Gisagara: Bakijijwe ikimpoteri aho cyabaga hakomeza kuhakusanyiriza imyanda

  • AKIMANA JEAN DE DIEU
  • Mutarama 4, 2024
  • Hashize amezi 2
Image

Bamwe mu baturage baturiye Isoko rya Kijyambere rya Gisagara mu Murenge wa Ndora, mu Kagali ka Gisagara bavuga ko nubwo ikimpoteri kimuwe, ariko hagikomeje gukusanyirizwa imyanda, bikaba bigikomeje kubangamira ubuzima bwabo.

Mu kiganiro bahaye Imvaho Nshya bavuga ko bakibangamiwe no kuba hakimenwa imyanda naho ubuyobozi bwo bukemeza ko cyamaze kwimurwa aho cyari kiri hagakoreshwa nk’ikusanyirizo ry’Imyanda mbere yuko ijyanwa mu kimpoteri kiri mu Kabyira mu Kagali ka Gisagara, mu Mudugudu wa Rugara.

Abaturiye icyo kimpoteri bavuga ko mu kwezi k’Ukwakira 2023 bumvise amakuru mu binyamakuru ko kigiye kuhakurwa bakaba barategereje bagaheba, bakemeza ko ubuzima bwabo bubangamiwe n’umunuko ukivamo ndetse n’amasazi agiturukamo.

Umwe muri abo baturage yabwiye Imvaho Nshya ko iki kimpoteri hamaze gukorwa inkuru ubuyobozi bwagisuye ariko ko gahunda yo kukimura yo ntayabayeho kuko hakomeje gukoresha nk’uko byari bisanzwe.

Yagize ati: “Mumaze kudukorera inkuru ubuyobozi bwarahasuye ndetse buvuga ko bazakimura ariko amaso yaheze mu kirere kandi imyanda iva mu baturage no mu Isoko iracyahajugunywa dufite impungenge ku buzima bwacu n’abana bacu kuko kiranuka cyane havamo amasazi ukayasanga mu ngo zacu”.

Ahahoze ikimpoteri n’ubundi haracyakusanyirizwa imyanda

Undi avuga ko bari bagize icyizere bakimara kuvuga ko hari ahantu iki kimpoteri kigiye kwimurirwa kigakurwa mu baturage no hafi y’inzu zicuruza ibyo kurya n’ibagiro ry’amatubgo ariko bakaba barategereje ko kimurwa bagaheba bibangimiye imibereho yabo muri rusange”.

Yagize ati: “Dufite ubwoba bw’uko twarwara indwara zo mu buhumekero kuko n’abana bacu bahorana inkorora zidakira kandi aha hantu hamenwa imyanda ni hafi y’ibagiro n’inzu zitunganya amafunguro usanga no mu rugo iwacu duterwa n’amasazi akivamo kandi ubuyobozi bwari bwavuze ko buzakimimura ariko twarahebye dufite impungenge ku buzima bw’imiryango yacu”.

Umuyobozi w’Akarere ka Gisagara, Rutaburingoga Jerome mu butumwa bugufi yoherereje Imvaho Nshya yavuze ko iki kimpoteri kimuriwe ahazwi nko mu Kabyira hakaba mu Kagali ka Gisagara, mu Mudugudu wa Rugara akongeraho ko aho cyahoze i Ndora hagizwe ikusanyirizo ry’imyanda iva mu isoko mbere y’uko ijyanwa mu kimpoteri  bikorwa na Koperative ishinzwe isuku mu isoko no mu gasanteri ka Ndora.

Yongeyeho ko bagiye koherezayo itsinda rigenzura isuku ryasanga aha hantu babangamye hagashakwa ahandi hakoreshwa mu gukusanya imyanda mbere yo kuyijyana mu kimoteri bityo abaturage bagafashwa natwe ntabwi twifuza kubona hari numwe ubangamiwe.

Meya Rutaburingoga yibutsa abaturage ko bakwiye kugira uruhare mu gushyira imbere isuku n’isukura ry’aho batuye bakirinda kujugunya imyanda aho babonye kuko iyo babaye benshi bakora Ikimpoteri.

  • AKIMANA JEAN DE DIEU
  • Mutarama 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE