Everton yakuweho amanota 10 izira ‘Financial Fair Play’

  • Imvaho Nshya
  • Ugushyingo 18, 2023
  • Hashize amezi 6
Image

Ikipe ya Everton yo mu cyiciro cya mbere muri Shampiyona y’u Bwongereza yakuweho amanota 10 kubera kurenga ku mategeko agena ikoreshwa ry’umutungo  ‘ FIFA Financial Fair Play’.

Ni nyuma y’iperereza ryakozwe na Komisiyo yigenga kuva muri Werurwe, ryasanze kuva mu mwaka w’imikino wa 2018 kugeza mu 2022 Everton yarahombye miliyoni 370 z’ama Euro mu gihe amategeko avuga ko nta kipe yemerewe guhomba arenze miliyoni 105 z’ama Euro.

Mu bindi bihano iyi kipe yashoboraga guhabwa harimo gucibwa amafaranga, kubuzwa kugura abakinnyi ndetse no gukurwaho amanota.

Gusa byarangiye ikuweho agera ku 10 iva ku mwanya wa 14 n’amanota 14 ijya ku wa 19 n’amanota ane, aho ubu iri kunganya amanota na Burnley iri ku mwanya wa nyuma ku urutonde rw’agateganyo rwa shampiyona.

Mu itangazo Everton yashyize hanze kuri uyu wa Gatanu tariki 17 Ugushyingo 2023, yavuze ko yatunguwe cyane n’umwanzuro yafatiwe bityo igomba kujurira.

Mu ntangiriro z’uyu mwaka Manchester City nayo yakozweho iperereza ku bijyanye no kurenga ku mategeko agena ikoreshwa ry’umutungo ryaje gutangaza ko yabikoze inshuro zirenga 100 gusa umwanzuro ukaba utaratangazwa.

Everton yabaye ikipe ya gatatu ikuweho amanota muri Shampiyona y’u Bwongereza nyuma ya Middlesbrough yakuweho atatu ubwo yari yananiwe gusoza imikino yayo mu mwaka w’imikino wa 1996-1997.

Indi kipe ni Portsmouth yakuweho amanota icyenda mu mwaka w’imikino 2009-2010 kubera ibibazo by’imiyoborere.

Amakipe yose yakuweho amanota muri iyi shampiyona ikunzwe cyane ku Isi ntiyabashije kuguma mu cyiciro cya mbere muri uwo mwaka, yose yaje ku manuka mu cyiciro cya kabiri.

SHEMA IVAN

  • Imvaho Nshya
  • Ugushyingo 18, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE