Gicumbi: Urubyiruko rwakanguriwe kubyaza umusaruro ikoranabuhanga

  • Imvaho Nshya
  • Ugushyingo 8, 2023
  • Hashize amezi 4
Image

Mu Karere ka Gicumbikuri uyu wa Gatatu tariki ya 08 Ugushyingo 2023, hatangijwe umushinga ugamije kwihangira umurimo hifashishijwe ikoranabuhanga, by’umwihariko ukazafasha urubyiruko kwihangira imirimo, rusabwa kudapfusha ubusa ayo mahirwe.

Umuyobozi w’Agateganyo w’Akarere ka Gicumbi Parfaite Uwera hamwe na Musenyeri Papias Musengamana Umushumba wa Diyosezi Gatolika ya Byumba batangije ku mugaragaro Umushinga ugamije guhanga umurimo bifashishije ikoranabuhanga muri Afurika y’Iburasirazuba mu rubyiruko.

Uyu mushinga uzashyirwa mu bikorwa ku bufatanye bwa Caritas Rwanda, Diyosezi Gatolika ya Byumba ndetse  n’Umuryango Catholic Relief.

Umuyobozi w’agateganyo w’Akarere ka Gicumbi, Uwera yashimiye aba bafatanyabikorwa bombi ku musanzu binjije mu rubyiruko mu karere anabizeza ko bazafatanya.

Yagize ati: “Nk’Akarere tubijeje ubufatanye kugira ngo intego y’uyu mushinga izagerweho”.

Yongeyeho ko urubyiruko ruzahanga imirimo rukayiha na bagenzi babo batayifite.

Ati: “Urubyiruko ruzahange imirimo rutere imbere, ruhange imirimo izarufasha gushora imari itanga akazi ku rundi rubyiruko hirya no hino mu karere”.

Mu butumwa bwa Musenyeri Papias Musengamana yashimiye Ubuyobozi bw’Akarere ku bufatanye bwiza bagirana n’Abafatanyabikorwa b’Akarere by’umwihariko

Diyosezi Gatolika ya Byumba anasaba abitabiriye bose kuzagira ubufatanye kuva umushinga utangiye kugeza igihe uzagenda ubyara umusaruro.

Yagize ati: “Rubyiruko murasabwa kuzagira imyitwarire myiza mu byo mukora ntimwinubire imvune muzajya muhura nazo”.

Musenyeri yakomeje asaba urubyiruko kunoza imicungire y’imishinga yabo kugira ngo rubashe kwiteza imbere.

Ati: “Murasabwa kumenya gucunga ubushobozi mufite munoza imicungire y’ibigo byanyu mu gihe kirambye, mwagura imishinga”.

Mu gusoza yijeje Ubuyobozi bw’Akarere, abafatanyabikorwa n’urubyiruko ubufatanye busesuye bwa Diyosezi abereye ku isonga.

Umuyobozi w’Agateganyo w’Akarere ka Gicumbi Parfaite Uwera

NYIRANEZA JUDITH

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE