Gen Kabarebe yagaragaje imbaraga ziri mu gukorera hamwe mu bucuruzi

  • NTAWITONDA JEAN CLAUDE
  • Gicurasi 9, 2022
  • Hashize imyaka 2
Image

Gen Kabarebe James, Umujyanama wihariye mu by’umutekano wa Perezida wa Repubulika Paul Kagame, avuga ko gukorera hamwe byaranze ingabo ku rugamba mu gihe cy’urugamba rwo kubohora igihugu byatumye zinashobora guhagarika Jenoside yakorewe Abatutsi mu 1994.

Asaba abahagarariye abikorera batandukanye bamaze iminsi batowe, bari mu mwiherero mu ntara y’Iburasirazuba mu karere ka Bugesera.

Gen Kabarebe yabigarutseho mu gitondo cyo kuri uyu wa Mbere tariki 09 Gicurasi 2022, ashimangira ko gukorera hamwe ni zo mbaraga mu bucuruzi.

Ashimangira ko ikintu cyo gukorera hamwe mu Rwanda kirimo kuza ariko ko hakiri urugendo.

Atanga urugero rw’ubwoko bw’Abanandi muri Repubulika Iharanira Demokarasi ya Congo bukorera hamwe, bikaba byaratumye buza mu bakire bo muri iki gihugu.

Ati: “Bateranya amafaranga bakayaha umuntu umwe akajya China akarangura ibintu bamutumye hanyuma akagenda abibagezaho aho bakorera ubucuruzi bwabo, bakazishyura nyuma.

Nuko Abanandi bakize. Hano uwo muhaye amafaranga ahita ashaka avoka uwo munsi, abazi neza ko agiye kukwambura ngo muburane”.

Avuga ko RDF gukorera hamwe babibonyemo imbaraga, kubera ko urugamba rutangira barafatanyaga.

Ati: “Twafataga abasirikare ba Leta hanyuma bakadufasha gutata, Ruhengeri tuyifata ntitwari tuyizi, ntitwari tuzi aho Camps Muhoza yari iri, aho Gereza iherereye ariko abo abasirikare bacu bafataga barabicaga, twe abo dufashe tukabashyira mu ngabo zacu”.

Ati: “Mudafatanije imbaraga wazikurahe? Ingabo zacu zavuye ku bihumbi 30 ziba ibihumbi 57, abo bacengezi twashyize mu ngabo zacu nibo badufashije intambara, si imbaraga se? Perezida yatwigishije kurenga utuntu duto. Gufatanya namwe ubwanyu ni byiza, gufatanya ni imbaraga, mugomba kubikora”.

Bafakurera Robert, Perezida w’Urugaga rw’Abikorera mu Rwanda, PSF, avuga ko abantu bifatanije kontineri (Containers) zaza ari nyinshi bityo ntihagire ikibura ku isoko ry’u Rwanda kandi abacuruzi bakinjiza amafaranga.

Ati: “Mwifatanije mutizeranye ntacyo mwageraho. Icyo tubasaba ni ugukorera hamwe no kugirana icyizere”.

Abikorera bitabiriye umwiherero bahuriza ku kuba baramutse bashyize imbere ubufatanye barushaho gutera imbere.

Mukantabana Annonciata ukorera ubucuruzi mu karere ka Ngoma mu ntara y’Iburasirazuba avuga ko icyo yungukiye muri uyu mwiherero ari uguhura n’abandi bacuruzi bakamenyana.

Avuga ko ubusanzwe abacuruzi bakorera hamwe ariko iby’uko bakusanya amafaranga bakayaha umuntu umwe akajya kubarangurira ntabyo bagiraga.

Ashimangira ko nyuma y’inama bahawe na Gen. Kabarebe bagiye gufatanya kugira ngo barusheho kwiteza imbere.

Ati: “Bizatuma buri mucuruzi ataba nyamwigendaho, iyo aretse kuba nyamwigendaho agafatanya na bagenzi be bakishyira hamwe bagakora igikorwa kandi gifatika. Ni isomo rikomeye dukuye mu bitekerezo afande yaduhaye”.

Habiyambere Jean, Perezida wa PSF mu Karere ka Musanze mu ntara y’Amajyaruguru, avuga ko hari byinshi arimo kungukira muri uyu mwiherero.

Ati: “Nk’ubu mu kiganiro cya Gen Kabarebe dukuyemo ikitwa ubufatanye mu bacuruzi, abahinzi n’inganda tukareba uko twakora ibintu bikomeye”.

Umwiherero wahuje abikorera urimo kubera mu Karere ka Bugesera witabiriwe n’abasaga 400 bari mu byiciro bitandukanye by’ubucuruzi.

  • NTAWITONDA JEAN CLAUDE
  • Gicurasi 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE