HHC n’Ikigo cy’Inshuti Zacu baterwa ishema no gusangira iminsi mikuru n’abafite ubumuga

  • Imvaho Nshya
  • Ukuboza 27, 2023
  • Hashize amezi 5
Image

Umuryango Hope and Homes for Children (HHC) ufatanyije n’Ikigo Inshuti Zacu basangiye n’abana bafite ubumuga 93 ndetse n’ababyeyi babo mu rwego rwo kwishimana mu minsi mikuru isoza umwaka.

Ni igikorwa cyabereye mu Murenge wa Gahanga mu Karere ka Kicukiro mu Mujyi wa Kigali, mu mpera z’Icyumweru gishize.

HHC yavafashije gusubiza abana mu miryango muri gahunda ya ‘Tubarerere mu Muryango’ ni mu gihe Ikigo Inshuti zacu cyahoze cyakira kikanacumbikira abana.

Karangwa Vidivi Immaculée, Umuyobozi wungirije w’Umuryango HHC mu Rwanda, agaragaza ko bagira umuco wo gusangira n’abana ibyishimo bya Noheri by’umwihariko mu gihe cy’iminsi mikuru.

Agira ati “Uyu ni umunsi dukunda cyane kuko tuwizihiza turi kumwe n’abana dukunda”.

Ashimira Ababikira kubera ibikorwa bidasanzwe bakora byo kurera abana no kubitaho agahamya ko ari ibikorwa bidakorwa na buri wese.

Ati “Ntibishoborwa na buri wese ariko barabikora, bakabikora batinuba, turabibashimira cyane”.

Sr Mukamazera Francine, Umuyobozi w’Ikigo Inshuti Zacu, avuga ko ikigo abereye umuyobozi gisanzwe ari ikigo gifasha abana bafite ubumuga kandi bagasangira na bo iminsi mikuru.

Agira ati “Nk’umubyeyi mu rugo, mu gihe cy’iminsi mikuru ategura gusangira n’abana, natwe ni muri urwo rwego nk’ababyeyi barera abana dufatanyije na Hope and Homes for Chirldren ndetse n’ababyeyi twatekereje iki gikorwa kugira ngo dusangirire hamwe n’abana ibyishimo muri iki gihe cy’iminsi mikuru”.

Beza Eugene, umukozi w’Akarere ka Kicukiro mu ishami ry’ubuzima n’iterambere ry’imibereho myiza, avuga ko gusangira n’abana iminsi mikuru ari igikorwa gishimisha ubuyobozi bwite bwa Leta.

Ati “Ni igikorwa kigaragaza ko abafite ubumuga badahezwa ndetse batatereranwe”.

Akarere ka Kicukiro gasaba ababyeyi bagiterwa ipfunwe n’abana babo bafite ubumuga ko ibyiza ari ukubagaragaza.

Akomeza agira ati “Ubumuga si icyaha umwana aba yakoze, ni ikintu kigwirira buri wese kandi gikwiye kwitabwaho ariko by’umwihariko umubyeyi wese ufite umwana arakangurirwa kumugeza aho abandi bari kuko hari byinshi bafashwa nko kugororwa ingingo n’ibindi”.

Mu 2018, HHC yatangiye gufasha Akarere ka Kicukiro kubahiriza gahunda ya Leta ‘Tubarerere mu Muryango’ itangirira mu Kigo Inshuti Zacu ndetse no mu Kigo cya Ngarama giherereye mu Karere ka Gatsibo mu Ntara y’Iburasirazuba.

Karangwa Vidivi Immaculée, Umuyobozi wungirije w’Umuryango HHC mu Rwanda
Sr Mukamazera Francine, Umuyobozi w’Ikigo Inshuti Zacu
  • Imvaho Nshya
  • Ukuboza 27, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE