Hatangiye gushaka abafite imishinga igeza u Rwanda ku Cyerekezo 2050

  • NTAWITONDA JEAN CLAUDE
  • Gashyantare 15, 2024
  • Hashize amezi 2
Image

Ubuyobozi bw’Urwego rw’Iterambere mu Rwanda (RDB) bufatanyije n’Ikigo Mpuzamahanga PEMANDU Associates byatangiye gushakisha abafite imishinga yihutisha urugendo rw’u Rwanda rwo kugera ku Cyerekezo 2050.

Icyerekezo 2050 ni gahunda y’Igihugu y’iterambere yatangijwe na Perezida wa Repubulika y’u Rwanda Paul Kagame na Minisiteri w’Imari n’Igenamigambi (MINECOFIN) mu kwezi k’Ukuboza 2020, nk’icyerekezo cy’Igihugu cy’imyaka 30 iri imbere.

Perezida Kagame atangiza Icyerekezo 2050, yagize ati: “Ntidushaka kuba Igihugu cyangwa abantu bahora hamwe. Icyerekezo 2020 cyarebaga ibyo twagombaga gukora ngo tubeho ndetse ngo twongere kugarura agaciro kacu. Ariko icyerekezo 2050 kigomba kuba ahazaza twifuza, kubera ko twabishobora kandi bidukwiriye.”

Yakomeje avuga ko Abanyarwanda badakwiriye kunyurwa no kubaho ubuzima budafite intego, badashobora kubaka ubukungu no kugera ku mutekano urambye mu by’imari.

Ku wa Gatatu, ni bwo RDB na PEMANDU Associates batangije umushinga wiswe “Inspiring Rwanda’s Private Sector Innovation: Call for Project Ideas”, ugamije gukusanya no guteza imbere imishinga y’udushya minini, ikomeye kandi ihindura ubuzima ndetse ireba kure, hagamijwe kwihutisha iterambere riyobowe n’abikorera rigeza u Rwanda mu Cyerekezo 2050.

Abanyarwanda bose, abafatanyabikorwa n’inshuti z’u Rwanda harimo n’abakora mu nzego za Leta, impuguke, ababa muri Diaspora n’abayobora inzego z’abikorera, basabwe gutangira gutanga imishinga yabo nk’umusanzu batanga mu iterambere ry’u Rwanda.

Biteganyijwe ko nyuma y’aho RDB na PEMANDU bizakoresha uburyo bugezweho mu gutoranya ibitekerezo bihiga ibindi, maze imishinga itoranyijwe igakomeze kuyinoza no kurushaho kuyinonosora.

Ibyo bizakorwa binyuze mu busesenguzi buzakorwa n’impuguke zishingiye ku bipimo bigezweho ku rwego mpuzamahanga n’ubushakashatsi bukorwa ku isoko n’isesengura ryimbitse ry’ibitekerezo byatanzwe.

Buri gikorwa kizafasha mu kurushaho guhuza imikoranire y’abagize Guverinoma, abafatanyabikorwa mu iterambere, abayobozi b’inzego za Leta n’iz’abikorera, impuguke, abashoramari n’abatanga ibitekerezo byongerera agaciro ibyo bitekerezo bikavamo ibyatangwa mu bashoramari bakabigura.

Umuyobozi Mukuru wa RDB Francis Gatare, yagize ati: “Urwego rw’abikorera rugira uruhare rw’ingenzi mu iterambere ry’ubukungu, bityo binyuze mu kubongerera ubushobozi no gushyigikira Politiki ziborohereza, urwo rwego rumaze kugirirwa icyizere nk’urushyigikiye iterambere ryihuse kandi rirambye mu Rwanda.”

Guhamagarira abafite imishinga y’ibitekerezo ni ingenzi mu gutangiza imishinga ifite icyerekezo kiyobora iterambere ry’ubukungu kikarigeza ku rwego rushya, kwagura inzego zicyiyubaka ndetse no kurushaho kongera ubukungu bw’u Rwanda kurusha uko byahoze.”

Yakomeje ashimangira ko gukora ubucuruzi mu Rwanda nk’igihugu kiri mu mutima w’Afurika nta kabuza bizarushaho gufungura amahirwe mashya y’ahazaza ku Rwanda no kuri Afurika muri rusange.

Umuyobozi wa PEMANDU Associates Aida Azmi, yavuze ko u Rwanda rukomeje guharanira kubaka ubukungu bushingiye ku guhanga ibishya, kongera ibikorwa bibwongerera agaciro, byose biyobowe n’Urwego rw’Abikorera.

Yavuze ko u Rwanda ruri mu nzira nziza yo gukoresha ubushobozi bwarwo bwose mu kugera ku iterambere rirambye, ati: “Ubu buryo bwakoreshejwe mu rugendo rw’iterambere rya Malaysia butuma Urwego rw’Abikorera rwongera ishoramari riva kuri 45% mu 2010 rigera kuri 80% uyu munsi.”

Yashimangiye ko PEMANDU Associates itewe ishema no kuzana mu Rwanda ubunararibonye bw’ibyakozwe bigatanga umusaruro muri Malaysia no mu bindi bihugu 29.

Ati: “Uyu munsi dukomeje guterwa ishema no kuba umufatanyabikorwa wa Guverinoma y’u Rwanda kandi twizeye ko uku guhamagara abafite ibitekerezo kuzafasha mu guhindura icyerekezo kizongera uruhare rw’abikorera mu kugera ku Cyerekezo 2050 no ku cyiciro gishya cya Gahunda ya Guverinoma y’imyaka 7 yo kwihutisha iterambere (NST II).”

Yavuze ko biteguye kubyaza umusaruro ibitekerezo bishya n’ubushobozi bw’ubukungu buturuka mu bice bitandukanye by’Afurika, by’umwihariko mu bitekerezo by’Abanyarwanda baba muri Diaspora.

Abantu barasabwa kohereza ibitekerezo n’imishinga yabo bitareze ku ya 21 Gashyantare 2024 saa  tanu n’iminota 59 z’ijoro banyuze kuri iyi Link.

  • NTAWITONDA JEAN CLAUDE
  • Gashyantare 15, 2024
  • Hashize amezi 2
TANGA IGITEKEREZO
Nzacahinyeretse ildephonse says:
Gashyantare 24, 2024 at 9:18 am

Mwiriwe?mbanje kubasuhuza no kubashimira gusa mbabajwe nuko menye amakuru igihe mwatanze cyarangiye ariko mfite umushinga wo kugura imodoka itwara imizigo shaka kujya ngura ibirayi muruhengeri nkabicuruza iburasirazuba kuko nabikoraga nkorera abandi nabuze ubushobozi mwongeye gutanga amahirwe natwe mwazatubwira,Murakoze IMANA ibahe umugisha.

Andika igitekerezo

AMATEGEKO AGENGA IYANDIKA RY'IGITEKEREZO CYAWE