Hagiye gutangira icyiciro cya Kane cya ArtRwanda-Ubuhanzi 

Itsinda risanzwe ritegura amarushanwa ya ArtRwanda-Ubuhanzi, agamije gushakisha no guteza imbere urubyiruko rw’Abanyarwanda rufite impano mu by’ubuhanzi, ryatangaje ko hagiye gutangira icyiciro cya kane cy’aya marushanwa.

ArtRwanda-Ubuhanzi ni gahunda y’igihugu yatangijwe mu 2018, ishyirwa mu bikorwa na Imbuto Foundation ku bufatanye na Minisiteri y’Urubyiruko n’Umuco, igamije gushakisha, kuzamura no guteza imbere urubyiruko rufite impano mu nganda ndangamuco n’imyidagaduro.

Ubuyobozi bwa ArtRwanda-Ubuhanzi bugaragaza ko iyi gahunda igamije kumenya urubyiruko rufite impano mu by’ubuhanzi, kurushyigikira no kurufasha kuziteza imbere.

Amakuru y’itangira ry’icyiciro cya kane yatangajwe ku mugoroba wo ku wa 11 Kanama 2026, binyuze mu nteguza yasangijwe abakurikira imbuga nkoranyambaga za ArtRwanda-Ubuhanzi, aho urubyiruko rufite impano rwashishikarijwe gukomeza gukurikirana amakuru ajyanye n’aya marushanwa.

ArtRwanda-Ubuhanzi yanditse iti: “Amarushanwa ya ArtRwanda-Ubuhanzi icyiciro cya 4 yagarutse, mu rugendo rugamije gushaka impano mu byiciro bitandukanye. Kuri iyi nshuro, aya marushanwa azibanda ku guteza imbere impano n’ibihangano bishingiye ku murage Nyarwanda ndetse biteza imbere umuco Nyarwanda.”

Mu butumwa bwatanzwe, abifuza kwitabira aya marushanwa bibukijwe gukomeza gukurikira imbuga nkoranyambaga za ArtRwanda-Ubuhanzi kugira ngo babone amakuru yose ajyanye n’imigendekere yayo ndetse n’igihe cyo kwiyandikisha.

Bagize bati: “Komeza udukurikire kuri buri makuru yose tuzatangaza, uzamenya icyo ububiko bwa Art Rwanda Ubuhanzi y’uyu mwaka bugufitiye.”

Ibyiciro bizahatana

Mu marushanwa ya ArtRwanda-Ubuhanzi hakorwa ijonjora mu byiciro bitandukanye by’ubuhanzi, birimo umuziki n’imbyino, imideli, ikinamico n’urwenya, gufata amashusho na filimi, gufotora, ubuvanganzo n’ubusizi, ubugeni no gushushanya ndetse n’ubugeni bukoresha ikoranabuhanga.

Nubwo hatangajwe integuza y’icyiciro cya kane, itariki amajonjora ya mbere azatangiriraho ntiratangazwa. Abategura aya marushanwa bavuze ko amakuru arambuye, arimo amatariki n’aho amajonjora azabera mu Ntara zitandukanye z’Igihugu, azatangazwa mu minsi iri imbere.

Kuva mu 2018, ArtRwanda-Ubuhanzi imaze guha urubyiruko amahirwe yo guteza imbere impano zarwo binyuze mu marushanwa, amahugurwa, ubujyanama no kuruhuza n’amasoko y’ibihangano.

Amakuru ari ku rubuga rwa ArtRwanda-Ubuhanzi agaragaza ko mu byiciro bitatu byabanje, abahanzi 174 batoranyijwe mu rubyiruko rusaga 7,000 rwari rwasabye kwitabira iyi gahunda.