Gaza:  Abanyamahanga 400 n’abenegihugu babiri bageze mu Misiri

  • Imvaho Nshya
  • Ugushyingo 2, 2023
  • Hashize amezi 4
Image

Kuri uyu wa Kane abanyamahanga 400 n’abenegihugu 2 bavuye muri Gaza berekeza mu Misiri nyuma y’igitero gikaze ingabo za Isiraheli zagabye kuri Gaza.

Mu gihe intambara yasembuwe n’igitero cya Hamas muri Isiraheli igeze ku munsi wa 27 kuri uyu wa Kane, inkambi y’impunzi ya Jabaliya, mu majyaruguru y’Akarere ka Gaza, yatewe ibisasu ku nshuro ya kabiri ku wa Gatatu.

Abanyapalestine benshi bakomeretse ndetse n’abanyamahanga babarirwa mu magana bemerewe kuva muri Gaza bajya mu Misiri.

Abanyapalestine bagera kuri 80 bakomeretse bavanywe i Gaza bajya mu Misiri banyuze aho bambukiranya Rafah, maze abanyamahanga 400 n’abenegihugu babiri bambuka umuhanda wa Rafah uhuza Gaza na Sinayi yo mu Misiri mu gitondo cyo kuri uyu wa Kane.

Ni bo ba mbere bambutse cyangwa se bashoboye kwimurwa kuva intambara yatangira hagati ya Isiraheli na Hamas ku itariki ya 7 Ukwakira 2023. Kuri uyu wa Kane, Misiri yatangaje ko izafasha kwimura “abanyamahanga bagera ku 7.000”.

Inkambi y’impunzi ya Jabaliya yongeye kwibasirwa ejo hashize ku wa Gatatu, aho ibitero byakurikiranye byahitanye nibura Abanyapalestine 195 nk’uko Hamas ibivuga.

Umuvugizi w’ingabo za Isiraheli Admiral Daniel Hagari, yashimangiye ko iperereza rigikomeje kandi ko intego y’iki gikorwa ari igitero cyagabwe ku muyobozi wa brigade ya Ezzedin al Kassam.

Umuvugizi wa Isiraheli yemeje ko abantu benshi baguye muri iki gitero ariko ahamya ko abenshi bari abo mu mutwe w’iterabwoba.

Kuva ku itariki ya 7 Ukwakira, Abisiraheli 1400 bamaze kuhasiga ubuzima, barimo abasirikare 332, kandi ingabo za Isiraheli zivuga ko abantu 240 bafashwe bugwate na Hamas.

Minisiteri y’Ubuzima iyobowe na Hamas yatangaje ko ku gicamunsi cyo ku wa Gatatu, Abanyapalestine 9.061 bapfiriye i Gaza, barimo abana barenga 3.500.

Mohammad Abu Musabah, umuyobozi w’ibikorwa by’ubuvuzi byihutirwa mu muryango utabara imbabare yagize icyo atangaza ku iyimurwa ry’Abanyapalestine benshi bakomeretse berekeje mu Misiri.

Ati: “Turizera ko inkomere zisigaye zizemererwa kwivuza, bitewe n’ubuzima bubi burangwa mu bitaro hirya no hino muri Gaza. Ejo twabonye urumuri rw’icyizere kuko itsinda rya mbere ry’abantu bakomeretse, ryemerewe kujya mu Misiri kwivuza.

Minisiteri y’Ububanyi n’Amahanga i Cairo yari yatangaje ko Misiri irimo kwitegura kwakira abanyamahanga 7000 ndetse n’abenegihugu babiri baturutse i Gaza. Ni byinshi byo kwimuka: biva mu bihugu bigera kuri mirongo itandatu bitandukanye, ariko ntabwo bagenewe gutura muri Egiputa. Bazambuka gusa kugira ngo basubire mu mahanga ku banyamahanga ndetse no mu gihugu cyabo cya kabiri ku benegihugu babiri, nk’uko umunyamakuru wa Radiyo Mpuzamahanga y’u Bufaransa i Cairo, Alexandre Buccianti abitangaza.

NYIRANEZA JUDITH

  • Imvaho Nshya
  • Ugushyingo 2, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE