Gutera imyaka utarimye ubutaka byatangiye gutanga umusaruro mu Rwanda

  • Imvaho Nshya
  • Ugushyingo 3, 2023
  • Hashize amezi 4
Image

Uburyo bwo gutera imyaka mu butaka butarimye, bwagaragaje ko ari bwo buryo bwiza bwo kubungabunga ubutaka ndetse bukaba bugira uruhare mu kuzamura umusaruro nk’uko byemezwa na bamwe mu batangiye kubukoresha mu Rwanda.

Umuhinzi Hakiza wo mu Karere ka Bugesera watangiye gukoresha ubwo buryo, yatangaje ko iyo agereranyije n’ibihingwa ahinga mu buryo busanzwe abona hari itandukaniro no gutera imbuto atabanje kurima.

Hakiza avuga ko uhinze muri ubwo buryo abanza guharura agasasira ibyatsi yaharuye hejuru, bya byatsi bikamubera ifumbire. Ibyo ngo bituma amafaranga yakoreshwaga ku ifumbire no ku bakozi agabanyuka ndetse n’amazi yose akaguma mu butaka.

Yongeraho ko ubwo buryo bwanatumye yongera umusaruro, ati: “Ubusanzwe umuntu yarimye kuri hegitari abonamo toni 4 kugeza kuri 4,2 ariko hakoreshejwe ubu buryo bwo kubungabunga ubutaka umuhinzi ageza no kuri hegitari 6. Aha ngaha ntarimye urabona ko ibihingwa bisa neza. Impamvu ni uko nshukura aho ntera urubuto ngashyiramo n’ifumbire, bitandukanye no kuyinyanyagiza mu murima uhinze, usanga iba idahagije”.

Dr. Magnifique Ndambe Nzaramba, Umuyobozi Mukuru wungirije ushinzwe Ubushakashatsi n’Iyamamazabuhizi n’ubworozi muri RICA (Rwanda Institute for Conservation Agriculture), asobanura ko ubuhinzi bubungabunga ubutaka ari ubufata neza ubutaka, buzirikana ko burimo ibinyabuzima bigomba kubungabungwa no kubufasha kugumana uburumbuke.

Yagize ati: “Imikorere itabungabunga ubutaka bukagunduka ukabukoresha nabi, ituma butakaza umwimerere n’ubusanzwe atari bwiza urabubungabunga ukabwongerera uburumbuke”.

Dr Nzaramba yakomeje agaragaza ko ubuhinzi gakondo bwakorwaga butitaye ku kubungabunga ubutaka.

Ati: “Ubuhinzi busanzwe hari ubwo butatumaga habungabungwa ubutaka uko bikwiye. Uko tugira ubumenyi bwisumbuyeho, tugenda twongera uko dukora ubushakashatsi, tugenda tumenya ibindi byiza tukamenya ibyagunduraga ubutaka.”

Shyirambere Oswald, Inzobere mu buhinzi mu Kigo cy’Igihugu gishinzwe guteza imbere Ubuhinzi n’Ubworozi (RAB), na we ashimangira ko ubuhinzi gakondo butabungabunga ubutaka.

Yagize ati: “Ubuhinzi gakondo hari ingaruka bwagize, tumenyereye ko guhinga ari ugufata isuka tukarima, tugatabira, tugasanza neza ubutaka tugatera, ariko bigira ingaruka nyinshi ubutaka uba wabutandukanyije isuri ikabutwara ku buryo bworoshye”.

Inzobere mu buhinzi Shyirambere yasobanuye inyungu yo guhinga habungabungwa ubutaka harimo kuba guharura bitwara imibyizi mike.

Yagize ati: “Kurima bitwara imibyizi myinshi kuko haba gusubiramo gucoca, gusanza no gutera. Iyo waharuye, ibyari igikorera kigahinduka ikigunda iyo usasiye bituma ibyatsi bitameramo, nta mpamvu yo kurima, inama tubaha ni uguharura no gukura ibyatsi byaje mu myaka bitarazana umurama.

Gusimburanya ibihingwa gusasira bya bigori, ugasimburanya imbuto, soya, Ibigori byaba na ngombwa hagakoreshwa imiti irwanya ibyonnyi tuzirikana kongera umusaruro”.

Izi mpuguke zagarutse ku buryo ubutaka bushobora kubungabungwa kandi bugakoreshwa mu buryo butanga umusaruro.

Bumwe muri ubwo buryo bwasobanuwe harimo guhinga ubutaka budateragurwa hejuru kuko uko busatagurwa bituma amazi yari aburimo akamurwa n’izuba, ndetse no kuba budafatanye isuri ikaba yabutwara byoroshye ikanatembana na ya myunyungugu.

Hari uburyo bwo guhinga ibinyamisogwe n’ibinyampeke, abahinzi birinda kurima ubutaka ngo bageze isuka hasi, ubundi bagasasira.

Mu gukemura iki kibazo hatangijwe imirima y’icyitegererezo (ikorerwamo igerageza) mu Murenge 2 muri buri Karere, aho umuhinzi ashyira imbuto mu butaka ariko atabanje kubuhinga kandi bitanga umusaruro.

Ntabwo iyi gahunda ivanaho ibikorwa ahubwo aho kurima ubutaka buraharurwa, bugafumbirwa noneho umuhinzi acukuza agati agashyiramo ifumbire nyuma agateramo urubuto, akuhira noneho akongera agasasira.

Dr Nzaramba yavuze ko abahinzi batekereza ko kurima ari ukugira ngo ubutaka buhore baba bibeshya kuko baba babutegeje izuba, n’ubuhehere bwarimo bugakamuka.

Ati: “Guhoza ubutaka mu by’ukuri iyo ubuhinze ni bwo ubushyushya naho iyo budahinzwe ubuhehere buba buri munsi bugumamo. Bya bikenyeri n’ibigorigori ahubwo byaguma hejuru iyo ibikenyeri ubitwikirije hejuru bibungabunga bwa buhehere bukaguma mu butaka. Ikindi kandi birabora na byo bikazahinduka ifumbire n’imyinyinguvu bikajya mu butaka.”

Impuguke mu kubungabunga urusobe rw’ibinyabuzima zivuga ko kutarimagura ubutaka bifasha guhangana n’imihindagurikire y’ibihe, kuko iyo imvura iguye ari nyinshi ubutaka ntibutwarwa n’isuri.

Ikindi kibazo cyo guhinga ubutaka, ni uko hari udukoko tubamo tuzamurwa hejuru tukicwa n’izuba utwabaga hejuru natwo tugasibwa, kandi twari inshuti z’ubuhinzi, bivuze ko ubusanzwe dufasha mu gucagagura ibitunga igihingwa mu butaka.

Ubundi buryo bugamije gutuma abahinzi basobanukirwa ubuhinzi bubungabunga ubutaka, harimo ko abagera kuri 952 bahuguwe barimo ba agoronome ku rwego rw’Akarere no ku Murenge, umuhinzi utoranywa muri buri Murenge, Umuyobozi ufite ubuhinzi mu nshingano ndetse no kongera ibikorwa byo kwamamaza.

NYIRANEZA JUDITH

  • Imvaho Nshya
  • Ugushyingo 3, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE