwe mu baturage baganiriye n’Imvaho Nshya bavuga ko iyi gahunda ije kubasubiriza abana ubuzima kuko nibamara kumva bashobora no kuzavuga kuko bigorana kuva utumva ukanavuga.

Kamberuka Immaculee avuga ko umwana we afite ikibazo cy’ubumuga bukomatanyije akavuga ko afite icyizere ko umwana we yazabasha kuvuga.

Yagize ati: “Ni byo turafashijwe nk’uyu mwana wanjye mureba afite ubumuga bukomatanyije ariko bamusuzumye ku buntu banambwira ko ashobora kuvuga, kuko iyo tuvuze ubona ashaka kuvuga bikanga ariko batubwiye ko adashobora kuvuga atumva ariko baradufashije kandi turabashimira kuko baraduha icyizere ko abana bacu bagiye kuba bazima”.

Ngendahimana Innocent yufite umwana w’imyaka 9 yemeje ko yagize ikibazo cyo mu matwi yiga mu mwaka wa 2 akavuga ko abaganga bamwijeje ko ashobora gukira akumva neza.

Ati: “Njyewe umwana wanjye yiga mu mwaka wa 4 ariko hashize imyaka 2 menye ko umwana wanjye atabasha kumva kuko nageze nubwo njya ku ishuri kubabwira ko yajya yicara imbere kugira ngo abashe kumva, bamusuzumye  bambwira ko hari icyizere cy’uko uyu mwana azavurwa agakira kuko bambwiye ko nibabona akwiye guhabwa inyunganirangingo bazayimuha”.

Mu ibarura rya 5 ryakozwe n’ikigo cy’Igihugu cy’Ibarurishamibare riheruka ryerekenye ko abasaga Miliyoni 11.537.934 bari mu kigero cy’abafite imyaka 5 kuzamura abagera ku bihumbi 391775 bangana na 3,4 % bafite ubumuga bwo mu matwi. Abasaga ibihumbi 281.302 baba mu cyaro bangana na 3,7% bafite u umuga bwo mu matwi.

Ugereranyije n’Abaturage batuye Intara zitandukanye usanga Intara y’Amajyepfo ari iya mbere mu kugira abafite ubumuga bwo mu matwi bagera kuri 3,7% hagakurikiraho Intara y’Iburasirazuba ifite 3,6%, Intara y’Iburengerazuba ikagira 3,5% mu gihe Intara y’Amajyaruguru ifite 3,4 naho Umujyi wa Kigali ufite 2,3%.

Ku Isi habarurwa abasaga miliyoni 190 bafite imyaka 15 kuzamura bafite ubumuga bwo mu matwi naho abangana na miliyoni 465 bangana na 5% bafite ibibazo mu matwi.

Ababyeyi baragirwa inama z’uko abana bitwara mu gihe babahamagaye bashobora gusanga umwana afite ikibazo gikomeye cyo mu matwi kandi gifatiranwe kitarakura yakira.

Muri iyi Gahunda Uturere 8 ni two izakoreramo ikaba yari yaratangiriye mu Turere twa Nyagatare, Nyarugenge, Huye na Nyabihu hakaba hongeweho Muhanga, Rusizi, Rubavu na Rwamagana aho izita ku bana bafite kuva ku mwaka 1 kugera ku myaka 18 y’Ubukure.

  • AKIMANA JEAN DE DIEU
  • Ukuboza 8, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE