Gusimburana ku buyobozi bigamije kwagura iterambere ry’ubukungu – PSF

Urugaga rw’Abikorera, PSF, rwatangaje ko gusimburana mu buyobozi bigamije kongera gushinga imizi n’indangagaciro z’Urugaga mu kwagura iterambere ry’ubukungu.

Stephen Ruzibiza, Umuyobozi Mukuru w’Urugaga rw’Abikorera, yabitangaje mu gihe hatangajwe amatora y’inzego z’Urugaga rw’Abikorera azatangira kuva ku itariki 09 kugeza 16 Werurwe 2026.

Urugaga rw’Abikorera rugaragaza ko igikorwa cy’amatora kizakorwa ku nzego zose za PSF, uhereye ku rwego rw’Akarere, Intara n’Umujyi wa Kigali, amahuriro (Chambers) no ku rwego rw’Igihugu.

Ruzibiza, Umuyobozi Mukuru wa PSF, ashimira abayobozi barangije manda zabo ku ruhare rukomeye bagize mu guteza imbere PSF n’ubukungu bw’Igihugu muri rusange.

Akomeza agira ati: “Mu gihe twitegura aya matora, turabizi ko atari ugusimburana gusa; ni no kongera gushinga imizi n’indangagaciro z’Urugaga mu kwagura iterambere ry’ubukungu muri rusange.

Aya matora ni kimwe mu mahirwe yo kwihitiramo abayobozi bazatugeza ku iterambere rirambye.” Urugaga rw’Abikorera rushishikariza abanyamuryango bujuje ibisabwa kugira uruhare muri aya matora kuko nabo bemerewe gutanga kandidatire zabo bakiyamamaza.

Kandidature ku rwego rw’Akarere zatangiye gutangwa kuva ku wa 03 kugeza ku wa 05 Werurwe 2026, amatora akaba ateganyijwe ku itariki 09 uku kwezi.

Kandidatire ku rwego rw’Intara zizatangira gutangwa tariki 05-09 Werurwe, mu gihe amatora kuri uru rwego ateganyijwe ku wa 11 Werurwe.

Amahuriro (Chambers) azatangira gutanga kandidatire kuva 09-11 Werurwe, amatora abe ku wa 13 Werurwe. Ni mu gihe gutanga kandidatire ku rwego rw’Igihugu bizatangira tariki 10-14, amatora abe tariki 16 Werurwe 2026.

Urugaga rw’Abikorera (PSF), ni umuryango udaharanira inyungu washinzwe mu 1999 hagamijwe guhuza no kuvuganira abikorera, guteza imbere ubucuruzi no kugira uruhare mu iterambere ry’ubukungu bw’u Rwanda.

Rufite inzego z’ubuyobozi guhera ku rwego rw’Akagari kugeza ku rwego rw’Igihugu aho rutanga ubuvugizi mu kugabanya imbogamizi z’ubucuruzi.

Urugaga rw’Abikorera rwatangijwe nyuma ya Jenoside yakorewe Abatutsi, mu gihe hari hakenewe urwego ruzahura ubukungu kandi rukagura ibikorwa by’abikorera hakiyongeraho kuba rukorana na Leta mu guteza imbere Igihugu.

PSF ishingiye ku nzego z’ibanze; Akagari, Umurenge, Akarere ndetse no kugera ku rwego rw’Igihugu. Yibanda ku guhanga imirimo, gushishikariza ishoramari, n’ubuvugizi ku bakora ubucuruzi.

Itegura imurikagurisha mpuzamahanga, Expo, rihuza abikorera bo mu Rwanda n’abo mu mahanga ndetse ikanavugurura uburyo bw’ubucuruzi.