Gaza: Ibihugu bimwe byahagaritse imfashanyo, urufaya rw’ibisasu rurakomeje

  • NYIRANEZA JUDITH
  • Mutarama 27, 2024
  • Hashize ukwezi 1
Image

Kuri uyu wa Gatandatu, tariki ya 27 Mutarama 2024, bukeye bwaho icyemezo cy’Urukiko Rukuru rw’Umuryango w’abibumbye ICJ cyahamagariye Isiraheli gukumira igikorwa icyo ari cyo cyose cya “jenoside” gishobora kuba ku butaka bwa Palesitina, ibihugu bimwe na bimwe byahagaritse imfashanyo by’agateganyo.

Si imirwano gusa igoye abatuye ako gace, kuko abaturage banibasiwe n’imvura nyinshi idasanzwe ibari ku mugongo, noneho Isiraheli nayo imeze nk’iyariye amavubi ikomeje kurasa ibisasu mu karere ka Gaza.

Ku wa gatanu, UNRWA yatangaje ko yitandukanyije na bamwe mu bakozi bashinjwaga na Isiraheli kuba baragize uruhare mu gitero cyo ku ya 7 Ukwakira 2023.

Umuryango mpuzamahanga wagaragaje impungenge nyuma y’ibisasu byibasiye Ikigo cy’Umuryango w’abibumbye gishinzwe impunzi z’Abanyapalesitina (UNRWA), byahitanye abantu cumi na batatu ku wa Gatatu.

Kubera iyo mpamvu Amerika ndetse n’ibindi bihugu byinshi bizahagarika by’agateganyo inkunga zose mu kigo cya Loni, UNRWA.

Bimwe muri ibyo bihugu bindi harim u Bwongereza, Finlande, Canada, Australie, u Buholandi n’u Butaliyani, byose byatangaje ko bihagaritse inkunga y’Ishami ry’Umuryango w’abibumbye ryita ku butabazi.

Izo mpungenge zibanze kuri Khan Younès, umujyi munini uri mu majyepfo y’ubutaka bugoswe akaba ari naho habaye imirwano ikaze hagati y’ingabo za Isiraheli na Hamas mu minsi yashize.

Umujyi wa Khan Younès, mu majyepfo y’akarere ka Gaza, uracyasukwaho ibisasu bidatuza. Ingabo za Isiraheli zibona ko ariho ubuyobozi bwa Hamas bwihishe.

Mu ijoro, imvura idasanzwe yuzuye mu mahema mu nkambi  i Rafah, byongera umubabaro w’abimuwe, ubwo bakandagiraga m byondo bagerageza gukiza ibintu bimwe na bimwe mu byo bafite.

Urukiko Rukuru rwa Loni (ICJ)  rwavuze ko Isiraheli igomba gukumira igikorwa icyo ari cyo cyose cyaba “jenoside” muri Gaza.

Afurika y’Epfo yajuririye byihutirwa Urukiko Rukuru rwa Loni mu kwezi gushize, ivuga ko Isiraheli yarenze ku masezerano ya Loni yerekeranye no gukumira Jenoside. Arikokandi ko niba ibyemezo byayo binyuranya n’amategeko, Urukiko rwaba rudafite uburyo bwo kubishyira mu bikorwa.

Umuvugizi wungirije w’Umuryango w’abibumbye, Farhan Haq, yavugiye ikigo cy’impunzi cya Palesitine nyuma y’uko Minisitiri w’Ububanyi n’Amahanga wa Isiraheli asabye ko uyu muryango UNRWA wasimburwa maze ahamagarira ibihugu byinshi guhagarika inkunga.

Ati: “Ntacyo umuntu yakongeraho. Muri rusange UNRWA ifite amateka akomeye, ibyo twabigaragaje mu bihe byinshi”.

Minisitiri w’imari wa Isiraheli Bezalel Smotrich, yavuze ko akarere ka Gaza kazayoborwa n’ubuyobozi bwa gisirikare nabwo buzagenzura ibibazo by’abasivili. Mu kiganiro kuri televiziyo ya Isiraheli yagize ati: “Muri Gaza hazaba ubuyobozi bwa gisirikare kandi buzaba bunashinzwe ibibazo bya gisivili.”

Al Jazeera yavuganye n’umuganga ayitangaza ko hasigaye abaganga umunani gusa n’abaforomo bake basigaye mu bitaro, aho 95% by’abaganga bimuriwe i Rafah kubera ibisasu bihasukwa umusubirizo.

Umunyamakuru wa Al Jazeera avuga ko yabonye abana baryamye mu byondo muri ayo mahema, bavuga ko kubera ko ubukonje n’imvura bikomeje kwiyongera ku mibabaro yabo, imibabaro y’aba bantu igeze ku rwego rukomeye.

Nk’uko byatangajwe n’umuvugizi wa Minisiteri y’Ubuzima ya Palesitina i Gaza, iyobowe na Hamas, abantu 150 bashyinguwe mu gikari cy’ibitaro kubera kugotwa n’ingabo za Isiraheli.

Yavuze kandi ko mu bitaro hakiri imirambo 30 itaramenyekana ndetse ko bagereranya ko ibikoresho byo mu bitaro bizamara iminsi ine gusa.

Iyo Minisiteri ivuga ko imiyoboro y’amazi y’ibitaro yangijwe n’ibitero bya Isiraheli. Umuvugizi wa minisiteri Ashraf al-Qudra, mu ijambo rye, yatangaje ko ibigega by’amazi by’ikigo cy’ubuvuzi byangiritse kandi ko bidakora neza bitewe n’amasasu ya Isiraheli ndetse n’ibisasu birekurwa na drone.

Imibare igaragazwa na Minisiteri y’Ubuzima ya Hamas kuri uyu wa Gatandatu tariki 27 Mutarama, ivuga ko muri Gaza abantu 26 257 ari bo bamaze kuhasiga ubuzima kuva intambara yatangira ku ya 7 Ukwakira 2023. Abenshi mu bapfuye bakaba ari abagore, ingimbi n’abana naho abakomeretse bageze ku 65 000.

  • NYIRANEZA JUDITH
  • Mutarama 27, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE