Hatangajwe amafaranga Abanyagatsibo bamaze kwizigamira muri EjoHeza

  • NTAWITONDA JEAN CLAUDE
  • Nyakanga 22, 2022
  • Hashize imyaka 2
Image

Umuyobozi w’Akarere ka Gatsibo wungirije ushinzwe ushinzwe iterambere ry’ubukungu, Sekanyange Jean Leonard, yatangaje ko gahunda ya EjoHeza ari gahuda abaturage ba Gatsibo bitabiriye cyane.

Yasobanuye ko ari gahunda igamije gushishikariza abanyarwanda bose bagifite ubushobozi cyangwa imbaraga zo kwizigamira.

Yabigarutseho mu kiganiro cyatambutse kuri RBA mu gitondo cyo ku wa Kane tariki 21 Nyakanga 2022, aho cyagarukaga kuri gahunda ya EjoHeza mu karere ka Gatsibo.

Sekanyange agaragaza ko mu karere ka Gatsibo abaturage bitabiriye iyi gahunda kandi ko bamaze kwizigamira akabakaba miliyoni 800.

Yagize ati: “Kugeza uyu munsi abaturage bamaze kwizigamira miliyoni 794,440,060. Aya mafaranga yizigamiwe kuva iyi gahunda yatangiraga mu 2018 kugeza mu 2022 muri Nyakanga”.

Akomeza agira ati: “Iyo ugiye kureba ubwizigame, usanga abamaze kwizigama ku makonti ari abantu ibihumbi 94,645”.

Ingamba Akarere gafite mu kongera umubare w’abizigama muri EjoHeza, Sekanyange ashimangira ko ari ukongera ubukangurambaga urugo ku rundi bityo buri muturage akamenya gahunda nziza ya EjoHeza kandi agashobora kwizigamira mu mafaranga make abona ku munsi.

Avuga ko hari benshi bamaze kwiyandikisha muri gahunda yo kwizigamira by’igihe kirekire ariko badatanga ubwizigame, akavuga ko hazakorwa ubukangurambaga burushijeho.

Amakoperative, abahinzi, ababumba amatafari, abakora mu bucukuzi bw’amabuye y’agaciro, abacuruzi ndetse n’abakozi ba Leta, ubuyobozi bw’Akarere ka Gatsibo buvuga ko aba bose buzakomeza kubashishikariza kwizigamira.

Habarurema Isaie, umuhuzabikorwa wa gahunda ya EjoHeza mu karere ka Gatsibo, asobanura ko mu bihumbi bisaga 90 biri muri gahunda ya EjoHeza, abaturage 87,000 ni bo bizigama.

Akomeza avuga ko abasigaye bafite konti zifunguye ariko zitarajyaho ubwizigame. Kugeza ubu amakoperative ni yo aza ku isonga mu kugira abizigamira muri EjoHeza mu karere ka Gatsibo.

Habarurema yagize ati: “Amakoperative niyo aza ku isonga mu kwizigama mu buryo bufite gahunda.

Niba ari koperative z’ubuhinzi igihe k’isarura barizigama, niba ari ay’ubworozi bagemuye amata usanga hari uko babigenje, niba ari abanyabukorikori bafite uko bihuza, abamotari bitewe nuko babipanze kimwe n’abanyonzi mbese amakoperative niyo aza ku isonga”.

Ashimira amakoperative by’umwihariko ay’abahinzi b’umuceri. Avuga ko COPRORIZ Ntende ubwayo abanyamuryango bayo bamaze kwiziga asaga miliyoni zisaga 100.

Ikindi kiciro kitabira gutanga ubwizigame bwa EjoHeza ni abakozi ba Leta, hagakurikiraho abaturage bibumbiye mu matsinda atandukanye.

Agaragaza ko urubyiruko rumaze kwitabira gahunda ya EjoHeza ari ibihumbi 22 akavuga ko barimo kurushishikariza kwizigama.

Nsanganwa Dodos, Umuhuzabikorwa w’Urubyiruko rw’Abakorerabushake mu karere ka Gatsibo, yemeza ko umubare w’urubyiruko rwizigamira muri EjoHeza ari muke.

Asobanura ko kugira ngo urubyiruko ibihumbi 22 rushobore kwizigamira, urubyiruko rw’abakorerabushake rwabigizemo uruhare mu gukora ubukangurambaga.

Ati: “Urubyiruko rw’abakorerabushake rwabigizemo uruhare mu gukora ubukangurambaga inzu ku yindi, na twe ubwacu twihereyeho nk’urubyiruko rw’abakorerabushake tubanza kwinjiramo kugira ngo twigishe urubyiruko ari nako turuha urugero”.

  • NTAWITONDA JEAN CLAUDE
  • Nyakanga 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE