Gasabo: Ingabo na Polisi batangiye kubakira irerero abaturage ba Rutunga

  • ZIGAMA THEONESTE
  • Werurwe 1, 2024
  • Hashize amezi 2
Image

Ingabo z’u Rwanda na Polisi bafatanyije na Minisitiri w’Uburinganire n’Iterambere batangije ibikorwa byo kubaka irerero (ECD) mu Murenge wa Rutunga w’Akarere ka Gasabo mu Mujyi wa Kigali, rizafasha ababyeyi kurinda abana babo imirire mibi n’ubuzererezi.

Ni ibikorwa   by’ubufatanye hagati y’Ingabo, Polisi n’abaturage mu kwimakaza ibikorwa n’iterambere n’imibereho myiza byatangijwe mu Gihugu hose kuri uyu wa 1 Werurwe 2024.

Mu gutangiza ibyo bikorwa Dr Uwamariya Valentine, Minisitiri w’Uburinganire n’Iterambere ry’Umuryango MIGEPROF yashyize ibuye ry’ifatizo ahazubakwa  irerero ryita ku mikurire y’abana bato mu Murenge wa Rutunga mu Karere ka Gasabo.

Dr Uwamariya yavuze ko urwo rugo mbonezamikurire ruje rukenewe kandi ruzafasha  abana bato bo muri uyu Murenge wa Rutunga.

Ati: “Ni urugo ruje gufasha abana gukura neza harimo kugaburirwa uko bikwiye kuko hari ahazajya hategurirwa amafunguro, ariko hari n’ishuri rigamije gukangura ubwonko bwabo biciye mu mikino”.

Uwo muyobozi yasabye ababyeyi bo mu Murenge wa Rutunga kwitabira uru rugo mbonezamikurire mu gihe ruzaba rwuzuye.

Bamwe mu baturage bo muri uwo murenge bishimiye ko bagiye kubona irerero rizatuma abana babo bakura neza ntibajye mu buzererezi.

Banashima Ingabo na Polisi ko bakora ibikorwa bibateza imbere.

Umwe ati: “Iri rerero tugomba kurishyiramo abana, turwanya imirire mibi ndetse n’amakimbirane mu ngo, kuko ni yo atuma abana bazerera mu muhanda.”

Yunzemo ati: “Twishimiye Polisi n’Ingabo z’Igihugu rwose ni ibintu byiza kandi turabakunda, dufatanya na bo tukarwanya amakimbirane”.

Undi yongeyeho ati: ”Ndanezerewe ko ingabo zigiye kutwubakira aha hantu, turishimye ko abana bacu batazajya bazerera mu mihanda, tunenejwe n’uko tubaza dufite aho tubasize kandi bafite umutekano.”

Umuvugizi wa Polisi mu Mujyi wa Kigali, Superintendent of Police (SP) Sylvestre Twajamahoro yavuze ko ibyo bikorwa bakora ari muri gahunda yo kuzuzanya n’abaturage bashinzwe kurinda.

Yagize ati: “Ni ibikorwa bihuje ingabo na Polisi, byari bisanzweho ariko iki gikorwa kizamara amezi atatu  ni ubudasa, mu bindi bihugu usanga Polisi inyura ukwayo Igisirikare kikanyura ukwacyo ariko mu murongo mwiza duhabwa n’Umukuru w’Igihugu, Umugaba w’Ikirenga Perezida wa Repubulika dukorera hamwe kugira ngo tugire umusanzu tugira ku iterambere ry’igihugu n’imibereho myiza y’abaturage”.

Ni ibikorwa bifite insanganyamatsiko igira iti: ‘Imyaka 30 yo kwibohora, ubufatanye bw’Ingabo z’Igihugu, inzego z’umutekano n’abaturage mu iterambere ry’u Rwanda’.

Umuvugizi wa Polisi mu Mujyi wa Kigali avuga ko guhuza iyi nsangamatsiko n’ibyo bikorwa ari uko abaturage mu rugendo rw’imyaka 30 bacungiwe umutekano neza cyane.

Ati: Umutekano dushaka ni umuturage witeje imbere uhinga agasagurira amasoko muri urwo rwego ubona ibi bikorwa byo kubaka amarerero, gutanga inka n’ibindi bitandukanye”.

Kuva mu mwaka wa 2009 ibikorwa by’Ingabo na Polisi bafatanyije n’izindi nzego z’umutekano bakomeje gukora ibikorwa byimakaza iterambere ry’abaturage buri mwaka.

 Ni ibikorwa byazamuye umusaruro ku gihugu mu gusigasira umutekano no kongera ubusabane ku baturage.

Muri uyu mwaka ibikorwa bya RNP, RDF, Inzego z’Ibanze n’abaturage bazakora ibikorwa byibanze ku kwimakaza isuku n’umutekano ndetse n’ibikorwa by’amaboko.

Muri ibyo bikorwa harimo no kubakira abaturage b’Akagari ka Kabariza urugo Mbonezamikurire rw’Abana bato (ECD)

Umuyobozi w’Umujyi wa Kigali Desengiyumva Samuel, yashimiye inzego z’umutekano muri ibi bikorwa byo kuzamura iterambere ry’abaturage.

Uwo muyobozi kandi yanasabye abaturage gusigasira ibyo bikorwa harimo gukomeza gufatanya n’inzego z’umutekano ndetse no kugira isuku.

Yagize ati: “Hamaze gutangizwa ahazubakwa irerero ariko ndagira ngo mbabwire ko dufite inshingano zo kubisigasira turabasaba kwita ku bana, abana dufite bakitabira amashuri, ariko tukabikora twimakaza isuku hose, haba ku mubiri aho dutuye mu bushobozi bwacu buke umuntu akabigira intego.”

Bteganyijwe ko iryo rerero (ECD) rizatwara miliyoni 28 z’amafaranga y’u Rwanda.

  • ZIGAMA THEONESTE
  • Werurwe 1, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE