Gaza: USA yateye utwatsi umwanzuro wo guhagarika imirwano

  • NYIRANEZA JUDITH
  • Ukuboza 9, 2023
  • Hashize amezi 3
Image

Kuba Washington yarahagaritse umwanzuro w’Akanama gashinzwe amahoro ku Isi mu Karere ka Gaza, abantu bakomeje gupfa muri ako gace kubera ibitero Isiraheli ikomeje kugabayo.

Minisitiri w’ububanyi n’amahanga wa Isiraheli, Eli Cohen,  na we yamaganye uwo mwanzuro, avuga ko guhagarika imirwano byaba ari nko gukingira ikibaba isenyuka ry’umutwe w’iterabwoba Hamas.

Ku wa gatanu, Leta zunze ubumwe z’Amerika  yahagaritse icyemezo cy’Akanama k’Umuryango w’Abibumbye gashinzwe umutekano ku Isi gasaba ko hahagarikwa imirwano ku buryo bwihuse mu karere ka Gaza. Hananditswe inyandiko ngufi cyane yasabaga kurengera abasivili, kurekurwa bidatinze kandi nta shit abafashwe bugwate bose kurekurwa ndetse ubutabazi bukabasha kugera ku bari mu kaga.

Imirwano irakomeje hafi ya Khan Younes, umujyi munini mu majyepfo, ndetse no mu majyaruguru, ukikije Umujyi wa Gaza. Nyuma y’icyiciro cya mbere cy’ibitero byo ku butaka byibanze mu majyaruguru y’akarere ka Palesitine, ingabo za Isiraheli muri iki cyumweru zaguye ibikorwa byazo mu majyepfo, aho abasivili bagera kuri miliyoni ebyiri bahungiye, ubu bakaba bagenda barushaho gukomererwa n’ibibazo.

Kuri uyu wa Gatandatu, Perezida wa Turkiya, Recep Tayyip Erdogan, yamaganye umwanzuro w’Akanama k’Umuryango w’Abibumbye gashinzwe umutekano ku Isi, yavuze ko kahindutse “Akanama gashinzwe kurengera Isiraheli”, bukeye bwaho Abanyamerika bitambika ku cyemezo gisaba ko imirwano ihagarara muri Gaza.

Perezida Erdogan yagize ati: “Kuva ku ya 7 Ukwakira, Akanama k’Umuryango w’Abibumbye gashinzwe umutekano kahindutse akanama gashinzwe kuvugira no kurengera Isiraheli.”

Umushinga w’icyemezo wateguwe n’Umunyamabanga Mukuru wa Loni, Antonio Guterres, watewe utwatsi n’ijwi ryonyine rya Leta zunze ubumwe z’Amerika, kwifata k’u Bwongereza kandi ni mu gihe amajwi cumi n’atatu yashyigikiraga uwo mwanzuro.

Perezida wa Turkiya yongeyeho ati: “Indi Si irashoboka, ariko idafite Amerika. Amerika ihagaze hamwe na Isiraheli n’amafaranga n’ibikoresho bya gisirikare. Amerika izishyura angahe kuri ibi? Buri munsi uburenganzira bwa muntu burahungabanywa muri Gaza.”

Perezida wa Palesitine, Mahmoud Abbas, yatangaje ko Amerika ari yo nyirabayazana w’amaraso yamenetse muri Gaza, nyuma yo guhagarika icyemezo cy’Akanama k’Umuryango w’Abibumbye cyo guhagarika imirwano hagati ya Hamas na Isiraheli ku butaka bwa Palesitine.

Perezida Abbas yagize ati: “Nafashe Washington nka nyirabayazana w’amaraso y’abana b’Abanyapalestine, abagore ndetse n’abasaza bo mu karere ka Gaza biturutse ku ngabo z’Abisiraheli”.

Hamas ivuga ko abantu barenga 150 bapfuye muri Palesitine mu masaha 24. Nk’uko guverinoma ya Hamas ibitangaza, muri iryo joro, Abanyapalestine benshi baguye mu bisasu bya Isiraheli muri Al-Zawaida (hagati), Nousseirat (hagati), Rafah, Khan Younes (mu majyepfo) n’Umujyi wa Gaza (mu majyaruguru).

Minisiteri y’ubuzima yavuze ko mu masaha 24 ashize, Abanyapalestine 71 bishwe abandi 160 barakomereka bajyanwa mu bitaro bya Al-Aqsa y’abahowe Imana i Deir al-Balah (hagati), 62 bapfira mu bitaro bya Nasser (mu majyepfo).

Amakuru avuga ko igitero cyagabwe na Isiraheli muri Khan Younes cyahitanye abantu batandatu mu gitondo cyo ku wa gatandatu, hanyuma no muri Rafah gihitana abantu batanu.

  • NYIRANEZA JUDITH
  • Ukuboza 9, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE