Gahunda y’inyunganiramirire yitezweho kubungabunga ubuzima bw’umubyeyi utwite

  • NYIRANEZA JUDITH
  • Mutarama 17, 2024
  • Hashize amezi 4
Image

Ku Kigo Nderabuzima cya Kabaya, mu Karere ka Ngororero, hatangirijwe ku rwego rw’Igihugu gahunda nyunganiramirire ikomatanyije ku babyeyi batwite bahabwa ibinini bya Vitamini n’imyunyungugu, ikaba yitezweho kubungabunga ubuzima bw’umubyeyi n’umwana atwite.

Hanagarutswe ku kwigisha imirongo ngenderwaho yo kwita ku mirire y’abana bari mu kigero cyo kwiga, ingimbi n’abangavu.

Ni igikorwa cyayobowe na Minisitiri w’Ubuzima Dr Sabin Nsanzimana ari kumwe n’abandi bayobozi batandukanye barimo n’Uhagarariye UNICEF mu Rwanda Ms Julianna Lindsey n’itsinda ry’Abakozi baturutse muri RBC na NCDA kuri uyu wa Gatatu tariki ya 17 Mutarama 2024.

Minisitiri w’Ubuzima Dr Nsanzimana Sabin

Minisitiri Nsanzimana yasabye ababyeyi kwitabira no kubahiriza iyi gahunda y’inyunganiramirire ngo habungabungwe ubuzima bw’umubyeyi n’umwana.

Yagize ati: “Babyeyi murasabwa kubahiriza iyi gahunda y’nyunganiramirire, mufata ibinini bya bya Vitamini n’imyunyungugu kugira ngo ubuzima bwabo n’ubwabana babo bumere neza.”

Ababyeyi basabwe kwitabira iyi gahunda

Yashimiye kandi Akarere ka Ngororero kuba karagabanyije imibare y’igwingira cyane ko yari mu Turere 10 twa mbere mu gihugu twari dufite igwingira iri hejuru.

Guverineri w’Intara y’Iburengerazuba, Dushimimana Lambert yavuze ko ingamba zafashwe mu Ntara zigamije kurwanya igwingira n’imirire mibi zigenda zitanga umusaruro aho ubushakashatsi bwa 2020 bwagaragaje ko igwingira mu Ntara ryavuye kuri 45% rikagera kuri 40% muri uyu mwaka imibare ikazagera kuri 19%.

Uretse gusura Ikigo Nderabuzima cya Kabaya muri Serivisi yo gusuzuma inda ku bagore batwite kandi hanasuwe icyumba cy’Urubyiruko mu Kigo Nderabuzima cya Kabaya, GS Kabaya haterwa ibiti by’imbuto ziribwa hanaterwa imboga ku murima w’igikoni.

Ibiganiro ku nyunganiramirire ikomatanyije ku bagore batwite no ku mirongo ngenderwaho yo kwita ku mirire y’abana, ingimbi n’abangavu, impanuro z’Abayobozi bitabiriye iki gikorwa ndetse banasura Ibitaro by’Akarere bya Kabaya.

Mu ijambo rye Minisitiri Dr Nsanzimana yagarutse ku igwingira agaragaza ingamba u Rwanda rwihaye mu kurirandura, asaba inzego zose ubufatanye kugira ngo kibazo cy’igwingira gicike burundu.

Yasabye abitabiriye iki gikorwa by’umwihariko abayobozi b’inzego z’ibanze, abakozi mu bigo by’ubuzima, abajyanama b’ubuzima, ababyeyi, urubyiruko,… gutahiriza umugozi umwe igwingira rikazahinduka amateka mu Rwanda.

Yashimiye Akarere ka Ngororero intambwe kamaze gutera mu kurwanya igwingira kuko ryagabanyutseho 10% rivuye kuri 50,5%.

Iki gikorwa cyaranzwe kandi no gutera imboga mu karima k’igikoni ndetse no gutera ibiti by’imbuto ziribwa ku Rwunge rw’amashuri rwa Kabaya.

  • NYIRANEZA JUDITH
  • Mutarama 17, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE