Houlin Zhao yanyuzwe n’umudali w’Agaciro yambitswe na Perezida Kagame

  • NTAWITONDA JEAN CLAUDE
  • Kamena 15, 2022
  • Hashize imyaka 2
Image

Ku wa Kabiri taliki ya 14 Kamena, ni bwo Perezida wa Repubulika y’u Rwanda Paul Kagame yambitse umudali w’Agaciro Umunyamabanga Mukuru w’Ikigo Mpuzamahanga cy’Itumanaho (ITU) Houlin Zhao, amushimira uruhare yagize mu guteza imbere ikoranabuhanga mu itumanaho.

Ni umuhango wabereye i Kigali mu gihe hateraniye inama yiga ku iterambere mpuzamahanga ry’ikoranabuhanga (ITU-WTDC) yateguwe na ITU yatangiye taliki ya 6 Kamena 2022 ikazasozwa ku ya 16 Kamena 2022.

Houlin Zhao amaze imyaka igera ku munani ayoboye ITU, Perezida Kagame akaba amushimira ko mu bigwi amaze kubaka mu ruhando mpuzamahanga yagize uruhare rukomeye mu rugendo rw’impinduramatwara y’ubukungu bushingiye ku ikoranabuhanga mu Rwanda.

Umudali w’Agaciro, uhabwa Abakuru b’Ibihugu cyangwa Guverinoma, imiryango mpuzamahanga n’abandi banyacyubahiro bagaragaje ubudashyikirwa mu gikorwa runaka giteza imbere ibyiza rusange, haba mu Rwanda cyangwa hanze yarwo muri politiki, ubukungu cyangwa ubuzima rusange.

Nyuma yo kwambikwa uwo mudali, Houlin Zhao yagize ati: “Nanyuzwe cyane, kandi ndashimira byimazeyo, kubera ishimwe nagenewe na Perezida wa Repubulika y’u Rwanda akaba Umuyobozi w’Icyubahiro muri Afurika n’intangarugero mu guteza imbere ikoranabuhanga mu itumanaho ku Isi.”

Yakomeje agira ati: “Igihe natorerwaga kuba Umunyamabanga Mukuru mu mwaka wa 2014, abagera kuri 1/3 cy’abatuye Isi yose ni bo bari bahujwe n’ikoranabuhanga mu itumanaho. Uyu munsi abagera kuri bibiri bya gatatu ni bo bahujwe n’iryo koranabuhanga, mu gihe kandi hakiri kimwe cya gatatu cy’abantu kitaragerwaho na ryo. Iki gihembo cyihariye mpawe na Perezida Kagame kizakomeza kunyobora no kunkangurira gushakira ibisubizo ingorane zikiri mu iterambere ry’ikoranabuhanga ritagira n’umwe risigaza inyuma.”

Mu gihe arimo kwegereza igihe cyo gusoza manda ya kabiri nk’Umunyamabanga Mukuru wa ITU, Houlin Zhao yaboneyeho gukomoza ku buyobozi bufite icyerekezo bwaranze kandi bukomeje kuranga Perezida Kagame witangiye kugeza u Rwanda ku iterambere rirambye.

Ati: “Ndagira ngo mfate uyu mwanya wo guha icyubahiro Perezida Kagame ku bw’ubuyobozi yimakaza bufite icyerekezo cy’ahazaza hifashisha ikoranabuhanga, ubushobozi bwo kwimakaza ikoranabuhanga  mu guhindura Afurika no koroshya iterambere ry’ikoranabuhanga mu itumanaho ku Isi hose.”

Kugeza iterambere ry’ikoranabuhanga kuri bose ni yo ntego nyamukuru

Mu nama ya ITU-WTDC, Houlin Zhao uri i Kigali yagaragaje ko Isi ikeneye guhurira kuri gahunda z’ingenzi zigamije kwihutisha ikoranabuhanga mu itumanaho, hakimakazwa n’ubufatanye bwa Leta n’abikorera mu gukora ishoramari rigamije kugera ku Ntego z’Iterambere Rirambye (SDGs) zashyizweho n’Umuryango w’Abibumbye.

Zhao yagize ati: “Kurema no kwimakaza umubano wacu mu nzego za Leta n’abikorera ni ingenzi cyane, haba mu kwihutisha ibikorwa byacu bya tekiniki cyangwa gahunda z’iterambere.”

Iyo nama yitabiriwe n’abayobozi, abashakashatsi n’impuguke mu by’ikoranabuhanga baturutse mu bihugu 193 bihuriye mu Muryango w’Abibumbye ari na wo washinze ITU nk’Ishami ryibanda ku iterambere ry’ikoranabuhanga. Muri bo harimo abahagarariye abikorera, ba Minisitiri b’Ikoranabuhanga, abahagarariye urubyiruko n’Intumwa z’Umuryango w’Abibumbye.

Yitezweho gusoza kuri uyu wa Kane taliki 16 Kamena hashyizweho gahunda ihuriweho n’ibihugu igamije kwihutisha umuvuduko wo kugeza ikoranabuhanga ku bantu bose (Kigali Action Plan), by’umwihariko muri ibi bihe Isi ihanganye n’icyorezo cya COVID-19 n’ibindi byorezo bikeneye kwitabwaho mu buryo bwihariye.

Ikindi kintu cy’ingenzi iyo nama ya mbere ibereye muri Afurika kuva ITU yashingwa mu 1992 izafataho umwanzuro, ni inyandiko itanga ishusho yagutse y’ibikorwa by’icyo kigo bigamije guteza imbere ikoranabuhanga n’itumanaho ku Isi mu myaka ine iri imbere.

Iyo nama yabereyemo ibikorwa bitandukanye birimo n’ibiganiro byihariye byahuje abafatanyabikorwa mu ikoranabuhanga, byari bigamije gukusanya inkunga ikenewe mu kwihutisha ikwirakwizwa ry’ikoranabuhanga by’umwihariko mu bihugu bikennye n’ibikiri mu nzira y’amajyambere.

Muri ibyo biganiro byiswe ‘Partner2Connect’, hagaragaye ukwitanga kw’abahagarariye Leta zinyuranye, urwego rw’abikorera na sosiyete sivilli kongereye ubushobozi bwo kwihutisha urugendo rwo kugeza umuyoboro w’ikoranabuhanga kuri benshi bashoboka, cyane cyane mu bihugu bikiri mu nzira y’amajyambere.

U Rwanda rwiyemeje kugeza ikoranabuhanga ritagira n’umwe risigaza inyuma ku bantu batishoboye nno mu bice byasigaye inyuma, hagamijwe kugera ku ntego yo kugeza telefoni zigezweho ku ngo miliyoni 2.8  bitarenze mu 2030.

  • NTAWITONDA JEAN CLAUDE
  • Kamena 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE