EU yavuze ko Ikibazo cy’ihohoterwa rishingiye ku gitsina kireba buri munyarwanda

  • KAYITARE JEAN PAUL
  • Ukuboza 5, 2023
  • Hashize amezi 6
Image

Itsinda ry’Umuryango w’Ubumwe bw’u Burayi (EU) mu Rwanda ritangaza ko ikibazo cy’ihohoterwa rishingiye ku gitsina (GBV) ari ikibazo kireba buri wese.

Ni ibyagarutsweho ku wa Gatandatu ubwo hatangizwaga ubukangurambaga bw’iminsi ibiri mu Murenge wa Kigali mu Karere ka Nyarugenge mu Mujyi wa Kigali.

Ni igikorwa cyabereye i Karama na Nyabugogo mu Murenge wa Kigali, Club Rafiki ndetse na Kimisagara.

Ubukangurambaga bwateguwe n’Ikigo cy’Ababiligi gishinzwe Iterambere, Enabel, ku bufatanye n’Ikigo cy’Abadage Gishinzwe iterambere, GIZ ndetse n’Akarere ka Nyarugenge.

Iminsi 16 y’ubukangurambaga bwo kurwanya ihohoterwa rishingiye ku gitsina. Insanganyamatsiko igira iti ‘Dufatane urunana! Dukumire ihohoterwa rishingiye ku gitsina’.

Mu bukangurambaga muri gahunda y’iminsi 16 yo kurwanya ihohoterwa rishingiye ku gitsina, EU itangaza ko buri wese akwiye kugira uruhare mu kurandura burundu ihohoterwa rishingiye ku gitsina.

Uwari uhagarariye itsinda ry’abagize Umuryango w’Ubumwe bw’Ibihugu by’i Burayi muri ubu bukangurambaga, yavuze ko ihohoterwa rishingiye ku gitsina atari ikibazo cy’umuntu ku giti cye.

Ati: “Kurwanya ihohoterwa rishingiye ku gitsina bisobanuye ko ari inyungu z’umuryango.

Birasaba guhuza imbaraga n’itsinda ry’i Burayi mu minsi 16 yo kurwanya ihohoterwa rishingiye ku gitsina muri Karama mu Murenge wa Kigali mu Karere ka Nyarugenge, binyuze mu ikinamico rigamije ubukangurambaga”.

Manuel Roa Igresias, Umuyobozi ushinzwe imishinga mu Kigo cy’Iterambere cy’u Bubiligi mu Rwanda (Enabel), avuga ko muri ubu bukangurambaga bikwiye ko n’abaturage bashishikarizwa kwipimisha indwara zitandura, ubwandu bwa Virusi itera SIDA ndetse n’umwijima.

Ikindi ni uko ababwitabiriye bakanguriwe kuboneza urubyaro.

GIZ ivuga ko ku bufatanye n’Akarere ka Nyarugenge, ndetse na Enabel batangije ubukangurambaga bw’iminsi ibiri bugamije kurandura burundu ihohoterwa rishingiye ku gitsina.

Abaturage bibukijwe ko ari inshingano za buri wese kurwanya ihohoterwa rishingiye ku gitsina.

Raporo yo mu 2021 y’Ishami ry’Umuryango w’Abibumbye Rishinzwe Ubuzima, OMS, yagaragaje ko buri mwaka abagore n’abakobwa miliyoni 736 bo ku Isi yose bakorerwa ihohoterwa ryo ku mubiri, irishingiye ku gitsina cyangwa irindi, abo mu bihugu bikiri mu nzira y’amajyambere akaba ari bo benshi basagarirwa cyane.

Abo mu bihugu byo Munsi y’Ubutayu bwa Sahara, muri Aziya y’Epfo na Oceania bari hagati y’imyaka 15 na 49 bibasirwa ku kigero kiri hagati ya 33 na 51%, bagahohoterwa n’abantu ba hafi kuri bo barimo abo bashakanye.

Naho ab’i Burayi bahohoterwa buri mwaka bari hagati ya 16 na 24%, muri Aziya yo Hagati ni 18%, Aziya y’Iburasiraziba ni 20%, mu gihe abo mu Majyepfo ashyira Uburasirazuba bwa Aziya ari 21%.

Iyi raporo igaragaza ko abagore n’abakobwa batangira guhohoterwa bakiri bato, aho umwe muri bane bari hagati y’imyaka 15 na 24 akorerwa ihohoterwa n’umuntu bafitanye umubano wihariye.

OMS igaragaza ko abagore n’abakobwa bakorerwa ihohoterwa n’abantu ba hafi kuri bo barimo nk’abo bashakanye ari bo benshi kuko bagera kuri miliyoni 641.

Gusa abagera kuri 6% ni bo bavuze ko bakorewe ihohoterwa rishingiye ku gitsina n’undi muntu utari uwa hafi kuri bo.

  • KAYITARE JEAN PAUL
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE