Filimi ebyiri z’Abanyarwanda zegukanye ibihembo mu Bufaransa

Filimi ebyiri z’Abanyarwanda zegukanye ibihembo mu Bufaransa

Sinema Nyarwanda ikomeje kwigaragaza ku rwego mpuzamahanga. Filimi ebyiri zakozwe n’Abanyarwanda, zirimo iyayobowe na Niyitegeka Gratien wamamaye nka Papa Sava, zegukanye ibihembo mu iserukiramuco mpuzamahanga rya L’Afrique Fait Son Cinéma ryabereye mu Bufaransa, mu gihe Kate Katabarwa yahembwe nk’umukinnyi mwiza wa filime.

Muri filime zegukanye ibihembo harimo What a Day, yayobowe na Niyitegeka Gratien ikaba yahawe igihembo cya Bronze Ubuntu. Indi ni Ibyahishuwe (The Chapters) ya Niyoyita Roger, yegukanye igihembo cya Silver Ubuntu. Iyi filime kandi ni yo yahesheje Kate Katabarwa igihembo cya Gold Ubuntu nk’umukinnyi mwiza wa filimi.

Ibi bihembo bitangwa na L’Afrique Fait Son Cinéma, urubuga rugamije guteza imbere sinema nyafurika n’iya karayibe, binyuze mu kwerekana ibikorwa by’abakora filimi, kubahuza n’abandi banyamwuga no kubafasha kubona amahirwe yo kwagura ibikorwa byabo.

Abategura iri serukiramuco batangaje ko filimi 56 zo mu bihugu 24 ari zo zageze mu cyiciro cya nyuma cy’amarushanwa, nyuma yo gutoranywa mu zisaga 300 zari zatanzwe mu irushanwa.

Filimi What a Day, yakozwe na Zacu Entertainment, yahawe igihembo cya Bronze Ubuntu mu cyiciro cya Best Fiction Feature Film, gihatanirwamo filimi ndende z’impimbano.

Kuba filimi ebyiri z’Abanyarwanda zegukanye ibihembo muri iri serukiramuco ni indi ntambwe mu rugendo rwa Sinema Nyarwanda rwo kwigaragaza ku ruhando mpuzamahanga. Ibi bigaragaza uruhare rw’inkuru zishingiye ku buzima bw’Abanyarwanda, impano z’abakinnyi n’ubuhanga bw’abanditsi n’abayobozi ba filime mu kumenyekanisha sinema nyarwanda.

Umuhango wo gutanga ibi bihembo no gusoza ku nshuro ya munani iri serukiramuco wabaye ku mugoroba wo ku wa 14 Ugushyingo 2026. Wahuje abakora sinema baturutse muri Afurika, mu birwa bya Karayibe no mu bindi bice by’Isi.

Amakuru y’ibi bihembo yatangajwe kuri uyu wa 16 Ugushyingo 2026.

Niyiyita yegukanye igihembo agikesheje Ibyahishuwe filme ( The Chapters)
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. Nyagatare: Binubira ko inka zabo zirinda mu mpera z’icyumweru zitabona abazitera intanga 16 Ugushyingo 2026 Saa 18:00
  2. Gahunda y’imyaka 5 muri TTC Cyahinda izategura abarezi beza kandi bashoboye 16 Ugushyingo 2026 Saa 16:58
  3. Byinshi ku ndirimbo ‘Indinde’ ya Mariya Yohana imaze imyaka isaga 30 16 Ugushyingo 2026 Saa 16:34
  4. Guhinga ibihingwa byera vuba, igisubizo ku izamuka ry’ibiciro – Dr. Uwituze 16 Ugushyingo 2026 Saa 16:22
  5. Kigali: Polisi yafashe abagabo babiri bafite ibilo 15 by’urumogi 16 Ugushyingo 2026 Saa 12:57