Gatsibo: “Kuba umwe ni inkingi yubakiyeho imiyoborere myiza u Rwanda rwahisemo”

  • NTAWITONDA JEAN CLAUDE
  • Mata 11, 2022
  • Hashize imyaka 2
Image

Umunyamabanga wa Leta muri Minisiteri y’Ubutabera Nyirahabimana Soline  yavuze ko kuba umwe ari inkingi yubakiyeho imiyoborere myiza Igihugu cy’u Rwanda cyahisemo.

Yabigarutseho uyu munsi ku wa 11 Mata 2022, ubwo yari yifatanyije n’abaturage bo mu Karere ka Gatsibo mu muhango wo Kwibuka ku nshuro ya 28 Jenoside yakorewe Abatutsi mu 1994.

Umunyamabanga wa Leta muri Minisiteri y’Ubutabera Nyirahabimana yakomeje avuga ko Leta y’abicanyi yahisemo kwica no kurimbura ariko FPR Inkotanyi ihitamo kwimakaza ubumwe no kuba umwe.

Ati: “Twumvise aho twavuye, ububi bwabyo birahagije ngo bitume tubyanga burundu tugashyira imbere ubumwe, ubundi tugatera imbere”.

Yongeyeho ati: “Urubyiruko dufite rukoreshe ikoranabuhanga ryatejwe imbere n’Igihugu kugira ngo runyomoze abahakana n’abapfobya Jenoside yakorewe Abatutsi”.

Umuyobozi w’Akarere ka Gatsibo Gasana Richard, na we yatanze ubutumwa yihanganisha  abarokotse Jenoside yakorewe Abatutsi i Kiziguro, avuga ko imiyoborere myiza u Rwanda rufite ubu itanga icyizere n’ihumure ku Banyarwanda ko Jenoside itazongera ukundi.

Ati: “Amateka ya Jenoside yakorewe Abatutsi i Kiziguro, ni ukubera imiyoborere mibi yaranze ubuyobozi bwariho; ubu turishimira ko dufite ubuyobozi bwiza burangajwe imbere na Perezida Paul Kagame wanayoboye urugamba rwo guhagarika Jenoside akabohora u Rwanda”. 

Yashimye n’ubufatanye bw’inzego zinyuranye bwatumye imibiri yari yarajugunye mu rwobo ishyingurwa mu cyubahiro.  

Ati: “Turashima ubufatanye bw’Ubuyobozi kuva ku rwego rw’Igihugu, Intara, inzego z’umutekano, abarokotse Jenoside yakorewe Abatutsi n’abandi bwatumye imibiri y’Abatutsi yari yarajugunywe mu rwobo, ikurwamo kugira ngo ishyingurwe mu cyubahiro ikwiye”.

Muri iki gikorwa cyo kwibuka hanatanzwe ubuhamya ndetse n’ikiganiro, bigaruka ku mateka yaranze Kiziguro mu gihe cya Jenoside yakorewe Abatutsi.

Ku italiki ya 11 Mata 1994, Abatutsi benshi bari bahungiye kuri Kiliziya ya Kiziguro bagera 5,500 baricwa, bagabweho igitero simusiga kigizwe n’abasirikare n’Interahamwe, ku mabwiriza ya Gatete Jean Baptiste wari Burugumesitiri w’ahahoze ari Komini Murambi.

Yayoboye icyo gitero ari kumwe na Mwange wari Burugumesitiri mushya wa Komini Murambi, Valens Byansi wari Perezida wa CDR muri Murambi, Rwabukumba Onesphore wahoze ayobora Komini Muvumba n’abasirikare.

Gatete Jean Baptiste ubu  yakatiwe igifungo cy’imyaka 30 n’Urukiko Mpuzamahanga Mpanabyaha rwashyiriweho u Rwanda na ho Onesphore Rwabukumba akatirwa igifungo cya burundu n’urukiko rwo mu Budage.

Gihana Samson  umwe mu barokotse Jenoside yakorewe Abatutsi yagarutse ku buryo abakoloni basenye ubumwe bw’Abanyarwanda, avuga ko hari abashingiye ku ndeshyo no ku mazuru, bahita bashyiraho amako kugira ngo basenye ya miyoborere y’Abanyarwanda. 

Yavuze ko  mu 1933 mu ndangamuntu nta bwoko bw’Abatutsi, Abahutu n’Abatwa bwabagamo. Ati: “Hariho amoko tuzi nk’Ababanda, Abega, Abanyiginya. Ubukoloni bwimitse irondakoko, aho babera akaga ndavuga Ababiligi byari ugusenya ibyagezweho”.

 Manzi Aloys  warokokeye Jenoside yakorewe Abatutsi i Kiziguro, yatanze ubuhamya bw’amateka mabi n’ubuzima bushaririye Abatutsi bo mu yari Komini Murambi banyuzemo, agaragaza uburyo umuryango we n’indi y’Abatutsi bagiye batotezwa, bakicirwa ababyeyi, abavandimwe. 

Ubwo yahungaga Interahamwe yitwa Mubirigi yamuguyeho, ayiha amafaranga 1000 iramureka. Yagiye ahungira ahantu henshi mu ngo z’abantu yari azi ariko bakamwirukana ngo bataza kumwicira aho.

Ati: “…ngeze  hano ku Kiliziya numva abantu barimo kuvugiramo ariko nakomanga nkabura unkingurira. Nigira inama yo kujya kwa Karambizi na Munyaneza kuko bari baziranye n’iwacu. Na bo baranyirukanye ngo nge ku Kiliziya kandi hari interahamwe n’abasirikare. 

Bukeye ni bwo natangiye kumva imbunda barasa ku Kiliziya, bakuraho inzugi batangira kwica Abatutsi”.

Arashima FPR Inkotanyi yahagaritse Jenoside

Manzi ashimira Inkotanyi zahagaritse Jenoside yakorewe Abatutsi, agashobora no kwiga akarangiza kaminuza ubu akaba afite akazi. Ashimira Leta y’Ubumwe iyobowe na Perezida Paul Kagame yubatse Urwibutso rwa Kiziguro  ruruhukiyemo imibiri y’Abatutsi bazize Jenoside.

Sibomana Jean Nepo Perezida wa Ibuka mu Karere ka Gatsibo na we yavuze  ko abarokotse Jenoside bafite impamvu yo gukuda Inkotanyi zanze gukomeza urugendo zibanza kurokora Abatutsi.  

Ashima ibyo Igihugu kimaze kugera ubu, ati: “Nagira ngo dushyigikire Perezida Paul Kagame muri gahunda nziza amaze kugeza ku gihugu”.

Muri iki gikorwa cyo kwibuka kandi hanashyinguwe mu cyubahiro imibiri 4 y’abazize Jenoside yakorewe Abatutsi yabonetse mu mirenge ya Rugarama, Remera, Kiramuruzi na Kiziguro. Imibiri 20,120 ni yo yari isanzwe iruhukiye mu Rwibutso rwa Jenoside rwa Kiziguro.

Umunyamabanga wa Leta muri Minisiteri y’Ubutabera Nyirahabimana Soline yasabye  buri wese wamenya aho abatarashyingurwa bari  kugira ubutwari bwo kubivuga kugira ngo na bo bashyingurwe mu cyubahiro.

Umuyobozi w’Akarere ka Gatsibo Gasana Richard
  • NTAWITONDA JEAN CLAUDE
  • Mata 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE