Handball: U Rwanda rwatsinzwe umukino wa kabiri mu gikombe cy’Afurika

  • SHEMA IVAN
  • Mutarama 19, 2024
  • Hashize amezi 4
Image

Ikipe y’Igihugu y’Abagabo mu mukino wa Handball yatsinzwe na Repubulika iharanira Demokarasi ya Congo RDC, ibitego 38-20, itakaza umukino wa kabiri yikurikiranyije mu mikino y’igikombe cy’Afurika kiri kubera mu Misiri. 

Uyu mukino wabaye kuri uyu wa Gatanu, tariki 19 Mutarama 2024, muri Cairo Stadium (Main Hall).

Abasore b’u Rwanda batangiye neza umukino batsinda ibitego bine DRC itarareba mu izamu.

DRC yaje kugaruka mu mukino itsinda ibitego 5 kuri kimwe cy’u Rwanda.

DRC yakomejwe kurusha u Rwanda bigeraho ishyiramo ikinyuranyo cy’ibitego 7.

Igice cya mbere cyarangiye U Rwanda rutsinzwe na Repubulika iharanira Demokarasi ya Congo ibitego 18-11.

Mu gice cya kabiri DRC yakomeje kurusha cyane abasore b’u Rwanda ari na ko bakomeza kongera ibitego ishyiramo ikinyuranyo cy’ibitego 15.

Muri iki gice u Rwanda rwatsinze ibitego 9 gusa mu gihe DRC yatsinze ibitego 20.

Umukino warangiye u Rwanda rutsinzwe na DRC umukino wa kabiri mu gikombe cyAfurika ibitego 38-20 rutakaza amahirwe yo kugera muri 1/4.

Umutoza Wungirije w’Ikipe y’u Rwanda, Bagirishya Anaclet, yavuze ko bahuye n’umukino ukomeye ariko hari icyizere cyo kwitwara neza mu mikino isigaye.

Ati: “Ntabwo twishimye kuko twifuzaga gutsinda uyu mukino kuko n’uwa mbere twawubuze. Abakinnyi binjiye mu mukino neza ariko RDC yari ifite abakinnyi bakomeye bakina hanze y’igihugu i Burayi. Turaguma mu irushanwa kuko dufite Zambia ariko ndizera ko tuzarangiza turi aba gatatu.”

U Rwanda ruzagaruka mu kibuga ku cyumweru, tariki 21 Mutarama 2024 rukina na Zambia umukino wa gatatu w’amatsinda saa munani ku isaha ya Kigali.

Muri iri tsinda rya kabiri Cape Vert yatsinze u Rwanda umukino ubanza irakina na Zambia umukino uteganyijwe saa kumi ku isaha ya Kigali.

Aya makipe uko ari abiri (u Rwanda na Zambia) akaba agomba guhura n’andi makipe 6 yo mu yandi matsinda atarabashije kugera muri 1/4 akine mu irushanwa ryitwa “President Cup”, rikinwa n’amakipe atarabashije kurenga amatsinda.

Ni ku nshuro ya 26 Igikombe cy’Afurika gikinwe, bikaba iya mbere u Rwanda rucyitabiriye.

Iki gikombe cy’Afurika cyatangiye ku wa 17 Mutarama kizasozwa tariki 27 Mutarama 2024.

  • SHEMA IVAN
  • Mutarama 19, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE