Hari urubyiruko rutariyumvamo gahunda ya Ndi Ubunyarwanda

  • Imvaho Nshya
  • Ukwakira 30, 2023
  • Hashize amezi 4
Image

Umuyobozi ushinzwe Abanyarwanda baba mu mahanga muri Minisiteri y’Ububanyi n’amahanga, Maziyateke Sandrine yagaragaje ko kuba hari bamwe mu rubyiruko batariyumvamo gahunda ya Ndi Umunyarwanda ari kimwe mu bibazo bikibangamiye ubumwe n’ubudaheranwa bw’Abanyarwanda.

Byagarutsweho mu biganiro byabereye mu Ihuriro rya 16 ry’Umuryango Unity Club Intwararumuri kuri iki Cyumweru tariki ya 29 Ukwakira 2023.

Urubyiruko rwasabwe kuba umusemburo mu gushimangira gahunda y’ubumwe n’ubudaheranwa bakirinda ingengabitekerezo ya Jenoside ikomeje gukwirakwizwa ku mbuga nkoranyamabaga no mu miryango itandukanye igifite iyi myumvire yo kwibonamo amoko.

Ndi Umunyarwanda Ingabo n’Urukingo ni cyo cyari ikiganiro cyarebaga urubyiruko muri iri huriro rya 16 ry’Umuryango Unity Club Intwararumuri.

Urubyiruko rwagaragarijwe ko gahunda ya Ndi Umunyarwanda ari inkingi yo kubaka igihugu no gusigasira ubumwe bw’Abanyarwanda.

Maziyateke yagaragaje ko hakiri urubyiruko rutarasobanukirwa n’inyungu zo kuba Umunyarwanda n’ubwo ari bake.

Ati: “Hari urubyiruko na rwo rufite ikibazo cy’ihungabana mu mateka twanyuzemo, ruhungira kure Ndi Umunyarwanda mbese n’abumva ko badashaka kuba Abanyarwanda, banavuga indimi z’amahanga bafite inzozi mu mutwe ko bazaba mu mahanga”.

Sandrine Maziyateke,

Yanavuze ko hari n’abandi Banyarwanda b’urubyiruko ari na bo benshi bamaze gusobanukirwa ko Ndi Umunyarwanda ari gahunda yomora ibikomere. 

Umuhuzabikorwa w’Umuryango w’Abanyeshuri barokotse Jenoside yakorewe Abatutsi (AERG), Mudahemuka Audace we yagaragaje ko n’ubwo hari intambwe imaze guterwa  muri gahunda y’ubumwe n’ubudaheranwa, bamwe mu rubyiruko rwiganjemo abavutse nyuma ya Jenoside yakorewe Abatutsi 1994, rugifite imyumvire y’ingengabitekerezo ya Jenoside rukomora cyane ku mbuga nkoranyambaga.

Ati: “Urubyiruko rukoresha cyane Imbuga nkoranyambaga kandi n’ababiba ingengabitekerezo ya  Jenoside, aho ni ho babinyuza mu buryo buboroheye ni ku mbuga nkoranyambaga, rero ugasanga bibangamira ubumwe n’ubudaheranwa muri rwa rubyiruko”.

Mudahemuka kandi yanavuze ko ubumwe n’ubudaheranwa mu rubyiruko rw’u Rwanda bukibangamiwe n’ingebabitekerezo y’uruhererekane  rwa bamwe  mu babyeyi bakibwira abana babo kwibona mu by’amoko.

Umuhanzi Andy Bumuntu we yagaragaje ko icyerekezo cy’urubyiruko rwifuzwa ari urutarangwa n’amacakubiri.

Muri iri huriro rya 16 ry’Umuryango Unity Club Intwararumuri urubyiruko rwasabwe gukoresha imbuga nkoranyambaga ruhangana n’abazifashisha bakwirakwiza ingengabitekerezo ya Jenoside.

ZIGAMA THEONESTE

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE