Gatsibo: Abahinzi b’umuceri bageze mu zabukuru bahawe pansiyo

  • Imvaho Nshya
  • Ukuboza 23, 2023
  • Hashize amezi 2
Image

Abahinzi b’umuceri mu gishanga cya Ntende giherereye mu Karere ka Gatsibo mu Ntara y’Iburasirazuba bageze mu zabukuru muri Koperative Coproriz Ntende, bahawe amafaranga iyi koperative isanzwe igenera abageze mu zabukuru (Pension).

Abanyamuryango ba Coproriz Ntende ni 3,549 habariwemo abasaza n’abakecuru 414 bahawe pansiyo muri uyu mwaka wa 2023. Umwaka ushize abasaza n’abakecuru 360 ni bo bahawe amafaranga y’izabukuru.

Ni igikorwa cyabereye ku kicyacaro cya Koperative giherereye mu Murenge wa Rugarama, mu gitondo cy’ejo ku wa Gatanu tariki 22 Ukuboza 2023.

Munyaburanga Emmanuel, Perezida wa COPRORIZ NTENDE, avuga ko muri Koperative bafite abasaza bamaze kugera mu za bukuru kuva ku myaka 65 kuzamura.

Ubuyobozi bwa Coproriz Ntende bwabwiye itangazamakuru ko mu bageze mu zabukuru 414, buri wese ahabwa 30,000 Frw buri mwaka.

Koretive y’Abahinzi b’Umuceri mu gishanga cya Ntende mu Karere ka Gatsibo

Munyaburanga yagize ati “Koperative yaricaye igena y’uko abantu bamaze kugera mu zabukuru mu by’ukuri baba bamaze kugira intege nke, batagira icyo bashobora cyane cyane muri iyi minsi ya Noheri tugiye kujyamo n’ubunani, koperative itekereza kubaha pansiyo”.

Ibi ngo byerekana ko Koperative ari iy’abahinzi kandi ko n’ibiyikorerwamo ari ibyabo.

Ati “Nta mpamvu atakwiyumvamo ibintu bye, ibintu ni iby’abo bakecuru, gusa akarusho kabo n’uko bageze no mu za bukuru abandi bo bagifite akabaraga bashoboye no kwikorera. Aba bo tukabongereraho ko bageze mu zabukuru”.

Umwe mu basaza bahawe amafaranga y’izabukuru, Mbitse Bernard, ukorera ubuhinzi bw’umuceri mu Karere ka Kayonza mu Murenge wa Murundi mu Kagari ka Karambi, yishimiye pansiyo yahawe ko izamufasha gukomeza guhingisha umuceri kuko nta mbaraga agifite zo guhinga.

Ati “Kuko ntashoboye gushoka mu gishanga buri munsi, mpa abahinzi bakagenda bagahinga nanjye nkajya ngenzura uko barimo kugenda bakora, iyi nkunga imfitiye akamaro cyane”.

Yatangiye mu 2009 ahinga umuceri, kugeza n’uyu munsi ni bwo buhinzi agikora.

Kuri we guhabwa pansiyo ngo ni imbaraga baba bongerewe na Koperative bityo nabo bagashyiramo abakozi bakabahingira umuceri.

Ashimira ubuyobozi bwa Koperative Coproriz Ntende ko bubareberera.

Mukamuhigirwa Budensiyana umukecuru w’imyaka 65 avuga ko ari bwo mbere atangiye gufata pansiyo.

Ati “Njyewe nk’umuhinzi w’umuceri batangiye kumpa pansiyo ndabyishimiye cyane. Natangiye ndi mutoya none urabona ngeze mu zabukuru.

Nahinze umuceri kandi uramfasha cyane urugo rwanjye rumeze neza, abana banjye bariga n’ubungubu bamwe bararangije”.

Amafaranga bamuhaye yishimira ko azakomeza kumusindagiza mu buhinzi kubera ko atagishoboye guhinga.

Ati “Ngomba guha abakozi bakamfasha guhinga umuceri”.

Iyi Koperative ifite ibindi bikorwa biyibyarira inyungu bitari ubuhinzi, birimo Hoteli, ubworozi bw’inkoko, uruganda rwa kawunga ndetse na Farumasi y’imiti y’abantu.

Hotel ya COPRORIZ Ntende yinjiza amafaranga afasha abanyamuryango
Munyaburanga Emmanuel, Perezida wa Coproriz Ntende
  • Imvaho Nshya
  • Ukuboza 23, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE