Gatsibo: Urunturuntu muri Koperative CAPRORE INTAMBWE

  • KAYITARE JEAN PAUL
  • Ukuboza 2, 2023
  • Hashize amezi 3
Image

Koperative y’Abahinzi b’umuceri n’ibigori ikorera mu gishanga cya Kanyenyomba II (Coopérative des Agriculteurs Progressistes de Remera, CAPRORE INTAMBWE) yamaze kubona ubuyobozi bushya.

Ni amatora yabaye ku wa Kane tariki 30 Ugushyingo 2023, abera ku cyicaro cya Koperative mu Murenge wa Remera mu Karere ka Gatsibo mu Ntara y’Iburasirazuba.

Komite Nyobozi Nshya igizwe na Twizeyimana Damien nka Perezida, Masengesho Jean Pierre Visi Perezida, Mukarugwiza Providence Umunyamabanga, Mukabutare Fromina Umujyanama wa Mbere na Nsabimana Mathias, Umujyanama wa Kabiri.

Hategerejwe ko Ikigo cy’Igihugu Gishinzwe Amakoperative mu Rwanda (RCA) cyemeza burundu komite nyobozi na Ngenzuzi zatowe.

Ubusanzwe amatora akorwa akanagenzurwa n’abanyamuryango ubwabo bagize Inteko rusange.

Mu gihe Koperative irimo amakimbirane, icyo gihe amatora akorwa hari inzego zifite amakoperative mu nshingano.

Uwamariya Vestine, Umuyobozi w’Ishami ry’Iterambere, Ishoramari, Ubucuruzi n’Umurimo mu Karere ka Gatsibo, n’abandi bakozi muri iryo shami ndetse na Perezida wa Koperative wegujwe, ni bo bayoboye amatora.

Raporo ya RCA igaragaza ko komite yegujwe yanyereje amafaranga asaga miliyoni eshatu.

Umwanzuro wayo ugaragaza ko ayo mafaranga agomba kugaruzwa, atagaruzwa hakiyambazwa ubutabera.

Undi mwanzuro wa RCA uvuga ko Komite Nyobozi na Ngenzuzi zigomba guhita zegura hagatorwa abayobozi bashya.

Amatora ntiyishimiwe n’abatowe ntibavugwaho rumwe

Amatora ni igikorwa kitishimiwe na bamwe mu banyamuryango kuko bamwe mu bagize Inteko itora bahisemo kwitahira.

Inteko rusange idasanzwe yari igizwe n’abanyamuryango 129 bahagarariye abandi.

Ni mu gihe Inteko rusange yagize uruhare mu gutora komite yegujwe na RCA nkuko biri mu mwanzuro wa Raporo yayo yo mu kwezi k’Ugushyingo 2023, yo yari igizwe n’abasaga 300.

Uhagarariye zone ya Kiziguro wari mu Nteko rusange idasanzwe ariko ntagire uruhare mu kwitorera ubuyobozi bwa Koperative, yabwiye Imvaho Nshya ko babatumye abazagira uruhare mu matora barangiza bakabuzwa kwinjira mu Nteko rusange idasanzwe.

Agira ati: “Twe badutumye abanyamuryango bagomba kwitabira Inteko rusange idasanzwe none urareba ko abenshi ari abasigaye hanze, n’abitwa ko tugize Inteko rusange bamwe turitahiye”.

Undi yabwiye Imvaho Nshya ati: “Abatowe ntitubazi bagende bazayobore abahinga ibigori, abahinga umuceri tuziyobora”.

Undi na we utashatse kuvuga amazina ye, yagize ati: “Njye mfite ikibazo, natanze umusaruro wa toni eshatu z’umuceri muri sezo (Season) ishize ariko undi muceri ugiye kwera ntarishyurwa umusaruro wa mbere.

Ubu se icyizere cy’uko n’uwo nzatanga nzishyurwa ni ikihe? Nta musaruro wanjye nzatanga bagende bayobore abahinga ibigori”.

Umunyamuryango wa koperative wese muganiriye, aguhamiriza ko abatowe nta cyizere bafitiwe ku buryo bigoye kugeza umusaruro kuri koperative.

Ntibatinya kuvuga ko mu bagize akanama k’amasoko harimo n’abatazi gusoma no kwandika.

Icyakora umukozi w’Akarere wakurikiranye amatora, yumvikanye mu Nteko rusange avuga ko abatazi gusoma no kwandika ari amakosa yabo, ko bagombye kuba barize.

Ubwo harobanurwaga abagize Inteko itora, habanje kubaho kutumvikana hagati y’itsinda riyoboye amatora n’abanyamuryango ba Koperative.

Hageze ubwo hafatwa umwanzuro wo kwikingirana ku batoraga n’abari bayoboye amatora, cyane ko hari abashakaga kwinjira ku gahato.

Bamwe mu banyamuryango bagize Inteko rusange n’abandi batari batumiwe bamaze kugenda, hahise haza polisi nyuma yo kumenyeshwa ko habaye akavuyo, gusa yasanze karangiye.

Uwamariya Vestine, Umuyobozi w’Ishami ry’Iterambere, Ishoramari, Ubucuruzi n’Umurimo mu Karere ka Gatsibo, yasabye abatowe gukurikirana ibihingwa bakirinda kwihutira kwirukana abakozi ba koperative.

Akarere ka Gatsibo kasabye abatowe ko nyuma yo kwemezwa bazareba niba abakozi ba Koperative barashyizwe mu myanya ku buryo bwubahirije itegeko rigenga umurimo.

Mu mpanuro Uwamariya yatanze yagize ati “Iyo umuntu amaze gutorwa ntibivuze kwikomeza. Gutorwa si ukwikakaza ahubwo ni ukwigirira icyizere ari nabyo tubasaba”.

Akomeza agira ati “Ntimukwiye guhutaza umunyamuryango kandi ntimwumvikane mugamije kwiba. Mwubahane mugamije gukorera hamwe”.

Ku rundi ruhande, yasabye Komite Ngenzuzi na Komite y’akanama k’amasoko kutisuzugura cyangwa ngo baterwe ipfunwe n’amashuri.

Twizeyimana Damien, Perezida wa CAPRORE INTAMBWE, yijeje ubufatanye kandi ko n’abo bagiye gukorana bafite imbaraga.

Avuga ko atari mushya muri koperative. Ati “Ndabizeza ubufatanye”.

RCA yatanze umucyo ku byakozwe mu Nteko rusange

Ikiganiro kigufi Dr Mugenzi Patrice, Umuyobozi Mukuru w’Ikigo cy’Igihugu Gishinzwe Amakoperative yahaye Imvaho Nshya, asobanura ko Inteko rusange ya Koperative igomba kuba igizwe n’umunyamuryango wese watanze umugabane shingiro.

Agaragaza ko amabwiriza avuga ko utora n’utorwa bagomba kuba ari mu bagize Inteko rusange.

Atanga urugero rw’uko koperative ziri ahantu mu Karere kamwe zihuje ibikorwa zishobora gukora Ihuriro (Union).

Muri iryo Huriro ngo ntabwo Inteko rusange iba igizwe n’abanyamuryango bose b’amakoperative ahubwo za Koperative z’ibanze zitoramo abajya kuzihagararira mu Ihuriro.

Muri koperative ubwayo, Inteko rusange iba igizwe n’abanyamuryango bose. Abantu bose bishyuye umugabane shingiro ni bo bagize Inteko rusange.

RCA yahamirije Imvaho Nshya ko Inteko rusange idasanzwe yitwa Inama y’inteko rusange.

Yagize ati “Nta Nteko idasanzwe ibaho ahubwo icyo bivuze ni inama y’inteko rusange.

Inama y’Inteko rusange itandukanye n’Inteko rusange. Ni ibigaragazwa n’ingingo ya 27, 28,29 n’iya 30 y’itegeko rishyiraho amakoperative.

Ingingo ya 25 y’iri tegeko, ivuga ko iyo abantu barenze 100, bitoramo ababahagarariye bakagira Inteko rusange.

RCA yavuze ko itegeko rishya rigaragaza ko koperative igizwe n’abanyamuryango 1000, bisobanuye ko Inteko rusange itagomba kurenza abantu 100.

Kuri CAPRORE INTAMBWE ho si ko bimeze kuko igizwe n’abanyamuryango 1000 ariko abagize Inteko rusange, bagizwe n’abanyamuryango 129.

Abatowe bose, nyuma y’amatora bahawe impanuro basabwa gukorera hamwe
Twizeyimana Damien Perezida wa CAPRORE INTAMBWE (Uwa 2 ibumoso)
Abagize inama y’inteko rusange bakurikiye inama
Perezida wa Koperative wegujwe kubera imicungire mibi ya Koperative (uwa 2 iburyo) yagize uruhare mu matora
  • KAYITARE JEAN PAUL
  • Ukuboza 2, 2023
  • Hashize amezi 3
TANGA IGITEKEREZO
Amani Dieudonne says:
Ukuboza 3, 2023 at 8:50 pm

Urakoze kuko uratuvuganiye kandi ibyo wanditse ni ukuri. Ahubwo abobireba badufashe kuko uwo perezida wegujwe ngenzuzi ytweretse ko batwibye miliyoni 32. Hari abafunzwe barafungurwa. Perezida yishyuye ibifaranga byinshi kuko we yariye menshi…

Andika igitekerezo

AMATEGEKO AGENGA IYANDIKA RY'IGITEKEREZO CYAWE