EU yemereye u Rwanda miliyari 72.3 Frw zigenewe ubuhinzi bugezweho

  • NTAWITONDA JEAN CLAUDE
  • Ukwakira 6, 2022
  • Hashize imyaka 2
Image

Kuri uyu wa Kane taliki ya 6 Ukwakira, u Rwanda n’Umuryango w’Ubumwe bw’u Burayi (EU) byasinyanye amasezerano y’inkunga ya miliyoni 69 z’Amayero, ni ukuvuga amafaranga y’u Rwanda asaga miliyari 72.3. 

Biteganyijwe ko iyo nkunga izifashishwa mu guteza imbere ubuhinzi bwifashisha ikoranabuhanga mu guhangana n’imihindagurikire y’ikirere kandi butagira n’umwe busigaza inyuma.

Ayo masezerano yashyizweho umukono na Minisitiri w’Imari n’Igenamigambi Dr Uzziel Ndagijimana n’Ambasaderi w’Umuryango w’Ubumwe bw’u Burayi mu Rwanda Belen Calvo Uyarra

Byabaye nyuma y’ibiganiro bagiranye byibanze ku butwererane bugamije iterambere ry’u Rwanda n’irya EU. 

Intego nyamukuru y’iyo gahunda ni uguhuza ibikorwa bigamije kubaka iterambere rirambye ry’ubuhinzi mu Rwanda, binyuze mu gushyigikira impinduka ziganisha ubuhinzi butagira n’umwe buheza kandi butangiza ibidukikije . 

Hari kandi nko guharanira ko u Rwanda rufite imicungire y’ibidukikije n’imihindagurikire y’ikirere irambye. 

Uyu mushinga nanone witezweho kugira uruhare rukomeye mu kugera ku ntego u Rwanda rwihaye mu kugabanya ibyuka bihumanya ikirere hagamijwe guhangana n’imihindagurikire y’ikirere. 

Ni umushinga kandi uyobora abakozi ba EU muri gahunda biyemeje yo guteza imbere ubuhinzi budaheza kandi buramba, ishingiye ku kubaka no guteza imbere isoko rifasha mu kubungabunga ibidukikije mu Mujyi wa Kigali n’andi masoko mu mijyi itandukanye yunganira Kigali, hagamijwe kunoza uruhererekane rw’umusaruro w’ubuhinzi.

Minisitiri Dr. Ndagijimana yagize ati: “Iyi nkunga dusinyiye ni umusanzu ukomeye kandi uziye igihe kuri Gahunda ya Guverinoma yo kwihutisha Iterambere (NST1) mu guteza imbere no kongera umusaruro w’ubuhinzi n’ubworozi, bikajyana no kubaka imicungire y’ibidukikije n’umutungo kamere irambye mu gihe u Rwanda rwimukira mu iterambere ry’ubukungu ritangiza ibidukikije.”

Amb. Belen Calvo Uyarra na we yashimangiye uburyo u Rwanda na EU byubatse ubutwererane buzira amakemwa, anashimangira ko baterwa ishema no kuba mu bafatanyabikorwa b’imena ba Leta y’u Rwanda mu rugendo rw’iterambere. 

Yakomeje agira ati: “Duhereye kuri uyu mushinga twongeye gushimangira ukwiyemeza kwa EU mu gushyigikira abakene, kubaka iterambere rirambye kandi ritagira n’umwe risigaza inyuma hibandwa ku guhindura ubuhinzi bubungabunga ibidukikije no kugera ku ntego z’u Rwanda mu guhangana n’imihindagurikire y’ikirere.”

Iyo nkunga izatangwa mu gihe cy’imyaka itatu ikaba yitezweho kurushaho gushimangira ubutwererane bw’u Rwanda na EU no kongera inyungu impande zombi zihuriyeho. 

Byitezwe kandi ko miliyoni 52 z’Amayero zizifashishwa mu gushyigikira Ingengo y’Imari igenerwa ubuhinzi, hakazibandwa ku ntambwe yatewe mu kongera ingano y’ayo ubuhinzi bwinjiriza nyirabwo, no kurushaho kunoza imitangire ya serivisi zihabwa abahinzi. 

Muri izo serivisi harimo izirebana n’ubuhinzi ndetse n’ubworozi ndetse n’iz’ikoranabuhanga zihangana n’imihindagurikire y’ikirere, cyane cyane izijyanye no gutera amashyamba mu bihingwa ndetse no gusazura amashyamba. 

Izindi miliyoni 17 z’amayero biteganyijwe ko zizakora nk’inkunga y’ingoboka aho miliyoni 10 zizashyirwa muri gahunda yo guteza imbere ubuhinzi bw’indabo, imboga n’imbuto hamwe n’ubukorerwa mu mazi.

Miliyoni 7  zizifashishwa na Minisiteri y’Ubuhinzi n’Ubworozi, Minisiteri y’Ibidukikije n’ibigo bizishamikiyeho, mu gutegura Politiki no gukurikirana ishyirwa mu bikorwa by’iyo gahunda yose ngo ibashe kugera ku musaruro wateganyijwe. 

  • NTAWITONDA JEAN CLAUDE
  • Ukwakira 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE