Handball: Ikipe y’igihugu yatangiye nabi igikombe cy’Afurika

  • SHEMA IVAN
  • Mutarama 17, 2024
  • Hashize amezi 4
Image

Ikipe y’igihugu y’Abagabo mu mukino wa Handball yatangiye nabi imikino y’igikombe cy’Afurika kiri kubera mu Misiri itsindwa na Cap-Vert ibitego 52-27.

Uyu mukino wabaye kuri uyu wa Gatatu, tariki 17 Mutarama 2024, muri Cairo Stadium (Main Hall).

Abasore b’u Rwanda batangiye umukino nabi bakora amakosa menshi mu bwugarizi, umunyezamu Uwayezu Arsene yagerageje kwitwara neza aho mu minota 10 ya mbere yakuyemo imipira 4 ikomeye cyane.

Gusa ntibyabujije ko Cap- Vert ikomeza kuyobora umukino aho ku munota wa 15 yari ifite ibitego 14-6.

Ku munota wa 16, Cap- Vert yaje kumara iminota 2 bakina batuzuye nyuma y’uko umukinnyi wayo ahanwe kubera gukinira nabi Yves Umuhire. Iyi minota u Rwanda rwayibyaje umusaruro rwatsinzemo ibitego 3, Cap Vert nta na kimwe.

Nyuma yaho Cap-Vert yongera kurusha u Rwanda itangira gutsinda ibitego kugera aho bashyiragamo ikinyuranyo cy’arenga icumi.

Igice cya mbere cyarangiye U Rwanda rutsinzwe na Cap-vert ibitego 24-13.

Mu gice cya kabiri Cap-vert yakomeje kurusha cyane abasore b’u Rwanda ari na ko bakomeza kongera ibitego.

Ku munota wa 20 w’igice cya kabiri, u Rwanda rwaje gutakaza umunyezamu Uwayezu Arsene waje guhabwa ikarita itukura ku ikosa yakoreye umukinnyi wa Cap- Vert.

Muri iki gice cya kabiri, u Rwanda rwatsinze ibitego 14 gusa, mu gihe Cap-Vert yatsinze ibitego 28.

Umukino warangiye u Rwanda rutsinzwe na Cap-Vert umukino wa mbere mu gikombe cy’Afurika ibitego 52-27.

Umutoza Wungirije w’Ikipe y’Igihugu ya Handball, Bagirishya Anaclet, yavuze ko impamvu batakaje umukino ari uko batugariye neza.

Yagize ati: ‘’Uko twabitekerezaga si ko byagenze hari uburyo bwacu butakoze cyane, ubwugarizi ntabwo byakunze kumvikana ku buryo bwo kugarira cyane cyane, Cap Vert nayo yaje yahinduye uburyo bw’imikinire, ikindi n’abakinnyi bafite imbaraga byatugoye cyane ndibaza ko tugiye kubikosora’’

Abajijwe ku mukino wa kabiri bafitanye na Repubulika iharanira Demokarasi ya Congo, yavuze ko bagiye kureba imikinire yayo kugira ngo bazitware neza.

Ati: “Twagize umwanya wo kureba imikinire ya Congo irimo gukina na Zambia navuga ko tugiye gutegura uyu mukino mu buryo bwihariye bijyanye n’uburyo ikina.  Ikindi ni uguha icyizere abakinnyi kubera ko ni bwo tukinjira mu irushanwa umukino wacu wa mbere turawutakaje, ariko ntabwo iri rushwanwa rirarangira tugiye kongera kuganira na bo tubereke ko dushobora gukina na RDC tukayitsinda, n’ubwo dutakaje umukino umukino wa mbere ndizerera ko hari ibyiza tugiye gukora bitandukanye n’ibyagaragaye uyu munsi’’.

U Rwanda ruzagaruka mu kibuga ku wa Gatanu, tariki 19 Mutarama 2024 rukina na Repubulika iharanira Demorasi ya Congo saa munani ku isaha ya Kigali.

Muri iri tsinda rya kabiri umukino wabanje Repubulika iharanira Demorasi ya Congo yatsinze Zambia ibitego 40-21.

Ni ku nshuro ya 26 Igikombe cy’Afurika gikinwe, bikaba iya mbere u Rwanda rucyitabiriye.

Iki gikombe Cy’Afurika cyatangiye uyu munsi tariki 17 Mutarama kikazageza  ku ya 27 Mutarama 2024.

  • SHEMA IVAN
  • Mutarama 17, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE