Gicumbi: Abatujwe mu Mudugudu wa Kaniga barasaba kwegerezwa amashuri

  • KAMALIZA AGNES
  • Ugushyingo 24, 2023
  • Hashize amezi 6
Image

Abakuwe mu manegeka yo mu duce dutandukanye two mu Murenge wa Kaniga, Akarere ka Gicumbi, mu Ntara y’Amajyaruguru barasaba ko bakwegerezwa amashuri kuko abana bagorwa no gukora urugendo rurerure berekeza aho biga.

Bavuga ko baterwa impungenge n’umutekano w’abana babo kuko usanga baca mu nzira zirimo amashyamba kandi buba bwije.

Bagire Vincent ati: ”Umwana wanjye yiga aho twaturutse Bugomba  ni urugendo rurerure kuko azamuka umusozi akanawumanuka, kuko bataha saa kumi n’imwe bagera hano bwije, hari igihe njya kubategerereza mu nzira ngo ndebe ko bagera mu rugo amahoro kuko iyi ni imisozi bahingamo amasaka iyindi irimo ishyamba ni yo mpamvu dusaba ko batwubakira amashuri hafi”.

Kabongoya Oliva ati: “Abana baracyakora ingendo ndende basubira kwiga Muhondo, Bugomba na Rukizi rero usanga abana bava hano bakora urugendo rw’amasaha nk’abiri n’igice bagana ku mashuri batwegereje amashuri byaba ari byiza.”

Mukashyaka Carine ni umwana wiga mu mwaka wa Gatandatu w’amashuri abanza avuga ko bitewe n’urugendo runini akora hari ubwo yumva ababara amaguru.

Ati: “Ni kure ariko ndihangana nkagerayo ariko hari ubwo mpagera narwaye n’amaguru, batwubakiye ibigo bya hafi wenda twajya tujya kwiga bitatuvunnye”.

Umuyobozi w’agateganyo w’Akarere ka Gicumbi Uwera Parfaite avuga ko muri gahunda ya Leta y’u Rwanda hari gushyirwa imbaraga mu kongera ibyumba by’amashuri kandi by’umwihariko mu Murenge wa Kaniga naho hatekerejweho.

Ati: “Buri mwaka uko tugenda dushyira mu bikorwa imihigo y’umwaka tugenda duhiga umubare w’ibyumba byubakwa, mu Karere kose tuzongera ibyumba 21 ariko by’umwihariko Umurenge wa Kaniga harimo igisubizo kuko hari muri gahunda”.

Yongeyeho ko atari  mu Murenge wa Kaniga hateganyijwe gusa, no mu tundi Tugari tw’ Akarere ka Gicumbi abafite ibibazo byo kuba amashuri ari kure hateganyijwe kongerwamo ibyumba.

  • KAMALIZA AGNES
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE