Gakenke:  Barashimira Perezida Kagame wabahaye ikiraro cya Ntaruka bava mu bwigunge

  • Imvaho Nshya
  • Ugushyingo 8, 2023
  • Hashize amezi 4
Image

Abaturage bo mu Mirenge ya Muhondo na Muyongwe, bavuga ko bishimiye ikiraro cya Ntaruka bubakiwe na Nyakubahwa Perezida wa Repubulika y’u Rwanda Paul Kagame; cyoroheje ubuhahirane.

Iki kiraro cya Ntaruka gihuza Umurenge wa Muhondo n’uwa Muyongwe, bamwe mu baturage baganiriye na Imvaho Nshya bavuga ko ikiraro gihuza abaturage bo mu Kagari ka Musenyi ko mu Murenge wa Muhindo n’Akagari ka Va ko muri Muyongwe, cyazamuye imigenderanire n’ubukungu.

Ntuyenabo Elias wo mu Murenge wa Muhondo, Akagari ka Musenyi yagize ati: “Ndashimira Perezida Kagame ukomeje kutuvana mu bwigunge, iki kiraro uko ukireba kimaze imyaka myinshi, abantu bavunikiragamo, abandi bagatwara n’umugezi ku buryo mbese kugira ngo wambuke ujye mu Murenge wa Muyongwe duturanye wasangaga ari nko kujya mu kindi gihugu wambutse umupaka, ariko kubera ko Perezida Kagame yumvise ugutakamba kwacu atwujurije ikiraro cyiza cyo mu kirere, ubu turagenda ijoro n’amanywa nta kwishisha ngo turatwarwa n’amazi, turishimye cyane kuko ibikorwa byacu biragenda neza”.

Kaligirwa Doroteya wo Murenge wa Muyongwe, Akagari ka Va we avuga ko iki kiraro cyabaye gahuzamiryango yagize ati: “Ubundi twiganyiraga gushyingira hakurya y’umugezi, kuko gusura umuntu byari bikomeye cyane, umuntu yaba yisomeye akagwa ke akirarira hakurya akazataha bucyeye.

Iyo washyingiraga hakurya aho ntiwabonaga abaguherekereza umugeni, ariko kuri ubu rwose turikorera ibiseke tukagenda twiyumvira umunyenga wo kuri iki kiraro n’iyo waba winywereye agacupa urataha, ikindi ubu imyaka yacu ntigipfa ubusa twambuka muri Muhondo tugacuruza tukazana amafaranga, mbese iki iraro cyadukuye mu icuraburindi, turashima ubuyobozi bwacu”.

Uyu mubyeyi yongeraho ko mu Kagari kabo harimo bamwe batazi gusoma no kwandika babitewe no gutinya kwambuka umugezi bajya ku ishuri, kuri ubu ngo bakaba baratangiye kwiga ikigoroba.

Yagize ati: “Hari bamwe bakomeje gutinya kuzenguruka uruzi ngo bajye kwiga hakurya birangira batamenye gusoma no kwandika, none ubu bamwe ni bwo barimo gutekereza kujya kwiga gusoma, rwose mutubwirire Kagame ko yakoze yuguruye amarembo mu bihugu by’inshuti, ahereye mu guhuza iyi mirenge yacu akoresha uburyo bwose kugeza n’ubwo aduha imihanda yo mu kirere”.

Iki  kiraro cya Ntaruka gihuza Umurenge wa Muhondo n’uwa Muyongwe, cyubakiwe   kimwe n’ibindi  harimo icyitwa Kabutimbo cyo mu Murenge wa Rusaza, gihuza abaturage bo mu Kagari ka Rurembo na Nyundo, hari n’ikiraro cya Gitwa gihuza abaturage b’Umurenge wa Minazi n’uwa Mataba, hakaba n’ikiraro cy’ahitwa ku Iterambere mu Murenge wa Gashenyi, bikaba byarubatswe hagamijwe gufasha abaturage mu migenderanire no guhahirana mu Mirenge no mu Tugari.

Akarere ka Gakenke mu mwaka wa 2021 kujuje ibiraro bine by’icyitegererezo, bifite agaciro k’amafaranga y’u Rwanda angana na 398,658,180.

NGABOYABAHIZI PROTAIS

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE