Gakenke: Abahinzi b’inanasi barataka igihombo baterwa n’abamamyi

  • NGABOYABAHIZI PROTAIS
  • Ukuboza 11, 2023
  • Hashize amezi 6
Image

Abahinzi b’inanasi mu Karere ka Gakenke bavuga ko kuri ubu babangamiwe no kuba babura aho bagurisha umusaruro wabo, bigatuma abamamyi babubikaho urusyo.

 Nsanzimana Gilbert ni umuhinzi w’inanasi mu Murenge wa Gakenke, avuga ko bamaze igihe cy’amezi agera kuri 6, umusaruro wabo basa n’aho bawutangira ubuntu ubundi bakawuha amatungo

Yagize ati: “Ubundi iyo umuntu ari umuhinzi w’inanasi aba yageze mu rwego rw’abakire kandi ni byo koko nkanjye mfite hegitari n’igice mpingaho inanasi, urabona ko napakiye itoyota nzi ko ndabona abakiliya ariko ubu bigeze saa saba ntaragurishaho na kimwe cya kabiri, ibi biterwa rero nuko abajyaga bazigura basa n’abifatiye izindi gahunda cyangwa se bakoze inama yo kuduhenda, inanasi twayiranguzaga ku mafaranga 250, none no kubona 100 ni ikibazo”.

Nsanzimana akomeza avuga ko ngo kugeza ubu bahuye n’igihombo gikabije kugeza ubwo abamamyi babubikaho urusyo.

Yagize ati: “Ubu rero ntegereje ko hari umumamyi nibura waza akazinkuraho kuri 2 [….], azijyane aho kugira ngo nzigaruze mu rugo inka zizirire cyangwa se ziborere mu bubiko, njye najyaga nibura ninjiza amafaranga atari munsi y’ibihumbi magana atatu ku cyumweru none sinzi no kubona ibihumbi ijana mba niyushye akuya.

Dufite igihombo gikomeye, ubuyobozi na ba rwiyemezamirimo nibatekereze nibura uburyo izi nanasi bajya bazigurira abana bakazirira ku bigo by’amashuri aho kugira ngo zikomeze ziborere mu murima”.

Mukandamage we ngo asanga n’inganda zajyaga ziza kubagurira zarahinnye akarenge mu buryo atazi cyangwa se ngo zaba zarafashe ingamba zo gushyiraho abakomisiyoneri.

Yagize ati: “Twajyaga tugurisha n’inganda zikora imitobe n’inzoga mu nanasi, none ubu abatuguriraga ntibakiboneka ahubwo twibonera abantu benshi baza kuduhenda ngo inanasi ni amafaranga 100, tukibaza bo bazijyana hehe ko baza bakarutwubikaho bapakije amadayihatsu yerekeza za Kigali na Musanze, inanasi zihuye no kubura isoko abahinzi tugize igihombo”.

Umuyobozi w’Akarere ka Gakenke wungirije ushinzwe iterambere ry’ubukungu mu Karere ka Gakenke Niyonsenga Aime Francois avuga ko iki kibazo cy’abahinzi b’inanasi mu Karere ka Gakenke kiriho ariko ngo harimo gutekerezwa uburyo abashoramari bashora imari mu kugura umusaruro w’abahinzi b’inanasi cyane cyane abanyenganda

Yagize ati: “Ikibazo cy’umusaruro w’inanasi ku bahinzi bazo mu Karere ka Gakenke, ubu turimo gushishikariza abashoramari tubamenyesha ko dufite inanasi nyinshi kandi nziza tubasaba kuza kuzigura, ubundi hari uruganda mu Murenge wa Gakenke rwajyaga rutunganyamo umutobe n’inzoga”.

Yakomeje asobanura ko urwo ruganda hari ibyo rwasabwe n’Ikigo cy’Igihugu cy’Ubuziranenge.

Ati: “Ubu rero ikigo cy’ubuziranenge hari icyo cyarusabye rusa n’uruhagaritse ibikorwa byarwo urumva ko nabyo byatumye umusaruro ubura aho ujya, twizera rero ko iki kibazo mu minsi iri imbere kiba cyahawe umurongo, abahinzi bakomeze bashake isoko, bashobora no kwishyira hamwe bakajya bapakira imodoka bakagemura za Kigali na Rubavu”.

Mu karere ka Gakenke imibare igaragaza ko abahinzi babigize umwuga basaga 1900, bakora ubuhinzi bw’inanasi buhingwa kuri hegitari zisaga 2600, kandi inanasi zikaza ku mwanya wa kabiri mu kuzanira umuturage wo muri Gakenke amafaranga nyuma ya Kawa, mu Mirenge 19 igize aka karere aho hasarurwa toni zigera ku 2100 ku mwaka.

Ubuyobozi busaba abaturage guhinga inanasi ndetse bakibumbira mu makoperative y’abahinzi b’inanasi kugira ngo babashe kujya bagurisha umusaruro wabo.

  • NGABOYABAHIZI PROTAIS
  • Ukuboza 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE