Gahunda ya “Smart Bugesera” igiye guhindura Umujyi wa Bugesera

  • Imvaho Nshya
  • Kanama 23, 2023
  • Hashize amezi 9
Image

Guverineri w’Intara y’Iburasirazuba CG Gasana Emmanuel, yavuze ko gahunda ya ‘‘Smart Bugesera’’ igamije kwihutisha iterambere ryo mu Karere ka Bugesera no kubyaza amahirwe ari muri aka Karere ndetse ikazakwirakwizwa mu Turere twose tugize iyi Ntara.

Kuri uyu wa Gatatu tariki ya 23 Kanama 2023, mu kiganiro n’itangazamakuru ku bukarambaga bwiswe ‘Smart Bugesera’ Umuyobozi w’Intara y’iburasirazuba CG Gasana Emmanuel, yagarutse ku gikorwa cy’ubukangurambaga cyatangijwe mu Karere ka Bugesera kimaze iminsi 10 gitangiye.

Yagize ati: ‘‘Mujya mwumva gahunda ya Leta igamije guharanira kugira u Rwanda rutoshye, rutekanye kandi rufite abaturage bafite imibereho myiza, Akarere ka Bugesera rero ni ko Karere konyine mu Ntara y’Iburasirazuba katoranyijwe kugira ngo kabe icyerekezo n’utundi two turebereho kandi tujye muri uwo murongo.”

Guverineri CG Gasana yavuze ko Akarere ka Bugesera gafite amahirwe yo kuba ari ubwagukiro bw’Umujyi wa Kigali ndetse n’ibikorwa remezo byubakwamo bikaba bituma abaturarwanda bava hirya no hino bifuza kuhatura bityo ubukangurambaga bwatangijwe bukaba bwitezweho gusiga butanze umurongo.

Ati: “Iyo ureba Bugesera mu gihe kiri imbere kuko uyu munsi ari ubwagukiro bw’Umujyi wa Kigali ibyo bita ‘Antena City’, hategerejwe mu buryo bushimishije cyane butanga icyizere cy’iterambere yuko hari ikibuga cy’indege gifite umujyi wihariye kandi ufite uko upanzwe n’ukuteye mu buryo bwihariye.”

Yakomeje agira ati: “Akarere ka Bugesera gafite amahirwe yo kuba gafite ibiyaga icyenda biyikikije; ibi bifite icyo bivuze mu iterambere rijyanye no guteza imbere ubukerarugendo, iby’amahoteli, kurinda ibidukikije n’uburobyi buteye imbere ndetse aya mazi akaba afasha abaturage kuhira imyaka yabo.

Umuyobozi w’Intara y’Iburasirazuba CG Gasana Emanuel, kandi yagarutse ku bikorwa Leta igenda igeza muri aka karere birimo Kaminuza ya RICA yigisha ubuhinzi n’ubworozi, amashuri agezweho ari muri aka Karere ndetse hakaba hazatangizwa n’andi ari ku rwego mpuzamahanga mu gihe cya vuba bitanga icyizere kukuzamura ubumenyi bw’abiga.

Akomeza avuga ko Akarere ka Bugesera kuba gakora ku mupaka ari amahirwe ku bucuruzi bwambukiranya umupaka bifasha kwagura ubuhahirane ndetse bugenda buboneka.

Icyanya cy’inganda kinini gifasha kunganira iza Kigali ngo ni andi mahirwe afasha abatuye aka Karere kuko abenshi bahagana bikazamura imiturire.

Yagize ati: “Abantu bari kuza ari benshi; dufite abaturage barenga ibihumbi 500, ku Ntara twe tubona ari ikintu kiza kuko abakozi baraboneka bafite ubumenyi, kwihangira imirimo biraboneka ndetse ibikorwa bikaba bishaka abantu bafite ubumenyi n’ubushobozi.”

Guverineri CG Gasana yavuze ko ibi bikorwa byose bishoboka ari uko abantu basobanukirwa gahunda iri mu karere ya Smart Bugesera ihuriweho kugira ngo habeho gufatanya gushyira mu bikorwa icyerekezo cy’Igihugu yo gufatanya kugira ngo habeho isuku n’isukura, gufata neza ibikorwa remezo byabonetse muri Bugesera, kugira ngo habeho umutekano w’abantu n’aho batuye, imitangire myiza ya serivisi ihabwa abaturage aho bakorera no mu mahoteli.

Nkuko bisobanurwa kandi, gahunda ya ‘Smart Bugesera’ ihuriweho n’Intara y’Iburasirazuba n’inzego zitandukanye zirimo Ministeri y’Ibikorwa Remezo, Minisiteri y’Ubutegetsi bw’Igihugu, Ibiro bya Minisitiri w’Intebe n’izindi nzego bafatanya kugira ngo iyi gahunda igende neza.

CG Gasana yasobanuye ko nk’Intara bifuje gutangirira mu Karere ka Bugesera kugira ngo bashyire gahunda zose ku murongo, utundi Turere dusigaye tuzaze kwigira kuri Bugesera.

Yagize ati: “Smart Bugesera’ kandi ikubiyemo ibikorwa birimo uburyo abakozi binjira mu kazi, uburyo batanga raporo, uburyo abakozi binjira mu ikoranabuhanga ndetse byose byubakiye ku miyoborere y’Akarere.”

Ibyemezo bikakaye byafatiwe abatarubahirije iyi gahunda

CG Gasana yavuze ko hari ibyemezo bikakaye byafashwe birimo guhagarika Abanyamabanga Nshingwabikorwa b’Imirenge mu Karere ka Bugesera.

Yagize ati: “Twabanje kwereka abayobozi icyo gukora bageze hagati ntibabikora, ku buryo hari Abanyamabanga Nshingwabikorwa b’Imirenge bahagaritswe, abandi barandikirwa ndetse turacyasuzuma niba abandi biri ngombwa ko bahagarikwa mu kazi kuko turacyakora ubugenzuzi bijyanye n’ibyo abayobozi bakora bigashyira ubuzima bw’abaturage mu kaga kubera ko twifuza umuturage ubayeho neza, turacyabisuzuma byose.”

Yakomeje agira ati: “Turabanza tukerekana icyo gukora nubwo waba ukizi, rero dufatanyije n’Akarere n’izindi nzego tuzajya mu masoko, mu Midugudu, mu miryango kuko isuku ni ku mubiri n’aho abaturage batuye.”

Umuyobozi w’Akarere ka Bugesera, Mutabazi Richard yavuze ko nubwo hari amande n’ibihano batanga ku baturage batakoze ibikwiye mu kwimakaza isuku atari byo bigambiriwe.

Yagize ati: “Ubukangurambaga kuri Smart Bugesera ntibugendereye guhana abaturage n’amande cyangwa kubakuramo amafaranga, tugendeye kumenyekanisha no kubona umusaruro kugira ngo tugire isuku.”

Ibihano byashyizweho n’Inama Njyanama y’Akarere ka Bugesera ku batubahiriza amabwiriza yashyizweho ku kwimakaza isuku no gushyira mu bikorwa gahunda ya ‘Smart Bugesera’.

ateganya ko amande make ari ibihumbi bibiri (2) ariko atarenze ibihumbi icumi (10) ku baturage. Ku bigo, amamodoka n’ibindi bikagenda bizamuka.

Kuva ubu bukangurambaga bwatangira hamaze guhagarikwa Abanyamabanga Nshingwabikorwa b’Imirenge batatu mu Karere ka Bugesera, mu Karere ka Kayonza umwe no muri Kirehe umwe ndetse handikiwe n’abandi bayobozi mu rwego rwo kubakebura no kubibutsa inshingano. Aba bayobozi bakaba barahagaritswe mu gihe kingana n’ukwezi kumwe.

Guverineri Gasana asobanura ko ibikorwa by’ubukangurambaga bya ‘Smart Bugesera’ bimaze iminsi 10, ikaba ari gahunda y’amezi ane (4) aho yatangiye mu kwezi kwa Kanama  ikazarangira mu kwezi k’Ukuboza.

Faustin NSHIMIYIMANA

  • Imvaho Nshya
  • Kanama 23, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE