Gakenke: Abari bamaze amezi 10 badahahirana bishatsemo ibisubizo bibateye inkeke

  • NGABOYABAHIZI PROTAIS
  • Gashyantare 20, 2024
  • Hashize amezi 2
Image

Abahoze bambukira ku kiraro cya Cyangonga cyahuzaga uturere twa Nyabihu na Gakenke bari bamaze amezi 10 badahahirana, bishatsemo ibisubizo bazana ubwato bw’ibiti bwatangiye kubakura mu bwigunge ariko bubateye inkeke.

Ikiraro cya Cyangonga ni kimwe mu bikorwa remezo byangijwe n’imvura nyinshi yaguye muri Gicurasi 2023 yahitanye abasaga 135 mu Turere dutandukanye tw’Intara y’Iburengerazuba, iy’Amajyaruguru n’iy’Amajyepfo.

Imvura imaze gutwa ikiraro cy’ibiti cyahuzaga abaturage bo mu mu Murenge wa Murenge wa Mugunga mu Karere ka Gakenke ndetse n’uwa Rugera mu Karere ka Nyabihu, imigenderanire yarahagaze, ndetse n’abana bajyaga kwiga hakurya y’umugezi.  

Kuri ubu abaturage bishatsemo ibisubizo by’igihe gito bashyiramo ubwato butagira moteri ariko bamwe babufiteho impungenge ko umunsi umwe buzarohama.

 Abaturage bo mu Murenge wa Mugunga bavuganye n’Imvaho Nshya, bemeza ko bafashe icyemezo cyo kuzanamo ubwato bw’ibiti butagira moteri kugira ngo abana babashe kujya kwiga mu Murenge wa Rugera ho muri Nyabihu.

Muhorakeye Joseline ni mwe mu babyeyi bafite abana biga muri Nyabihu yagize ati: “Abana bacu bari bamaze hafi amezi 3 batajya ku ishuri dufata umwanzuro wo kuzana hano ubwato ngo tujye tubona uko tubambutsa kuko nta kundi byari kugenda. Ariko noneho dufite impungenge ko hari ubwo umuvumba uzatwara aba bana bacu mu gihe imvura nyinshi izaturuka mu birunga bava cyangwa bajya kwiga, turifuza ko iki kibazo ubuyobozi bwagikemura mu nzira.”

Uretse no kuba ngo bafite impungenge ko bazagwa muri uruya mugezi ariko nanone ngo bafite ikibazo cy’amikoro ku bijyanjye n’amafaranhga y’urugendo, ibi ngo bigatuma hari abana bajya kwiga nka kabiri mu cyumweru.

Nshimiyimana afite absana 3 bambuka buri munsi bajya ku ishuri avuga ko ari ikibazo gikomeye.

Yagize ati: “Kwambuka hano muri ubu bwato bidusaba amafaranga 100 ku muntu mukuru umwana w’umunyeshuri ni amafaranga 50, njye binsaba buri munsi amafaranga 300 kuko kwambuka inshuro imwe ntanga 150; tekereza ibihumbi 9 ku kwezi, nabwio ni uko ncuruza urwagwa, hari abakene nyakujya rero bi hari abiga umunsi umwe bitewe n’amikoro , dukeneye ikiraro hano kandi gikomeye.”

Ubuyobozi bw’Akarere ka Gakenke bushimangira ko ikibazo cyo kuba hari abaturage bashoyemo ubwato bwacyumvise ariko ko harimo gushakwa igisubizo kirambye ku buryo mu gihe cy’amezi abiri ari imbere iki kiraro izaba cyubatswe mu buryo burambye.

Umuyobozi wungirije w’Akarere ka Gakenke ushinzwe iterambere ry’abaturage, yavuze ko ibikoresho by’ibanze bifasha kubaka icyo kiraro byamaze kuboneka.

Yagize ati: “Ikiraro cya Cyangonga ni kimwe mu bibazo Akarere kacu kuko kiva cyangirika iterambere n’imigenderanire byaradindiye. Kuri ubu rero turateganya ko tuzubaka ikiraro cy’ibyuma nitumara kubifunga neza tuzagenda dushyiraho imbaho nk’uko ubona bubatse biriya biraro bya Giciye na Nyamutera. Twihaye igihe cy’amezi abiri ku ngengo y’imari y’uyu mwaka wa 2024.”

Kubera impungenge z’amazi y’ahahoze ikiraro cya Cyangoga kuri ubu bamwe mu baturage bo muri Gakenke iyo bashaka kujya Nyabihu ngo bibasaba kuzenguruka bakanyura ku gice cya Ngororero, bakaba bizezwa ko mu minsi iri imbere bazongera inzira ikaba nyabagendwa.

  • NGABOYABAHIZI PROTAIS
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE