Hamuritswe imbabura zizafasha kurinda ibidukikije

  • NTAWITONDA JEAN CLAUDE
  • Ugushyingo 5, 2022
  • Hashize umwaka 1
Image

Mu rwego rwo kubungabunga ibidukikije hamuritswe imbabura zikoresha inkwi nke bizatuma hagabanuka 80% mu kurinda ibidukikije.

Ibi byagaragajwe ubwo hatahwaga uruganda Safer1 Rwanda Ltd mu cyanya cyahariwe inganda i Masoro, rukaba rukora iziko ryiswe “Save80” rirondereza cyane mu guteka.

Umuhuzabikorwa w’Umuryango Safer 1 Rwanda Ltd, Muhongerwa Christine, yavuze ko bashinze uruganda rukora imbabura za canamake mu kwirinda ko ibice byinshi by’igihugu byahinduka ubutayu.

Ati : “Twasanze mu gihe kizaza tutitonze twaba turi mu butayu ariko ubu nitugabanya ibicanwa aho imbabura izajya ituma dukoresha udukwi duke noneho bidufashe kurengera ibidukikije byacu.”

Umuhuzabikorwa w’Umuryango Safer 1 Rwanda Ltd, Muhongerwa Christine

Yongeyeho ko uruganda rwabo rufite ubushobozi bwo gukora imbabura 500 ku munsi ndetse bihaye intego yo kuzakora izigera ku bihumbi 200 mu myaka ine iri imbere.

Gasangwa Yvan, Umushakashatsi mu kigo cy’amashyamba gikorera muri Minisiteri y’ibidukikije yavuze ko izi mbabura ari igisubizo ku baturage ndetse no kubidukikije muri rusange.

Ati: “Izi mbabura ni nziza cyane kuko zizafasha kurinda no kubungabunga ibidukikije, kuko akenshi abaturage bakoresha amakara ndetse bakanakoresha inkwi, ibintu usanga bituma hatemwa ibiti byinshi, ariko izi mbabura batubwiye  ko zikoresha inkwi nke aho zizarinda 80% by’ibyari bisanzwe bikoreshwa.”

Gasangwa yakomeje avuga ko abagize iki gitekerezo bakoze igikorwa cy’indashyikirwa, kuko mu gihe zizagezwa henshi mu gihugu bizafasha mu kubungabunga amashyamba yasarurwaga  hatwikwa amakara .

Umushakashatsi mu kigo cy’amashyamba gikorera muri Minisiteri y’ibidukikije, Gasangwa Yvan (iburyo)

Umwe mu baturage bakoresha izi mbabura, Uzamukunda Esperance wo mu Karere ka Musanze yavuze ko izi mbabura zamufashije cyane gukoresha inkwi nke ndetse zanarengeye n’amafanga  yakoresha azigura.

Ati: “Izi mbabura zaramfashije kuko naguraga inkwi z’ibihumbi 2 ntizimare n’ukwezi ariko ubu niyo watora udukwi tubiri twagutekera, ikindi byankijije umwiryane iwanjye kuko ubu umugabo igihe cyose yazira n’abana basanga ibiryo bigishyushye.”

Umwe mu baturage bakoresha izi mbabura, Uzamukunda Esperance

Kuri ubu  Leta y’u Rwanda yateganyije miliyari 20 z’amafaranga y’u Rwanda zizakoreshwa mu myaka itanu mu kunganira abaturage kubona amashyiga arondereza ibicanwa mu rwego rwo kubungabunga ibidukikije.

Leta yihaye intego y’uko muri 2024 ingo ibihumbi 500 zizaba zitagikoresha inkwi. Amashuri n’inganda z’icyayi ni hamwe mu hagaragaye ko hakoreshwa inkwi nyinshi mu guteka.

U Rwanda rufite intego yo kugabanya ikoreshwa ry’inkwi n’amakara bikagera kuri 42% bivuye kuri 80% bitarenze 2024 aho kugira ngo bigerweho, Guverinoma y’u Rwanda ibinyujije muri Banki y’Amajyambere y’u Rwanda “BRD” yashyizeho amafaranga asaga miliyari 20 ya nkunganire ku bifuza kugura amashyiga arondereza ibicanwa ndetse n’akoresha Gazi n’amashanyarazi.

Iyi gahunda ya nkunganire ku bifuza ayo mashyiga izamara imyaka itanu ikaba yaratangiye muri 2021 ikazarangira muri 2025 abagera ku bihumbi 500 bunganiwe ku kiguzi cy’ayo mashyiga buri wese azifuza bitewe n’icyiciro abarizwamo.

Ibi byatumye ba rwiyemezamirimo bafata iya mbere mu gushakisha uko bakunganira abaturage kubona amashyiga arondereza ibicanwa mu rwego rwo kubungabunga ibidukikije.

Izi mbabura ziri gukorwa n’uru ruganda rwa Sefar 1 Rwanda Ltd, ruherereye mu cyanya cyahariwe inganda i Masoro imwe ikaba ifite agaciro k’ibihumbi 30 by’amafaranga y’u Rwanda ndetse uyiguze anahabwa amasafuriya abiri afasha ibiryo bimaze gushya kudahora.

  • NTAWITONDA JEAN CLAUDE
  • Ugushyingo 5, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE