Gatete na Uwiringiyimana begukanye “Kigali Duathlon National Championship 2023”

  • SHEMA IVAN
  • Ugushyingo 26, 2023
  • Hashize amezi 3
Image

Gatete vital mu bagabo ukinira Muhazi Triathlon Club na uwiringiyimana Liliane Mu bagore ukinira Huye Triathlon Club ni bo begukanye “Kigali Duathlon National Championship 2023”

Iri rushanwa ry’umunsi wa kabiri riri ku ngengabihe y’amarushanwa  ategurwa n’Ishyirahamwe ry’umukino wa Triathlon mu Rwanda (RTF) ryasojwe ku wa Gatandatu tariki 25 Ugushyingo 2023.

Iri rushanwa “Kigali Duathlon National Championship 2023” ryakiniwe mu Mujyi wa Kigali aho abakinnyi basiganwe intera ya kilometero 5 ku maguru, kilometero 20 ku igare basoza basiganwa intera ya kilometero 2.5 ku maguru aho basoje bakoze intera ya kilometero 27,5.

Abasinganwe bakoresheje Inzira ya UNILAK- RWANDEX – KIMIHURURA (mu Myembe) – KIMIHURURA – RUGANDO – ROUND ABOUT CONVENTION & RADISSON BLUE.

Mu bagabo, Gatete Vital ukinira ikipe ya Muhazi Triahlon Club ni we wegukanye isiganwa akoresheje isaha 1, iminota 2 n’amasegonda 15. Ku mwanya wa kabiri haje Ngendahayo Jeremie wakoresheje isaha 1, iminota 5 n’amasegonda 45 naho ku mwanya wa gatatu haza Tuyisenge Samuel wakoresheje isaha 1, iminota 6 n’amasegonda 5.

Mu bagore,  Uwiringiyimana Liliane ukinira ikipe ya Huye Triathlon Club ni we wegukanye isiganwa  aho yakoresheje isaha 1, iminota 23 n’amasegonda 9, yakurikiwe na Uwizeye Valentine wakoresheje isaha 1, iminota 23 n’amasegonda 49 naho ku mwanya wa 3 haza Mukamuhire Irene wakoresheje isaha 1, iminota 25 n’amasegonda 24.

Muri siganwa kandi hari n’abakoresheje amagare asanzwe, aho Mufiteyesu Emmanuel yegukanye umwanya wa mbere akoresheje 1 n’iminota 9 akurikirwa na Nizeyimana Eric (1h 11’ 40”) naho ku mwanya wa gatatu haza Ndikubwimana Jean de Dieu (1h 21’ 06”).

Mu cyiciro cy’abantu bafite ubumuga, irushanwa ryegukanwe na Rukundo Augustin (1h 26’ 34”).

Irushanwa ry’umunsi wa mbere ryabereye i Gicumbi, taliki 04 Ugushyingo 2023 aho ryegukanwe na Ngendahayo Jeremie mu bagabo na Uwiringiyimana Liliane mu bagore.

Biteganyijwe ko irushanwa ry’umunsi wa gatatu rizabera mu Karere ka Nyanza, tariki 16 Ukuboza 2023.

Triathlon ni imikino itatu ikomatanyije irimo igare, gusiganwa ku magauru no koga, ariko iyo amarushanwa agizwe n’ibyiciro bibiri bitarimo koga byitwa Duathlon.

  • SHEMA IVAN
  • Ugushyingo 26, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE