Gakenke: Biruhukije ubwo begerezwaga Isange One Stop Center Gatonde

  • Imvaho Nshya
  • Nzeri 26, 2023
  • Hashize amezi 8
Image

Bamwe mu baturage bo mu Karere ka Gakenke bajyaga bahura n’ikibazo cyo kubona serivisi za Isange One Stop Center kuri ubu bavuga ko bishimye kuko begerejwe hafi izi serivisi  zayo ku Bitaro bya Gatonde.

Urwego rw’Igihugu rw’Ubugenzacyaha (RIB) rwaboneyeho gusaba abo baturage kujya batanga amakuru ku muntu ukora ihohotera cyangwa se uwahohotewe ariko we ntabashe kuba yasobanukirwa n’urwego rwamurengera.

Byagarutsweho mu gikorwa cy’ubukangurambaga bwo gusobanurira abaturage ibyaha by’ihohoterwa n’aho basanga serivise za Isange One Stop Center, Urwego rw’Igihugu rw’Ubugenzacyaha RIB ruri gukorera mu Karere ka Gakenke, n’ahandi hatandukanye mu Gihugu.

Abo mu Murenge wa Muzo bakiranye yombi iyi gahunda, bemeza ko bagiye kuyibyaza umusaruro binyuze mu kugana Isange One Stop Center ya  Gatonde  begerejwe, gushishikariza bagenzi babo kuyigana n’ibindi.

Nzayisenga Jeannette wo mu Murenge wa Janja, avuga ko bajyaga bakora urugendo rurerure bajya gushaka serivisi kure  ariko kuri ubu ngo bigiye kuba amateka.

Yagize ati : “Hari ubwo umuturage yahohoterwaga nuko akabura aho yasanga Isange One Stop, bityo agahitamo kwicecekera kuko nta kundi byagenda. Ariko ubu ibi bigiye kuba amateka, ibi kandi bizajya bituma na cya kibazo cyo kuba ibimenyetso byasibangana kubera gukora urugendo rurerure gikemuka.  Kuba yaje hano hafi yatwegereye, ihohotera na ryo rigiye kugabanyuka.”

Muvunandinda Eliab we asanga Isange One Stop Center igiye kujya yigisha abahohoteraga abandi ko bakwiye kubireka.

Yagize ati: “Hari abibwiraga ko guhohotera mugenzi wawe ari ibintu bitapfa koroha ngo uwahohotewe abone ubutabera kubera ko byamusabaga gukora ingendo ndende atega, bityo amafaranga y’urugendo akaba inzitizi. Kuri ubu rero urabona ko serivisi ari hano ku irembo”.

Ndayisaba Jean Paul Habun, Umukozi wa RIB ushinzwe ibikorwa bya Isange one Stop Centre, agira inama abatuye Akarere ka Gakeke by’umwihariko abo mu Murenge wa Muzo kubyaza umusaruro Isange one Stop Center ya  Gatonde  kuko ari bo yashyiriweho, gukumira ibyaha by’ihohoterwa n’ibindi.

Yagize ati: “Twatekereje kubegereza serivisi za Isange One Stop Center hafi yanyu kugira ngo hatagira umuturage uhohoterwa akabura aho yafashirizwa, ikindi kandi hari abakoraga urugendo rurerure bajya gushaka serivisi za Isange kure ariko ubu iki kibazo kigiye kuba amateka.”

Akomeza avuga ko bagomba kugira uruhare mu kuyibyaza umusaruro, kwirinda ibyaha by’ihohoterwa bibera mu miryango n’ibindi, kuko ibi ari bimwe mu bidindiza iterambere ry’umuturage n’umuryango nyarwanda muri rusange.

Kugeza ubu mu Karere ka Gakenke habarurwamo Isange one Stop Center eshatu 3 ari zo Isange One Stop Center ya Ruli, iya Nemba n’iya Gatonde, zikaba zakira abakorewe ibyaha by’ihohoterwa rishingiye ku gitsina, gukubita no gukomeretsa ndetse n’ibindi.

RIB ikomeje ubukangurambaga ku bijyanye no kumenyekanisha akamaro ka one Stop Center mu gihugu hose.

One Stop Center ya Gatonde yatumye abaturage biruhutsa

NGABOYABAHIZI PROTAIS

  • Imvaho Nshya
  • Nzeri 26, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE