Gukorera Igihugu na wo ni umurimo w’Imana- Perezida Kagame

  • NTAWITONDA JEAN CLAUDE
  • Mutarama 15, 2024
  • Hashize amezi 4
Image

Mu gihe abenshi basangiye imyumvire ko gukorera Imana ari ukwiyegurira ibikorwa by’idini no kugira imyemerere isobanutse mu by’iyobokamana, Perezida wa Repubulika y’u Rwanda Paul Kagame we agaragaza ko no gukorera Igihugu ari umurimo w’Imana.

Imyumvire y’Umukuru w’Igihugu ntaho itandukaniye n’ibigaragara muri Bibiliya nk’igitabo kiyobora imyemerere ya benshi mu bemera Imana ku Isi, kuko icyo gitabo kigaragaramo abari abayobozi mu [Bwami twagereranya na Leta z’iki gihe] bakoreraga ku mabwiriza y’Imana ndetse abakoze neza bagashimwa na yo.

Iyo usomye muri icyo gitabo kuva mu Itangiriro ukageza mu Byahishuwe, uhasanga inshingano Imana yahaye umuntu wa mbere wabayeho, ukageza ku mperuka y’ibihe ubwo abantu bazaba babazwa uko bujuje inshingano bahawe zirimo gukora, gutwara Isi n’ibiyirimo no kubibyaza umusaruro.

Perezida Kagame yemeje ko gukorera Igihugu ari umurimo w’Imana, nyuma yo kugaruka ku mateka y’ibyamubayeho mu mwaka wa 1995 ubwo umuntu yamugezeho amubwira ko amuzaniye ubutumwa buturutse ku Mana.

Mu butumwa uwo muntu yamugejejeho yasanze ibyo Imana ikeneye ku bayobozi b’u Rwanda, Perezida amugaragariza ko icyo gihe ari byo barimo bakora ati: “Ni amahirwe ko Imana yagutumye ibyo dusanzwe dukora. Ndamubwira nti ariko ubundi uko byari bikwiye kuba bimeze, usibye amahirwe ufite, mu bo Imana ikwiriye kuba ituma ku bandi, nari nkwiriye kuba ndimo kubera ko ibyo waje kumbwira Imana yagutumye, ngasanga ari byo tunagerageza gukora, ubwo ni ukuvuga ko aho turi Imana yahadushyize nyine iradutuma ngo dukore ibyongibyo.”

Yasabye uwo mukozi w’Imana kugenda akajya kubwira iyo Mana ko na we akeneye kwivuganira na yo kugira ngo ntivunwe no kunyuza ubutumwa bw’ibyo ayikorera ku bandi.

Ati: “[…] Kubera ko gukorera Igihugu, gukorera abo uyobora cyangwa gukorana n’abo muyobora hamwe, na wo ni umurimo w’Imana.  Ibyo rero na byo Bizana ibintu bibiri. Umurimo w’Imana, ijambo ry’Imana, kwemera, amadini, ibigo bishingiye ku myemerere ibyo ari byo byose, bivuze ko bigira aho bihurira n’ubundi buyobozi, n’ibindi bikorwa ndetse na Politiki. Politiki n’iyobokamana, bifite aho bihurira. Kubera ko intego nyamukuru ni ugukorera abaturage, ni ukubaka ibihugu.”

Perezida Kagame yemeza ko intambwe u Rwanda rwateye ishingiye ku ruhurirane rw’umusanzu w’inzego za Politiki ndetse n’amadini hamwe n’imiryango ishingiye ku myemerere.

Yakomeje ashimangira ko ibyo byose byuzuzanya ariko bigashingira ku mahitamo y’abantu ku byo bakora ndetse n’ibyo bemera, avuga ko n’ibyagezweho mu Rwanda byashingiye ku mahitamo.  

Ati: “Abantu bashoboraga kuvuga ngo ariko dufite Imana, nimureke twiyicarire tuyisenge ibibazo by’ingutu bisa nk’aho bidashobora gukemuka Imana izabidukemurira.  Ariko biriya byose navugaga, bishaka no guhitamo ariko ukagira n’icyo ukora. Hari icyo uhitamo, hari icyo wemera, hari icyo ukora. Byose byajya hamwe ni byo bivamo gushobora gutera imbere, cyangwa kutagira aho ugera.”

Yagaragaje ko amahitamo y’abantu n’ibihugu ari yo atuma bigera ku ntego runaka cyangwa ntibizigereho, atanga urugero rw’uburyo Afurika ifite umutungo kamere mwinshi.

Ati: “Mu guhitamo rero, ndaza guhera ku gihugu cyacu ndetse ndaza no kuvuga kuri Afurika n’aho duhurira n’ibindi bihugu. Ikintu cya mbere kigomba guherwaho, abantu ni bamwe, barareshya imbere y’Imana ntabwo basumbana.”

Yavuze ko kuba u Rwanda rwarashoboye gutera intambwe nubwo rutaragera aho rwifuza kugera, byose byaturutse ku guhitamo kujyana no gukora ndetse no kwemera.

Perezida Kagame yavuze ko impamvu hari abantu batareshya ari uko hari bamwe Imana yahaye amahirwe yo kureshya n’abandi ariko bakayapfusha ubusa, kugeza n’ubwo ayo mahirwe atangiye gusahurwa n’abakoresha amahirwe yabo neza.

Ati: “Wibwira ko ari ikibazo cy’Imana se ari yo yagiteye? Ni twebwe. Imana yo yakoze ibyayo, yaraduhaye turangije ibyo yaduhaye tubipfusha ubusa. Twanumvise na nabi, kwemera twakumvise nabi. Twumva ko twemera ibyo dutunze bikaba bituri imbere, twarangiza tukiyicarira tukibwira ko ibyo dufite ubwabyo nta n’icyo dukoze, bidutunga cyangwa bikaduteza imbere.”

Ubutumwa bwa Perezida Kagame mu ijambo yagejeje ku bitabiriye amasengesho yo gushima Imana no gusabira Igihugu, ku Cyumweru tariki ya 14 Mutarama 2024 bwibanze ahanini ku gaciro ko guhitamo, kwanga gukoreshwa no kuyobozwa igitugu, ashishikariza abakiri bato kwirinda ubwo bugwari.  

  • NTAWITONDA JEAN CLAUDE
  • Mutarama 15, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE