Gen. Kazura yagiranye ibiganiro n’Umugaba w’Ingabo z’u Bufaransa

  • NTAWITONDA JEAN CLAUDE
  • Werurwe 15, 2022
  • Hashize imyaka 2
Image

Ku wa Mbere, Umugaba Mukuru w’Ingabo z’u Rwanda Gen Jean Bosco Kazura, yagiriye uruzinduko rw’akazi i Paris mu Bufaransa agirana ibiganiro n’Umugaba Mukuru w’Ingabo z’u Bufaransa Gen Thierry Burkhard, byibanze ku butwererane bw’ibihugu byombi mu bya gisirikare ndetse no ku mutekano w’ibihugu by’Afurika yo hagati n’iy’uburengerazuba .

Ibiro by’Umugaba w’Ingabo w’u Bufaransa ni byo byatangaje ko ibiganiro abo Bagaba b’Ingabo z’ibihugu byombi bagize byibanze ku kunoza ubufatanye bw’u Rwanda n’u Bufaransa mu bya gisirikare ndetse no ku miterere y’umutekano muri Afurika yo hagati ndetse n’iy’Iburengerazuba.

Minisiteri y’Ingabo mu Rwanda yo yemeje ko ibyo biganiro binagamije kuzahura umubano w’ingabo z’ibihugu byobi no kurushaho gushyigiira ubufatanye mu nyungu zifitiye akamaro ibihugu byombi.

Muri uru ruzinduko rw’iminsi ine ruzasoza ku wa Kane taliki ya 17 Werurwe, Gen Kazura yaherekejwe n’abandi basirikare bakuru batatu bo mu Ngabo z’u Rwanda ari bo Brig. Gen Patrick Karuretwa ushinzwe ubutwererane mpuzamahanga mu Ngabo z’u Rwanda, Brig Gen Vincent Nyakarundi, Umuyobozi ushinzwe Ubutasi bwa Gisirikare mu Ngabo z’u Rwanda na Col. Jean Chrysostome Ngendahimana uyobora Ishami ry’imyitozo n’ibikorwa mu Ngabo z’u Rwanda.

Ibiganiro ku mutekano w’Afurika yo hagati n’iy’u Burengerazuba bibaye mu gihe muri bimwe mu bihugu bisanzwe bifitane umubano ushingiye ku mateka n’u Bufaransa byagiye bigaragaramo umutekano muke ndetse na kudeta z’urudaca.

By’umwihariko u Bufaransa bwatangaje ko bugiye gukura ingabo zabwo muri Mali nyuma y’imyaka 10 zari zimaze zihangana n’imitwe yitwaje intwaro.

U Bufaransa buvuga ko ubutumwa bw’amahoro muri Mali bwagaragayemo amananiza menshi aturuka ku buyobozi buriho, bityo nta buryo izo ngabo zakomeza gukorera muri icyo gihugu.

Uwo mwanzuro ugomba gushyirwa mu bikorwa guhera muri Kamena 2022 urareba Ingabo z’u Bufaransa za Barkhane n’iza Tukuba zatanzwe n’ibihugu 14 by’i Burayi byiyemeje gufatanya n’u Bufaransa mu kurwanya ibyihebe muri Mali.

Ni mu gihe mu Karere k’u Burengerazuba bw’Afurika nanone habarizwa ingabo z’u Bufaransa zisaga 5000 ziri mu butumwa bwo kugarura amahoro no guhashya imitwe y’iterabwoba nka al-Qaeda na Etat Islamique/Islamic State (IS).

U Bufaransa na bwo buri mu bihugu byohereje ingabo muri Repubulika ya Santarafurika mu butumwa bwiswe “Operation Sangaris” bwakozwe guhera muri 2013 kugeza mu 2016. Ingabo z’u Bufaransa ziri mu zagiye zigaragaza ubwitange mu bihugu bitandukanye by’Afurika.

Ibiganiro bya Gen Kazura na Gen. Thierry Barkhard byibanze by’umwihariko ku mutekano wa Santarafurika na Mozambique aho u Rwanda rwohereje ingabo na Polisi mu butumwa bwo guhashya iterabwoba.

Ku rundi ruhande ariko, guhura kw’abagaba bakuru b’Ingabo z’u Rwanda n’iz’u Bufaransa gutanga icyizere gikomeye cyane nyuma y’imyaka 28 u Rwanda ruhagaritse Jenoside yakorewe Abatutsi, abasesenguzi mu bya Politiki mpuzamahahanga bakaba bashimangira ko ari intambwe ikomeye igiye guterwa mu guhindura amateka y’ingabo z’u Bufaransa mu bufatanye na Leta yateguye ikanashyira mu bikorwa Jenoside yakorewe Abatutsi.

  • NTAWITONDA JEAN CLAUDE
  • Werurwe 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE