Hagiye kumurikwa inkoranyamagambo y’ururimi rw’amarenga Nyarwanda

  • KAYITARE JEAN PAUL
  • Ugushyingo 27, 2023
  • Hashize amezi 3
Image

Inama y’Igihugu y’Abantu bafite Ubumuga (NCPD) yatangaje ko igiye kumurika inkoranyamagambo y’ururimi rw’amarenga Nyarwanda ikazafasha abatazi urwo rurimi ndetse n’abantu bafite ubumuga bwo kutumva no kuvuga.

Byagarutsweho n’Umunyamabanga Nshingwabikorwa wa NCPD, Ndayisaba Emmanuel, mu kiganiro n’abanyamakuru ku gicamunsi cyo kuri uyu wa Mbere tariki 27 Ugushyingo 2023, ubwo hatangizwaga ku mugaragaro icyumweru cyahariwe abantu bafite ubumuga.

Ni mu rwego rwo kwitegura Umunsi Mpuzamahanga w’abantu bafite ubumuga wizihizwa tariki 03 Ukuboza buri mwaka, ukazabera mu Karere ka Ngoma mu Ntara y’Iburasirazuba.

Insanganyamatsiko y’uyu mwaka igira iti ‘Dufatanye n’Abantu bafite ubumuga, tugere ku ntego zirambye’.

Ndayisaba agira ati “Uyu munsi mpuzamahanga w’abantu bafite ubumuga, uzarangwa no kumurika inkoranyamambo y’Ururimi rw’amarenga Nyarwanda.

Kumurika inkoranyamagambo y’ururimi rw’amarenga, biri mu rwego rwo gukemura Ikibazo cy’abantu bafite ubumuga bwo kutumva no kuvuga”.

Mu cyumweru cyahariwe abantu bafite ubumuga, hazatangwa insimburangingo n’inyunganirangingo.

Mu bindi bikorwa bizakorwa, NCPD yavuze ko hatangwa serivisi zo kwita ku batishoboye nko kubaremera amacumbi n’ibindi bigamije guteza imbere abantu bafite ubumuga.

Byitezwe ko hazatangwa inkoni zera, hagenzurwe inyubako zikorerwamo imikino n’imyidagaduro niba zorohereza abantu bafite ubumuga.

NCPD yishimira ko Siporo mu bantu bafite ubumuga imaze gutera imbere bityo uru rwego rukaba rumaze kugera ahantu hashimishije.

Ubuyobozi bw’Inama y’Igihugu y’abantu bafite ubumuga bwanagaragaje ko gushyira ubushobozi mu bantu bafite ubumuga, atari uguta igihe kuko na bo barabigaragaza.

Ku rundi ruhande, NCPD ivuga ko guheza abantu bafite ubumuga bigomba kuvaho burundu.

  • KAYITARE JEAN PAUL
  • Ugushyingo 27, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE