Lt. Col. Munyarugarama wayoboye ubwicanyi bw’i Bugesera muri Jenoside yapfuye mu 2002

  • Imvaho Nshya
  • Gicurasi 18, 2022
  • Hashize imyaka 2
Image

Nyuma ya Protais Mpiranya byamenyekanye ko yaguye muri Zimbabwe mu Mwaka wa 2006, kuri uyu wa Gatatu taliki ya 18 Gicurasi, Ibiro by’Umushinjacyaha w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) byemeje ko Lt. Col. Phénéas Munyarugarama washakishwaga yaguye muri RDC mu 2002 azize urupfu rusanzwe.

Ni umwe mu bantu bahunze ubutabera bari barashiriweho impapuro z’ibirego n’Urukiko Mpuzamahanga Mpanabyaha rw’u Rwanda (ICTR) bamenyekanye cyane muri Jenoside yakorewe Abatutsi mu 1994 na nyuma y’aho, kubera ubwicanyi ndengakamere bwakorewe Abatutsi bo mu Bugesera yayoboye nk’uwari Umuyobozi w’Ikigo cya Gisirikare cya Gako.

Hamwe no kwemeza urupfu rwa Protais Mpiranya ku wa Kane ushize, abantu bane batorotse ubutabera ubu ni bo bagishakishwa n’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) ari bo Fulgence Kayishema, Charles Sikubwabo, Charles Ryandikayo na Aloys Ndimbati.

Nyuma y’iperereza ryimbitse kandi rigoye, Ibiro by’Umushinjacyaha wa IRMCT byashoboye kwemeza ko Munyarugarama yapfuye azize urupfu rusanzwe mu mataliki ya 28 Gashyantare 2002 aguye aho yari atuye i Kankwala, mu Ntara y’Iburasirazuba bwa Repubulika Iharanira Demokarasi ya Congo (DRC), ari na ho yashyinguwe.

Umushinjacyaha mukuru wa IRMCT Serge Brammertz yagize ati: “Iki gisubizo ni iyindi ntambwe y’ingenzi mu bikorwa byacu byo guharanira ubutabera ku bahohotewe na Jenoside yakorewe Abatutsi mu Rwanda no gusohoza inshingano zacu. Ku bahohotewe n’abacitse ku icumu rya Munyarugarama mu Karere ka Bugesera, turizera ko iki gisubizo hari ihumure gitanga.”

Ashimangira nanone ko iki gisubizo gihamya neza uburyo Umuryango w’Abibumbye ukomeje kudacogora mu guhana abakora ibyaha bikomeye cyane birimo n’ibya Jenoside yakorewe Abatutsi mu myaka 28 ishize.

Munyarugarama wari Lt Colonel mu zahoze ati Ingabo z’u Rwanda (FAR), yakorewe impapuro z’ibirego bwa mbere n’Urukiko Mpanabyaha Mpuzamahanga Rwashiriweho u Rwanda ICTR mu 2002 kubera ibyaha yakoze nk’Umuyobozi w’Ikigo cya gisirikare cya Gako mu Karere ka Bugesera, icyo gihe hari muri Perefegitura ya Kigali-Ngali.

Yashinjwaga na ICTR ibyaha umunani birimo itsembabwoko, gushishikariza mu buryo butaziguye no gukangurira rubanda gukora Jenoside, n’ibyaha byibasiye inyokomuntu.

Lt. Col. Munyarugarama bivugwa ko yaba ari we nyirabayazana w’ubwicanyi bwibasiye imbaga, ibitero, n’ihohoterwa rishingiye ku gitsina ryakorewe abaturage b’Abatutsi ahantu hatandukanye mu Karere ka Bugesera, harimo n’ibitero byibasiye impunzi z’Abatutsi kuri kiliziya Gatolika ya Ntarama n’iya Nyamata.

Muri Kamena 1994, Munyarugarama n’umuryango we bahunze u Rwanda berekeza Zayire, bidatinze yinjira mu ngabo zahoze ari FAR zishyiraga hamwe muri icyo gihugu kugira ngo zikomeze kurwanya Guverinoma y’u Rwanda na nyuma ya Jenoside.

Uruhare rwe rugaragara mu kwinjiza no guhugura ingabo zahoze muri FAR, byanashimangiwe no kuba yarabaye “Komiseri w’Ingabo” w’umutwe w’abaharanira kubohora u Rwanda (People in Action for the Liberation of Rwanda -PALIR), wabanjirije umutwe wa FDLR, ari wo waje kuba ihuriro ry’abahoze muri FAR n’indi mitwe igizwe n’impunzi z’Abahutu.

Umushinjacyaha mukuru wa IRMCT Serge Brammertz yakomeje ashimira abafatanyabikorwa batandukanye ba IRMCT, harimo inzego zitandukanye z’u Bubiligi n’u Rwanda, ubufasha bataze batizigama bwagize uruhare runini muri iri perereza.

Mu gihe imanza enye z’abatorotse ubutabera zarangijwe mu myaka ibiri ishize, Ibiro byanjye ubu byibanze cyane kubashakishwa bane ba nyuma basigaye batarafatwa. Uwa mbere muri abo ni Fulgence Kayishema, hamenyekanye amakuru y’uko yaba ari muri Afurika y’Epfo.

  • Imvaho Nshya
  • Gicurasi 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE