Imyiteguro irarimbanyije y’igitaramo kizabera mu Mujyi wa Kigali cyigamije kwiyibutsa imiziki yo mu myaka yo hambere cyiswe ‘Oldies Music Festival’, kikazacurangwamo imiziki yo mu myaka yo kuva mu 1980 kugeza mu 2000.
Iki gitaramo byatangajwe ko kizaba ku wa 27 Gicurasi 2022, cyakumiriwemo abatarageza imyaka 18 byitezwe ko kizagaragaramo aba DJ bakanyujijeho mu myaka yo hambere.
Umwe mu bari gutegura iki gitaramo Basile Uwimana, yavuze ko batekereje iki gitaramo mu rwego rwo kwiyibutsa ibihe byiza abakuze banyuzemo mu miziki yakanyujijeho yo mu myaka yo hambere.
Ati: “Ni igitaramo kizacurangwamo indirimbo zo guhera mu 2000 kugeza mu myaka ya 1980. Turifuza gusubiza abantu mu myaka yo hambere bakiyibutsa ibihe bagize. Tuzaba dufite aba DJs b’Abanyarwanda bacurangaga muri iyo myaka bazaba basusurutsa abakunzi b’umuziki n’aba MCs bari basanzwe bakora muri iyo myaka.”
Uyu mugabo yavuze ko abazitabira iki gitaramo bazasabwa kwambara imyambaro yo mu myaka yabo ku buryo bizaba ari ibirori byo kwiyibutsa ahahise.
Basile yakomeje avuga ko bahisemo kukirekera abantu bakuru gusa kugira ngo biyibutse ibihe bya kera, ari cyo cyatumye bakumira mo abari munsi y’imyaka 18 batazemerwa kucyitabira.
Ati: “Abari munsi y’imyaka 18 twahisemo kubareka, ni igitaramo twahariye abantu bakuru gusa, abakiri bato bazatwihanganire turashaka ko abazacyitabira bazaba biyibutsa ibihe byabo. Urumva rero ko abana batazibonamo.”
Uwimana yavuze kandi ko kimwe mu biteganyijwe harimo kuzahemba abazaseruka barimbye kurusha abandi.
Nubwo hatahise hatangazwa aho kizabera, Basile yavuze ko hagomba kuzaba ari ahantu h’amateka benshi basohokeraga mu myaka yo hambere ku buryo kuhasubira na byo ubwabyo bizaba bifite kinini bisobanuye.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE