Fièvre Jaune mu Karere, u Rwanda ruryamiye amajanja

  • Imvaho Nshya
  • Werurwe 22, 2022
  • Hashize imyaka 2
Image

Fièvre Jaune bi indwara ikomeye ikiboneka mu bihugu byinshi byo muri Afurika no muri Amerika y’Amajyepfo yandura abasaga 200,000 buri mwaka, ikaba iterwa na virusi yitwa amaril umuntu yanduzwa n’umubu witwa Aedes Aegyptii.

Ni indwara ituma umuntu ahinda umuriro mwinshi kandi n’uruhu rwe rugahinduka umuhondo ari na yo mpamvu yiswe “Yellow Fever”. Abahanga mu by’ubuvuzi bemeza ko ari indwara itera imfu ziri hagati ya 20% kugeza kuri 50% by’abo ifashe ikabarembya.

Ibibazo bikunze kuvuka ku bamaze kuremba kubera iyi ndwara ni ukunanirwa gukora kw’impyiko n’umwijima (liver), guhinduka k’uruhu, kuvugishwa no kugwa muri coma.

Mu gihugu yagezemo hari ubwo yibasira abantu nk’icyorezo. Minisiteri y’Ubuzima mu Rwanda yatangarije Abanyarwanda ndetse n’abagenzi baturuka mu mahanga ingamba nshya zijyanye no kwirinda iki cyorezo cyamaze kugaragara mu bihugu bitandukanye byo mu Karere u Rwanda ruherereyemo.

Itangazo ryashyizwe hanze na minisiteri y’Ubuzima rigaragaza ko abantu bose bakora ingendo mu bihugu byagaragayemo icyo cyorezo cya  Yellow Fever bagomba kuba barikingije nibura mu minsi 10 mbere yo gufata ingendo.

Gusa ku mugenzi uturutse mu bihugu bitabarizwamo iki cyorezo ntabwo asabwa kuba yarikingije. Mu bihugu byo mu Karere ni ho hatangiye kuvugwa icyo cyorezo.

Ku ya 5 Werurwe ni bwo Igihugu cya Kenya cyatangaje ko indwara ya Yellow Fever yabonetse mu Ntara ya Isiolo nyuma y’uko yari imaze kwivugana abantu batatu. Abandi 20 batangajwe ko banduye icyo cyorezo muri ako gace mu kwezi kwa Gashyatare.

Icyo cyorezo kandi cyanagaragaye mu bihugu icyenda by’Afurika mu mwaka wa 2021, ari byo Cameroon, Chad, Central African Republic, Côte d’Ivoire, the Repubulika iharanira Demokrasi ya Congo (RDC), Ghana, Niger, Nigeria na Repubulika ya Congo-Brazzaville.

Minisiteri y’Ubuzima mu Rwanda itangaza ko icyemezo cy’uko umuntu yikingije iyi ndwara ari itegeko ku bagenzi baturuka mu bihugu iyo ndwara yatangajwe nk’icyorezo n’ibindi bihugu byagiye bigaragaramo abarwayi bake.

Iyi minisiteri ivuga ko ku bagenzi bagiriye uruzinduko mu bihugu byatangaje ubwandu bushya bwa Yellow Fever  mu masaha 24 bazajya bemererwa kwinjira mu gihugu mu gihe baba bafite icyangombwa cy’uko bikingije kandi bafite umuriro uri munsi ya dogere selisiyusi wa 38.5, ndetse bakaba bemera kwishyira mu kato no kwishyikiriza kwa muganga byihuse igihe bagira ibimenyetso mu minsi itandatu.

Itangazo rigenewe abanyamakuru riragira riti: “Umugenzi (utuye/udatuye mu Rwanda) ufite umuriro muke (munsi ya 38.5 ºC) azemererwa kwinjira mu Rwanda aramutse yemeye kwishyira mu kato no gukomeza korohereza abaganga kumukurikirana.”

Ku mugenzi ufite icyemezo cy’uko yikingije kitarageza ku minsi 10 we azashyirwa mu kato kugeza ya minsi 10 irangiye kugira ngo icyemezo cye gitangire kugira agaciro, mu gihe uzaba aturutse mu gihugu cyagaragayemo iyo ndwara cyangwa aho yatangajwe nk’icyorezo we azajya ahita akingirwa acyinjira mu Rwanda.

Umuntu uzanga kubahiriza ibyo asabwa ngo ntazemererwa kwinjira mu Gihugu cyane ko ikiguzi cyo kwishyira mu kato ndetse n’icyo kwikingiza bizajya byishyurwa na nyirubwite.

Minisiteri y’Ubuzima kandi inavuga ko abamaze guhabwa urukingo rwa Fievre Jaune rw’ibihe byose batazajya basabwa kuba bakongera kwikingiza ariko abatararufata bo bizajya bibasaba kubanza kurwikingiza mbere y’iminsi 10 ibanziriza urugendo rwabo.

Ku bafite ibyemezo bifite agaciro k’imyaka 10 barasabwa kugana ku cyicaro cy’ishami ry’inkingo rya RBC i Gikondo bagahabwa urukingo rwa burundu.

  • Imvaho Nshya
  • Werurwe 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE