Gaza: Abanyapalestine bari mu kangaratete

  • NYIRANEZA JUDITH
  • Ukuboza 6, 2023
  • Hashize amezi 3
Image

Kuri uyu wa Gatatu, tariki ya 6 Ukuboza, ingabo za Isiraheli zazengurutse umujyi munini wa Khan Younes, mu majyepfo y’akarere ka Gaza, aho imwe mu mirwano ikaze ikomeje kubera mu gihe cy’amezi abiri intambara itangiye yo kurwanya Hamas.

Amasezerano y’agahenge muri Gaza yahungabanye mu gitondo cyo ku wa Gatanutariki ya 1 Ukuboza 2023, ubwo ingabo za Isiraheli zerekeje ibitero byazo mu gice cy’amajyepfo. Ibimodoka by’intambara  bigera mu icumi bya Isiraheli, byinjiye muri kariya gace ka Gaza biragasakiza, hafi yumujyi munini wa Khan Younes, hegereye umupaka w’igihugu cya Misiri.

Ibitaro bya Nasser, binini muri Khan Younes, byakiriye abantu benshi bakomeretse mu gitondo cyo kuri uyu wa Kabiri.

Kuri uyu wa Gatatu, Komiseri Mukuru w’Umuryango w’Abibumbye ushinzwe uburenganzira bwa muntu, Volker Türk, mu kiganiro n’abanyamakuru i Geneve yatangaje ko Abanyapalestine muri Gaza babayeho mu kangaratete, babayeho nabi biteye ubwoba.

Guverinoma ya Hamas ivuga ko Abanyapalestine bagera ku 16 250,  bangana na 70% muri bo ari abagore n’abana, baguye mu bitero byagabwe na Isiraheli kuri Gaza kuva ku ya 7 Ukwakira. Umubare w’Abanyapalesitina bakomeretse urenga 42.000. Kuva ku ya 7 Ukwakira, Abisiraheli barenga 1200 ni bo bamaze kuhasiga ubuzima.

Nk’uko byatangajwe na televiziyo Al Arabya yo muri Arabiya Sawudite ubitangaza, Isiraheli yahagaritse visa y’Umuyobozi w’Umuryango w’Abibumbye kubera ko Loni itamaganye Hamas.

Ingabo za Isiraheli zivuga ko zabonye amaboko kuri bubiko bunini bw’intwaro ingabo zibona ko ari imwe munini muri Gaza. zivuga ko zabonye ibi bikoresho hafi y’ivuriro n’ishuri. Ingabo za Isiraheli zafashe misile nyinshi zirasa ibimodoka by’intambara, ibikoresho byinshi biturika, misile ndende, grenade nyinshi na drone hamwe n’imbunda zikoresha (automatique).

Rafah ubu ni umujyi udafite ubushobozi bwo kwakira abantu benshi bimuwe, kandi abaturage babuze byose ari  amazi, amashanyarazi, ibiryo, umurongo wa interineti n’umuyoboro wa telefone, ku buryo budasanzwe nk’uko byatangajwe n’umwe mu bavuye mu byabo muri Gaza, Khaled  nk’uko yabitangarije Umunyamakuru wa RFI Alice Froussard, i Ramallah.

Yagize ati: “Nta nkunga ihagije ihari. Nakiriye agapaki kanjye k’umuceri n’isosi y’inyanya nyuma y’iminsi 35 cyangwa 40 y’urugendo mvuye mu majyaruguru njya mu majyepfo. Nta mfashanyo, nta kintu na kimwe, ndetse na Loni na Croix-Rouge mpuzamahanga batubwira ko nta mfashanyo ihari. Bateye ibisasu umuhanda munini uva Khan Younes werekeza i Rafah, byangije umuyoboro w’amazi. Biragoye nta matela, nta mpapuro, nta kiringiti, nta kintu na kimwe abantu bafite. Mu by’ukuri biteye ubwoba”.

Nk’uko Reuters na Guverinoma y’u Buyapani babitangaje, kuri uyu wa Gatatu, Minisitiri w’Intebe w’u Buyapani Fumio Kishida yabwiye mugenzi we wa Isiraheli, Benjamin Netanyahu, kuri telefoni ko ari ngombwa kugabanya byanakunda bagahagarika kwica abasivili mu ntambara barwana na Hamas.

  • NYIRANEZA JUDITH
  • Ukuboza 6, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE