Hinga Wunguke na Shora Neza imishinga yitezweho gutanga imirimo ku rubyiruko

  • Imvaho Nshya
  • Nzeri 15, 2023
  • Hashize amezi 6
Image

Kuri uyu wa Kane tariki 14 Nzeri 2023 hasinywe amasezerano agamije guteza imbere ubuhinzi n’ubworozi ndetse no kongera imirimo y’ubuhinzi ikorwa n’urubyiruko.

Urimubenshi Laurent, Umuhuzabikorwa w’Umushinga Shora Neza, yabwiye itangazamakuru ko uyu mushinga uzamara imyaka 5.

Ni umushinga uzatwara ingengo y’imari ya miliyoni 15 z’amadolari y’Amerika, ukazakorera mu Turere 13 tw’Igihugu.

Shora Neza, ni umushinga Ishami ry’Umuryango w’Abibumbye ryita ku biribwa (WFP) ifatanyamo na MasterCard ndetse na Guverinoma y’u Rwanda binyuze muri Minisiteri y’Urubyiruko.

Urimubenshi asobanura ko umushinga ugamije guteza imbere ibikorwa by’ubuhinzi n’ubworozi ariko ngo ikigamijwe ni uko ibyo bikorwa bizamuka bigatanga imirimo myinshi ku rubyiruko.

Yagize ati “Hari igice kinini cy’ubukungu bw’igihugu bufashwe n’ubuhinzi.

Uyu mushinga ugamije guteza imbere ubuhinzi kugira ngo butange imirimo ku rubyiruko ariko cyane cyane hibandwa ku bagore n’abakobwa bakiri batoya”.

Akomeza avuga ko umushinga Hinga Wunguke na wo ukorera mu buhinzi ariko ukibanda ku buryo bwo guteza imbere ubuhinzi binyuze mu bikorera.

Ahamya ko Shora neza na Hinga Wunguke, ubwo bufatanye buzamo.

Ati “Niba Hinga Wunguke hari ibyo irimo gukora mu buhinzi, Shora Neza yo izamo kugira ngo ishyire urubyiruko muri gahunda z’ubuhinzi n’ubworozi”.

Nyirajyambere Jeanne D’Arc, umukozi w’umushinga Hinga Wunguke ushinzwe kugeza abahinzi ku isoko ndetse n’imirire myiza, avuga ko amasezerano yasinywe agamije kongera umubare w’urubyiruko rukora ubuhinzi n’ubworozi.

Biyemeje kugeza umuhinzi ku isoko kugira ngo umusaruro we abashe kuwugezayo.

Yagize ati “Muri iyi myaka 5 tuzafatanya kugira ngo nibura abahinzi miliyoni babashe kugera ku isoko, babone amafaranga, babashe gukora ubuhinzi buvuguruye cyangwa ubucuruzi bushingiye ku buhinzi kandi babashe no guhindura imirire bagire imirire myiza”.

Abahinzi bato bazibandwaho, ni abahinga munsi ya hegitari 5, bazaba bari mu Turere 13 tw’Igihugu by’umwihariko bahinga ibihingwa ngandurarugo.

Ishami ry’Umuryango w’Abibumbye ryita ku biribwa (WFP), mu gihe cy’imyaka 5 kuva mu 2019 kugeza 2024 washyizemo ingengo y’imari ya miliyoni 278.3 z’amadolari y’Amerika mu mishanga 5 itandukanye.

KAYITARE JEAN PAUL

  • Imvaho Nshya
  • Nzeri 15, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE